ស៊ីរី ៖ វ៉ាស៊ីនតោនបរិហារថាទំនងមានការវាយប្រហារដោយអាវុធគីមីនៅហ្គូតា
កងទ័ពរបស់រដ្ឋាភិបាលស៊ីរី ដែលកំពុងសម្រុកវាយប្រហារយកទីតាំងចុងក្រោយរបស់ពួកឧទ្ទាមនៅតំបន់ហ្គូតា ជាយក្រុងដាម៉ាស ទំនងជាមានប្រើអាវុធគីមីផង។ នេះបើតាមការបរិហាររបស់សហរដ្ឋអាមេរិក ដែលយល់ថា ប្រសិនបើជាការពិត នោះរុស្ស៊ីគួរតែមានចំណែកទទួលខុសត្រូវនៅក្នុងការប្រើប្រាស់អាវុធគីមីនេះ។
ចុះផ្សាយនៅថ្ងៃ៖
ក្រុមមួកស ក្រុមអ្នកសង្គ្រោះនៅតំបន់កាន់កាប់ដោយពួកឧទ្ទាម បានបរិហារអំពីការប្រើប្រាស់អាវុធគីមី ជាឧស្ម័នហ្កាសក្លរដ៏សែនពុល កាលពីថ្ងៃសៅរ៍ នៅតំបន់ហ្កូតា ខាងកើត។ ប្រសិនបើព័ត៌មានទាក់ទងនឹងការប្រើប្រាស់អាវុធគីមី នៅហ្គូតា ពិតត្រូវបានបញ្ជាក់មែន នោះសហគមន៍អន្តរជាតិត្រូវតែផ្តល់ចម្លើយតបឱ្យបានទាន់ហន់ ! នេះបើតាមការអះអាងរបស់អ្នកនាំពាក្យក្រសួងការបរទេសអាមេរិក នៅក្នុងសេចក្តីថ្លែងការណ៍ ព្រឹកមិញ ដោយបានគូសបញ្ជាក់ទៀតថា រដ្ឋាភិបាលរបស់លោកអាសាទ និងរុស្ស៊ី ត្រូវជាអ្នកទទួលខុសត្រូវចំពោះការប្រើប្រាស់អាវុធគីមី។ សម្រាប់អាមេរិក រុស្ស៊ីការពាររបបក្រុងដាម៉ាសខ្លាំងណាស់ តែមិនអាចទប់ស្កាត់មិនឱ្យមានការប្រើប្រាស់អាវុធគីមីនៅស៊ីរីទេ ! នេះបរាជ័យដែលអាចធ្វើឱ្យវិបត្តិស៊ីរីមិនអាចដោះស្រាយចេញ។
ប៉ុន្តែភ្លាមមួយរំពេច នៅក្នុងថ្ងៃអាទិត្យនេះដដែល សារព័ត៌មានរដ្ឋស៊ីរី និងតំណាងរុស្ស៊ី បានច្រានចោល យ៉ាងដាច់អហង្កា ការបរិហារនេះ ដោយបានអះអាងថាគ្មានការប្រើប្រាស់អាវុធគីមីនៅក្នុងការវាយប្រហារនៅហ្គូតា ដូចដែលអាមេរិកសង្ស័យឡើយ។
សម្រាប់ពេលនេះ គេគ្មានអ្វីសម្រាប់ផ្ទៀងផ្ទាត់ព័ត៌មានទេ។ ខាងក្រុមអ្នកអង្កេតការណ៍សិទ្ធិមនុស្សនៅស៊ីរី ដែលមានបណ្តាញឆ្វែងឆ្វាត់នៅស៊ីរី បានអះអាងថាគ្មានសមត្ថភាពបញ្ជាក់ ឬបដិសេធ នូវរាល់ពាក្យចោទប្រកាន់ស្តីពីការប្រើប្រាស់អាវុធគីមីនៅហ្គូតាបានទេ។ អង្គការបានត្រឹមជូនដំណឹងថាមានជនស៊ីវិលរងគ្រោះផ្លូវដង្ហើម និងថប់ដង្ហើម ដល់ទៅប្រមាណជាង៧០ករណី ក្នុងនោះ១១នាក់បានស្លាប់ ដោយស្រូបខ្យល់ពុល ថប់ក្នុងកន្លែងលាក់ខ្លួនយូរពេក។ សូមបញ្ជាក់ថា ក្រោយពីស្ងប់ស្ងាត់មួយរយៈខ្លី កងទ័ពរដ្ឋាភិបាលក្រុងដាម៉ាស បានបើកយុទ្ធនាការវាយប្រហារផ្លូវអាកាសយ៉ាងសន្ធាប់ជាថ្មី លើទីតាំងចុងក្រោយបង្អស់របស់ពួកឧទ្ទាម នៅតំបន់ហ្គូតា ខាងកើត នារយៈពេល២៤ម៉ោងចុងក្រោយនេះ ដើម្បីបង្ខំពួកគេឱ្យចុះចាញ់ និងព្រមចរចា។
របបក្រុងដាម៉ាស បានជាប់ចោទជាច្រើនលើកច្រើនសាមកហើយ ថាបានប្រើអាវុធគីមី ប្រឆាំងនឹងពួកឧទ្ទាម តាំងពីសង្គ្រាមចាប់ផ្តើមភ្លាម។ អង្គការសហប្រជាជាតិយល់ថាស៊ីរីបានប្រើអាវុធគីមី សារាំង នៅក្នុងការវាយប្រហារកាលពីខែមេសា ២០១៧ លើភូមិមួយដែលគ្រប់គ្រងដោយពួកប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ