រដ្ឋអាជ្ញារប្រេស៊ីលសុំឲ្យចាប់លោក លូឡា ដាក់ឃុំបណ្តោះអាសន្ន
វិបត្តិនយោបាយ វិបត្តិសេដ្ឋកិច្ច បូកបន្ថែមជាមួយនឹងរឿងអាស្រូវពុករលួយដ៏ធំ កំពុងអង្រួនប្រទេសប្រេស៊ីលឲ្យរញ្ជួយ។ លោក លូឡា អតីតប្រធានាធីបតីប្រេស៊ីល ដ៏មានប្រជាប្រិយភាព កំពុងតែត្រូវបានតុលាការចោទប្រកាន់ពីបទពាក់ព័ន្ធនឹងអំពើពុករលួយ ទទួលសំណូក។ នៅថ្ងៃទី ១១ មីនានេះ រដ្ឋអាជ្ញារអមតុលាការក្រុងសាវប៉ូឡូ បានធ្វើការស្នើសុំឲ្យចាប់លោក លូឡា ដាក់ឃុំបណ្តោះអាសន្ន ដើម្បីការពារកុំឲ្យមានការគេចវេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
គេមិនចង់ជឿថាអតីតប្រធានាធិបតីជាទីស្រលាញ់ ត្រូវជាប់ចោទពីបទពុករលួយ៖
លោក លូឡា អតីតប្រធានាធិបតីប្រេស៊ីល ក្នុងរវាងឆ្នាំ២០០៣ ដល់២០១០ ត្រូវតុលាការចោទប្រកាន់ថាបានទទួលសំណូក ជាគេហដ្ឋានមាត់សមុទ្រ ផ្តល់ឲ្យដោយក្រុមហ៊ុនសំណង់សាធារណៈ BTP ដែលជាដៃគូជាមួយក្រុមហ៊ុនរុករក និងផលិតប្រេងប្រេស៊ីល ឈ្មោះ Petrobras។ គឺក្រុមហ៊ុន ទាំងពីរនេះហើយ ដែលកំពុងជាប់រឿងអាស្រូវដ៏មហិមានៅប្រេស៊ីល ហើយបានអូសទាញប្រធានក្រុមហ៊ុនក៏ដូចជាអ្នកនយោបាយជាច្រើន ឲ្យដើរចូលតុលាការ។
ប៉ុន្តែអ្វីដែលធ្វើឲ្យគេភ្ញាក់ផ្អើល គឺលោកអតីតប្រធានាធិបតី លូឡា ដែលជាប្រធានាធិបតីមានប្រជាប្រិយបំផុត ក៏ត្រូវជាប់ក្នុងសំណាញ់នេះដែរ។ ក្នុងកំឡុងពេលកាន់អំណាច គឺលោកប្រធានាធិបតីលូឡានេះហើយ ដែលបានជួយស្រោចស្រង់ ជីវភាពប្រជាជនប្រស៊ីលក្រីក្ររាប់លាននាក់ តាមរយៈការបង្កើនសន្ទុះសេដ្ឋកិច្ចប្រេស៊ីស និងការជួយគិតគូរដល់ប្រជាជនក្រីក្រនៅតាមជនបទ។
ប្រើប្រជាប្រិយភាព អូសទាញមនុស្សឲ្យធ្វើបាតុកម្ម រារាំងការងារតុលាការ៖
បន្ទាប់ពីត្រូវបាននគរបាលចាប់ក្របួចកអាវលោក នៅប្រលានយន្តហោះ យកទៅសាកសួរចម្លើយ មានប្រជាជន1ប្រេស៊ីល ក៏ដូចជាសកម្មជនគណបក្សពលកររបស់លោក បាននាំគ្នាធ្វើបាតុកម្មបរិហារអំពី កម្មវត្ថុនយោបាយនៃការចោទប្រកាន់ទៅលើលោក លូឡា។ ប៉ុន្តែសម្រាប់ពេលនេះ រដ្ឋអាជ្ញារប្រេស៊ីល បានធ្វើការវាយបក ដោយបានចោទប្រកាន់ថា លោកលូឡា បានប្រើប្រាស់ប្រជាប្រិយភាពរបស់គាត់ អូសទាញមនុស្សមកធ្វើបាតុកម្មបង្ករជាភាពអនាធិបតេយ្យ ក្នុងសណ្តាប់ធ្នាប់សាធារណៈ និងជាពិសេសគឺរារាំងការងាររបស់តុលាការ។
ក្រោមហេតុផលទាំងនេះហើយ ទើបលោករដ្ឋអាជ្ញារបានទាមទារ ទុកលោកលូឡា ឲ្យនៅក្នុងការឃុំឃាំងបណ្តោះអាសន្ន។ ប៉ុន្តែសម្រាប់អ្នកគាំទ្រលោកលូឡា នេះគឺរឿងអយុត្តិធម៌ស្រស់ៗ ព្រោះតុលារការត្រូវអនុវត្តច្បាប់ឲ្យបានដូចគ្នាទៅលើប្រជាជនប្រេស៊ីលទូទៅ មិនមែនដោយសារតែលោកលូឡា ជាអតីតប្រធានាធិបតីទើបចាប់គាត់ ដាក់ឃុំបណ្តោះអាសន្នបែបនេះទេ។
រឿងអាស្រូវ ប៉ូវប្រយោជន៍នយោបាយ៖
សូមបញ្ជាក់ថា រឿងអាស្រូវពុករលួយនេះ បានកើតឡើងចំពេលដែលប្រេស៊ីលកំពុងតែមានវិបតិ្តនយោបាយ ដោយសារតែលោកស្រីប្រធានាធិបតីប្រេស៊ីល ឌីលម៉ា រូសែហ្វ កំពុងតែប្រឈមមុខ នឹងការបោះឆ្នោតរំលាយរដ្ឋាភិបាលពីសំណាក់រដ្ឋសភា។ នៅបីថ្ងៃទៀតនេះ នឹងមានការរៀបចំបាតុកម្មដ៏ធំមួយទូទាំងប្រទេស ដើម្បីទាមទារឲ្យលោកស្រីចុះចេញពីតំណែង។ លោកស្រី រូសែហ្វ ក៏ជាអ្នកមកពីគណបក្សពលករ របស់លោកលូឡាដែរ។ ហើយបើទោះបីជាលោកស្រីមិនមានជាប់ពាក់ព័ន្ធដោយផ្ទាល់ ក្នុងសំណុំរឿងពុករលួយ ក៏បន្តែមតិជាច្រើនបានចោទលោកស្រីថាបានបិទភ្នែក ព្រោះរឿងហេតុបានកើតឡើងក្នុងពេលដែលលោកស្រី ធ្វើជារដ្ឋមន្ត្រីក្រសួងរ៉ែនិងថាមពល ដែលជាក្រសួងមេ ជាអ្នកគ្រប់គ្រងក្រុមហ៊ុនជាតិប្រេងកាត Petrobras។
ថ្វីបើស្ថាប័នតុលាការប្រេស៊ីល មានឯករាជ្យពេញលេញក៏ដោយ ក៏គេនៅតែព្រួយបារម្ភថា ទាំងអស់នេះគឺជាលេសនយោបាយ ដើម្បីវាយបំបែកគណបក្សពលករតែប៉ុណ្ណោះ។ មុននឹងត្រូវបានគេចោទប្រកាន់ លោកលូឡា បានបង្ហើបថាលោកនឹងត្រឡប់មកឈរឈ្មោះជាប្រធានាធិបតី នៅអាណត្តិឆ្នាំ២០១៨ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ