គជប៖ ការប្រកាសលទ្ធផលផ្លូវការអាចត្រូវពន្យារពេល បើមានបណ្ដឹងតវ៉ាច្រើន
គណៈកម្មាធិការជាតិរៀបចំការបោះឆ្នោត ហៅកាត់ថា គជប បានប្រកាសលទ្ធផលបណ្ដោះអាសន្ននៃការបោះឆ្នោតតាមការគ្រោងទុកកាលពីម្សិលមិញ មុននឹងចេញផ្សាយលទ្ធផលផ្លូវការនៅថ្ងៃទី១៥ខែសីហាខាងមុខ។ យ៉ាងណាក៏ដោយ ការប្រកាសលទ្ធផលផ្លូវការអាចត្រូវពន្យារពេល បើមានបណ្ដឹងតវ៉ាច្រើនចំពោះលទ្ធផលបណ្ដោះអាសន្នដែលទើបតែប្រកាសកាលពីម្សិលមិញ។ នេះបើតាមការគូសបញ្ជាក់ពី លោក ឌឹម សុវណ្ណារុំ សមាជិកនិងជាអ្នកនាំពាក្យ គជប ដែលបានថ្លែងប្រាប់វិទ្យុបារាំងអន្ដរជាតិ RFI នៅថ្ងៃអាទិត្យនេះ។
ចុះផ្សាយនៅថ្ងៃ៖
ស្តាប់ - ០២:១១
ប្រសិនបើមានបណ្ដឹងតវ៉ាចំពោះលទ្ធផលបណ្ដោះអាសន្ននៃការបោះឆ្នោត គជប ចាំបាច់ត្រូវដោះស្រាយបណ្ដឹងអស់ទាំងនោះសិន មុននឹងអាចប្រកាសលទ្ធផលផ្លូវការនៃការបោះឆ្នោតបាន។ លោក ឌឹម សុវណ្ណារុំ បានពន្យល់ប្រាប់វិទ្យុបារាំងអន្ដរជាតិយ៉ាងដូច្នេះ មួយថ្ងៃក្រោយពេល គជប ប្រកាសលទ្ធផលបណ្ដោះអាសន្ននៃការបោះឆ្នោត។ ជាលទ្ធផលដែលរហូតមកទល់ពេលនេះ មានគណបក្សយ៉ាងហោចណាស់៤ហើយ ដែលចេញមុខប្រកាសមិនទទួលស្គាល់។ គណបក្សទាំង៤នោះរួមមាន គណបក្សយុវជនកម្ពុជាទទួលបានសំឡេងឆ្នោតជាង៣ម៉ឺនសំឡេង គណបក្សខ្មែរឈប់ក្រទទួលបានសំឡេងឆ្នោតជាង៥ម៉ឺនសំឡេង គណបក្សខ្មែរអភិវឌ្ឍន៍សេដ្ឋកិច្ចទទួលបានជាង២ម៉ឺនសំឡេង និងគណបក្សរស្មីខេមរាទទួលបានជាង៤ពាន់សំឡេង។
យ៉ាងណាក៏ដោយ ក្នុងចំណោមគណបក្សទាំង៤នោះ មានតែគណបក្សយុវជនកម្ពុជាមួយប៉ុណ្ណោះ ដែលមានបំណងដាក់បណ្ដឹងតវ៉ាទៅកាន់ គជប ដើម្បីឲ្យស្ថាប័នរៀបចំការបោះឆ្នោតនេះ រាប់សន្លឹកឆ្នោតឡើងវិញ។ លោក ពេជ្រ ស្រស់ ប្រធានគណបក្សយុវជនកម្ពុជា ប្រាប់វិទ្យុបារាំងអន្ដរជាតិ RFI ថា លទ្ធផលបណ្ដោះអាសន្ននៃការបោះឆ្នោតដែល គជប ទើបតែចេញផ្សាយនេះ មិនត្រឹមត្រូវសម្រាប់គណបក្សយុវជនកម្ពុជាទេ។ បើតាមប្រធានគណបក្សវ័យក្មេងរូបនេះដដែល ចំនួនសំឡេងគាំទ្រដែលគណបក្សលោកទទួលបានពិតប្រាកដ គឺមានចំនួន៣ម៉ឺន៩ពាន់៤១៧សំឡេង ខណៈលទ្ធផលបណ្ដោះអាសន្ននៃការបោះឆ្នោត បង្ហាញថា បក្សយុវជនកម្ពុជា ទទួលបានសំឡេងគាំទ្រតែ៣ម៉ឺន៩ពាន់៣៣៣សំឡេងប៉ុណ្ណោះ។ លោក ពេជ្រ ស្រស់ អះអាងថា ខ្លួននឹងដាក់ពាក្យបណ្ដឹងតវ៉ាទៅកាន់ គជប ជុំវិញការបាត់សំឡេងឆ្នោតនេះ នៅថ្ងៃចន្ទ ទី១៣សីហា។
ជុំវិញការដាក់ពាក្យបណ្ដឹងតវ៉ាចំពោះលទ្ធផលបណ្ដោះអាសន្ននៃការបោះឆ្នោតនេះ លោក ឌឹម សុវណ្ណារុំ អ្នកនាំពាក្យ គជប បញ្ជាក់ថា គជប នឹងដោះស្រាយតាមករណីជាក់ស្ដែង។ ក្នុងករណីមានបណ្ដឹងតវ៉ាច្រើន គជប អាចនឹងត្រូវពន្យារពេលប្រកាសលទ្ធផលផ្លូវការនៃការបោះឆ្នោត។ ប៉ុន្តែ ប្រសិនបើគ្មានបណ្ដឹងច្រើនណាស់ណាទេ ការប្រកាសលទ្ធផលផ្លូវការនៃការបោះឆ្នោត នឹងធ្វើឡើងនៅថ្ងៃទី១៥សីហា តាមការគ្រោងទុកដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ