អាមេរិកអនុម័តគម្រោងលក់យន្តហោះចម្បាំងF-16 ចំនួន៦៦គ្រឿង ឱ្យតៃវ៉ាន់
នៅល្ងាចថ្ងៃអង្គារទី ២០សីហា ម្សិលមិញ សហរដ្ឋអាមេរិក បានប្រកាសជូនដំណឹងស្តីពីសេចក្តីអនុម័តលក់អាវុធយន្តហោះចម្បាំងប្រភេទ F-១៦ ចំនួន ៦៦គ្រឿងទៅឱ្យតៃវ៉ាន់។ ជាគម្រោងដ៏ធំបំផុតមួយដែលមានតម្លៃទឹកប្រាក់សរុប ៨ពាន់លានដុល្លារសហរដ្ឋអាមេរិក។ សេចក្តីសម្រេចនេះ នឹងអាចធ្វើឱ្យប៉េកាំងក្តៅក្រហាយខ្លាំងជាក់ជាប្រាកដ។
ចុះផ្សាយនៅថ្ងៃ៖ កែប្រែថ្ងៃទី៖
“ការលក់អាវុធទៅតៃវ៉ាន់នេះ គឺជាសេចក្តីសម្រេចដ៏សមស្របទៅនឹងពាក្យសន្យារបស់អាមេរិក ក្នុងការជួយរក្សាសមត្ថភាពការពារខ្លួនរបស់តៃវ៉ាន់” ! នេះបើតាមការគូសបញ្ជាក់របស់ក្រសួងការបរទេសអាមេរិក ក្នុងសេចក្តីថ្លែងការណ៍មួយដែលអះអាងទៀតថា ការលក់នេះបានបម្រើប្រយោជន៍សេដ្ឋកិច្ច ប្រយោជន៍ជាតិនិងសន្តិសុខរបស់អាមេរិក។
ក្រសួងការបរទេសអាមេរិក បានបញ្ជូនសំណើទៅឱ្យសភា តាំងពីសប្តាហ៍មុន ស្របតាមបែបបទជាផ្លូវការនៃគម្រោងលក់អាវុធនេះហើយ។ តាមធម្មតា សមាជិកសភាមានពេល៣០ថ្ងៃ សម្រាប់ធ្វើការប្រឆាំង ប៉ុន្តែនារយៈពេលប៉ុន្មានទសវត្សរ៍ចុងក្រោយ គេពុំដែលឃើញមានករណីបែបនេះកើតឡើងឡើយ។
កងទ័ពតៃវ៉ាន់មានបំពាក់យន្តហោះចម្បាំងF-១៦ ដែរ ដែលបានទិញពីអាមេរិក កាលពីឆ្នាំ១៩៩២។ តែកិច្ចព្រមព្រៀងជាមួយអាមេរិកលើកនេះ សំដៅទិញយន្តហោះចម្បាំងថ្មីជាង និងមានបំពាក់បច្ចេកវិទ្យាព្រមទាំងអាវុធ ទំនើបជាង។ តាមគម្រោង តៃវ៉ាន់មិនត្រឹមតៃទិញយន្តហោះចម្បាំងចំនួន៦៦គ្រឿងទេ តែថែមទាំងម៉ាស៊ីនប្រតិករ ៧៥គ្រឿង រ៉ាដា និងគ្រឿងបន្លាស់សម្រាប់ប្តូរ ផ្សេងជាច្រើនទៀត សម្រាប់ទៅជួសជុលយន្តហោះយោធាដើម្បីធ្វើយ៉ាងណាឱ្យវិស័យអាកាសចរយោធាតៃវ៉ាន់ឱ្យនៅរឹងមាំល្អ ព្រមទាំងអាវុធជាច្រើនទៀត។
ប៉ុន្តែគម្រោងនេះបានធ្វើឱ្យចិនខឹងសម្បាយ៉ាងខ្លាំង។ ចិនបានបរិហារ ការលក់យន្តហោះចម្បាំង ដែលជាគម្រោងទិញលក់អាវុធដ៏ធំបំផុតមួយរវាងអាមេរិកនិងតៃវ៉ាន់នេះ និងបានគំរាមចាត់វិធានការសងសឹកវិញ តែមិនបញ្ជាក់ថាជាវិធានការបែបណាទេ។ ចិនតែងចាត់ទុកតៃវ៉ាន់ជាផ្នែកមួយនៃទឹកដីចិន ដែលប៉ះបោរបំបែកខ្លួនចេញ ហើយដែលប៉េកាំងមានគម្រោងចង់ប្រើកម្លាំងក្រសោបយកមកវិញ ជានិច្ច។
ចំណែកខាងវ៉ាស៊ីន ថ្វីបើបានផ្តាច់ទំនាក់ទំនងការទូតជាមួយតៃវ៉ាន់ នៅឆ្នាំ១៩៧៩ ដើម្បីទទួលស្គាល់ចិន តាមគោលការណ៍ចិនតែមួយមែន តែបន្តរក្សាសម្ព័ន្ធភាព និងជាអ្នកផ្គត់ផ្គង់អាវុធដ៏ចំបងឱ្យតៃវ៉ាន់។ អាមេរិករបស់លោកត្រាំ ថែមទាំងបានពង្រឹងចំណងសម្ព័ន្ធភាពជាមួយកោះតៃវ៉ាន់ថែមទៀត។ កិច្ចសហប្រតិបត្តិការយោធាជាមួយតៃវ៉ាន់ បានលើកស្ទួយសន្តិភាពនិងសន្តិសុខក្នុងតំបន់ច្រកសមុទ្ទតៃវ៉ាន់ និងក្នុងតំបន់ទាំងមូលផង ហេតុដូច្នេះហើយបានជាអាមេរិកត្រូវតែបន្តធ្វើទៀត! នេះជាការបញ្ជាក់របស់អ្នកទទួលខុសត្រូវការទូតអាមេរិកម្នាក់ដែលសុំមិនបញ្ចេញឈ្មោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ