អ្នកវិភាគនិងសង្គមស៊ីវិលថាសម្ដីលោក ហ៊ុន សែន «ខ្វះសីលធម៌»
បន្ទាប់ពីលោក ហ៊ុន សែន ប្រើពាក្យសម្ដីទៅកាន់លោក សម រង្ស៊ីថា ជាកូនអាក្បត់ជាតិ។អ្នកវិភាគនិងសង្គមស៊ីវិលចាត់ទុកជាសម្ដីនេះ«ខ្វះសីលធម៌» ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លោក អ៊ូ វីរៈ ប្រធានវេទិកាអនាគតនិងជាអ្នកវិភាគចាត់ទុកសម្ដីរបស់លោក ហ៊ុន សែន ថាខ្វះសីលធម៌។ ខ្វះសីលធម៌បើតាមលោក អ៊ូ វីរៈ ការនិយាយរបស់លោក ហ៊ុន សែន ប៉ះពាល់ទៅដល់វង្សត្រកូលរបស់លោក សម រង្ស៊ី ដែលវាមិនគួរកើតមាននៅក្នុងសង្គមប្រជាធិបតេយ្យ។
តែយ៉ាងណាក៏ដោយលោក អ៊ូ វីរៈ មើលឃើញថា ការប្រើប្រាស់ពាក្យសម្ដីរបស់ថ្នាក់ដឹកនាំគណបក្សទាំងពីរនាពេលកន្លងមកគឺខ្វះសីលធម៌ដូចគ្នា។ ជាក់ស្ដែងលោក សម រង្ស៊ី ហៅលោក ហ៊ុន សែន ជាមេដឹកនាំ«ផ្ដាច់ការ»។ ស្ថិតនៅក្នុងសង្គ្រាមពាក្យសម្ដីនេះលោកថា អ្នកដែលរងគ្រោះគឺពលរដ្ឋខ្មែរហើយវាក៏ជាគំរូអាក្រក់មួយសម្រាប់កូនចៅជំនាន់ក្រោយ។
តាមការគត់សម្គាល់ពីលោក អ៊ូ វីរៈ វាក្លាយជាគំរូមួយកើតមានរួចទៅហើយ ដែលអ្នកគាំទ្រគណបក្សប្រជាជននិងគណបក្សសង្គ្រោះជាតិកំពុងប្រើពាក្យសម្ដីនិងកាយវិការទៅតាមលោក ហ៊ុន សែន និង លោក សម រង្ស៊ី។
លោកស្រី ជា វណ្ណាត អ្នកវិភាគសង្គមស្នើឲ្យលោក ហ៊ុន សែន និង លោក សម រង្ស៊ី រក្សាចិត្តអំណត់ជៀសវាងការបន្តប្រើប្រាស់ពាក្យសម្ដីអសុរោះក្នុងនាមជាថ្នាក់ដឹកនាំកំពូលរបស់គណបក្ស។ លោកស្រី ជា វណ្ណាត បន្ថែមថា លោកទាំងពីរគួរធ្វើជាគំរូតាមរយៈដៃគូរសន្ទនាដល់យុវជននិងមន្ត្រីរបស់ខ្លួន។
លោកស្រី ជា វណ្ណាត ក៏ជំរុញឲ្យលោក ហ៊ុន សែន និង លោក សម រង្ស៊ី គួរមើលគំរូមេដឹកបក្សប្រឆាំងនិងបក្សកាន់អំណាចនៅមីយ៉ាន់ម៉ាដែលលោស្រីចាត់ទុកជាប្រទេសមួយមានគុណធម៌ព្រោះមិនធ្លាប់ឮមេដឹកនាំគេប្រើពាក្យសម្ដីអសុរោះជាមួយគ្នាទេ។ អ្នកវិភាគរូបនេះកំពុងបារម្ភថា រូបភាពនៃការប្រើប្រាស់ពាក្យសម្ដីអសុរោះនេះនឹងធ្វើឲ្យសីលធម៌រស់នៅរបស់ប្រជាពលរដ្ឋចុះទាប។ ម្យ៉ាងទៀតនឹងធ្វើឲ្យអ្នកវិនិយោគមានចិត្តរុញរាក្នុងការរកស៊ីនៅកម្ពុជា។
លោក ប៉ុល ហំម មន្ត្រីជាន់ខ្ពស់គណបក្សសង្គ្រោះជាតិថា ការប្រើពាក្យសម្ដីរបស់លោក ហ៊ុន សែន ចំពោះលោក សម រង្ស៊ី ថាជាកូនអាក្បត់ជាតិ ទុកភារៈកិច្ចនេះឲ្យពលរដ្ឋខ្មែរជាអ្នកវិនិច្ឆ័យចុះ។បើតាមលោក ប៉ុល ហំម ជំហររបស់គណបក្សសង្គ្រោះចំពោះរឿងនយោបាយគឺប្រកាន់ធម៌អហិង្សានិងគាំទ្រកិច្ចការសន្ទនារវាងខ្មែរនិងខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ