ជឿឬមិនជឿ លោកដូណាល់ត្រាំ ត្រូវស្តាប់របាយការណ៍ស្តីពីការលូកដៃរបស់រុស្ស៊ីក្នុងកិច្ចការបោះឆ្នោត
នៅថ្ងៃសុក្រទី ៦មករា នេះ ប្រមុខការិយាល័យស៊ើបការណ៍សំងាត់អេមេរិក ប្រធានCIA និងអគ្គនាយក FBI នឹងទៅជួបលោក ដូណាល់ ត្រាំ ដើម្បីពន្យល់ពីការសន្និដ្ឋានរបស់ភ្នាក់ងារស៊ើបការណ៍សំងាត់អាមេរិក ស្តីពីតួនាទីរបស់រុស្ស៊ី នៅពីក្រោយការចូលទៅលួចយកទិន្ន័យព័ត៌មានវិទ្យា ក្នុងកំឡុងពេលបោះឆ្នោតកន្លងទៅ។ កាលពីថ្ងៃ ទី៥មករា ប្រមុខស៊ើបការណ៍សំងាត់អាមេរិក បានចូលទៅជួបគណកម្មការការពារជាតិនៃព្រឹទ្ធសភា ហើយបានរក្សាការសន្និដ្ឋានរបស់ខ្លួនថា រុស្ស៊ីពិតជានៅពីក្រោយទង្វើនេះមែន។ កន្លងមក លោកដូណាល់ ត្រាំ តែងតែប្រកែក មិនទទួលស្គាល់ការសន្និដ្ឋាននេះទេ។ តែយ៉ាងណា ពេលនេះ ទោះចង់មិនចង់ លោកដូណាល់ ត្រាំ ត្រូវតែស្តាប់ការពន្យល់ ព្រោះរឿងនេះ មិនមែនជារឿងលេងសើចឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
លោកចន ម៉ាខេន ប្រធានគណកម្មការការពារជាតិនៃព្រឹទ្ធសភា បានចាត់ទុកថា ទង្វើរបស់រុស្ស៊ី ដែលបានចូលមកជ្រៀតជ្រែក ក្នុងដំណើរការបោះឆ្នោតប្រធានាធិបតីអាមេរិក គឺមិនខុសពីការប្រកាសសង្រ្គាមទេ។ សម្តីនេះ បង្ហាញឲ្យកាន់តែច្បាស់ អំពីគំលាតគ្នា រវាងមន្ត្រីគណបក្សសាធារណៈរដ្ឋរូបនេះ ជាមួយលោកដូណាល់ ត្រាំ ដែលជាប្រធានាធិបតីថ្មី។ សមាជិកសភា និងព្រឹទ្ធសភាអាមេរិក មិនថា មកពីគណបក្សសាធារណៈរដ្ឋ និងបក្សប្រជាធិបតេយ្យទេ គេបានសម្តែងការទុកចិត្ត ទៅលើលទ្ធផលនៃការស៊ើបអង្កេត។
នៅថ្ងៃសុក្រនេះ លោកដូណាល់ ត្រាំ ត្រូវជួបជាមួយលោក ប្រធានការិយាល័យស៊ើបការណ៍សំងាត់ លោកប្រធានCIA និងអគ្គនាយកFBI ដើម្បីស្តាប់ការពន្យល់ ស្តីពីការសន្និដ្នាន។ ប្រធានភ្នាក់ងារស៊ើបការណ៍ទាំង៣របស់អាមេរិក សុទ្ធតែមានជំហរដូចគ្នា ដោយផ្អែកទៅលើការស្រាវជ្រាវយ៉ាងម៉ដ្ឋចត់ថា រដ្ឋាភិបាលរុស្ស៊ី ពិតជាអ្នកនៅពីក្រោយ នៃការចូលមកលួចទិន្ន័យព័ត៌មានវិទ្យា របស់គណបក្សប្រជាធិបតេយ្យពិតមែន។ ក៏ប៉ុន្តែ កន្លងមក លោកដូណាល់ ត្រាំ តែងតែប្រកែក មិនទទួលយកការសន្និដ្ឋាននេះ ហើយថែមទាំងចំអកឌឺដង ទៅដល់ទីភ្នាក់ស៊ើបអង្កេតធំៗរបស់អាមេរិក ទាំងបីនេះទៀងផង។
លោក James Clapper អគ្គនាយកទីភ្នាក់ងារស៊ើបអង្កេតអាមេរិក បានថ្លែងថា គោលជំហរ និងសំដីរបស់លោកដូណាល់ត្រាំ កន្លងមក គឺមានការប៉ះពាល់ខ្លាំងណាស់ដល់ទឹកចិត្តរបស់ក្រុមការងារស៊ើបការណ៍សម្ងាត់របស់អាមេរិក។ លោកថា ក្នុងនាមជាប្រធានាធិបតីអាមេរិកមួយទាំងមូល លោក ត្រាំ បែរជានិយាយក្នុងន័យមិនទុកចិត្ត និងមិនផ្តល់តំលៃ ទៅដល់ក្រុមការងាររបស់ប្រទេសខ្លួន ទៅវិញ។
សូមបញ្ជាក់ថា យោងតាមការចុះផ្សាយរបស់ CNN បានឲ្យដឹងថា ក្រុមស៊ើបការណ៍សំងាត់អាមេរិក បានកំណត់មុខសញ្ញា និងអត្តសញ្ញាណអ្នកដែលចូលមកលួចទិន្ន័យព័ត៌មានវិទ្យា ដែលជាដៃជើងរបស់រដ្ឋាភិបាលរុស្ស៊ី មុននឹងចែកចាយទិន្ន័យនេះ ទៅឲ្យគេហទំព័រWikileaks។ បន្ថែមពីនេះទៀត កាសែត Washington Post បានចុះផ្សាយដែរថា គេបានថតបានសម្លេងអបអរសាទររបស់ថ្នាក់ដឹកនាំរុស្ស៊ី នៅពេលដែលបានដឹងដំណឹងថា លោកដូណាល់ ត្រាំ បានឈ្នះឆ្នោតទៀតផង។
គ្រប់គ្នាពេលនេះ កំពុងរងចាំមើល ថាតើលោកដូណាល់ ត្រាំ នឹងផ្លាស់ប្តូរគោលជំហរដែររឺទេ នៅពេលដែលបានជួបផ្ទាល់ និងស្តាប់ការពន្យល់ពីប្រមុខថ្នាក់ដឹកនាំស៊ើបការណ៍សំងាត់។ ដោយឡែក លោកអូបាម៉ា បានថ្លែងតាមទូរទស្សន៍ថា លោកសង្ឃឹមថា នៅពេលដែលលោកដូណាល់ ត្រាំ បានអានលំអិតអំពីរបាយការណ៍នេះ លោកនិងយល់ពីការពិត ហើយងៀកមកលើកទឹកចិត្ត ដល់ក្រុមការងារស៊ើបអង្កេតអាមេរិក ព្រោះពួកគេធ្វើការប្រកបដោយវិជ្ជាជីវៈខ្ពស់ មិនមែនចេះតែចោទទៅលើរុស្ស៊ី ដោយគ្មានភស្តុតាងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ