បក្សប្រជាជនប្តេជ្ញាដឹកនាំប្រទេសតាមបែបប្រជាធិបតេយ្យ ក្រោយមានការរំលាយបក្សសង្គ្រោះជាតិ
គណបក្សប្រជាជនកម្ពុជាដែលកំពុងតែដឹកនាំរដ្ឋាភិបាលបច្ចុប្បន្ន បានបង្ហាញការប្តេជ្ញាចិត្តថា នឹងរក្សាជំហរដឹកនាំប្រទេសទៅតាមគោលការណ៍លទ្ធិប្រជាធិបតេយ្យ និងនីតិរដ្ឋ។ នេះបើតាមអ្នកនាំពាក្យគណបក្ស។ ប៉ុន្តែអ្នកវិភាគបញ្ហានយោបាយនៅកម្ពុជា មើលឃើញថា ការអនុវត្តលទ្ធិប្រជាធិបតេយ្យនៅកម្ពុជាពីសំណាក់គណបក្សនេះ មានតែសំបកក្រៅប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:២៨
អ្នកនាំពាក្យគណបក្សប្រជាជនកម្ពុជា លោកសុខ ឥសាន បានអះអាងថា បច្ចុប្បន្ន និងទៅអនាគត លទ្ធិប្រជាធិបតេយ្យ និងនីតិរដ្ឋនៅកម្ពុជានៅតែត្រូវបានលើកកម្ពស់និងរីកចម្រើន ព្រមទាំងមាននិរន្តរភាពយ៉ាងរឹងមាំ ស្របតាមសភាពការណ៍វិវត្តន៍រីកចម្រើនរបស់ប្រទេសជាតិ ហើយថាគ្មានអនុភាពណាអាចមករារាំងឬបំផ្លាញបានជាដាច់ខាត ។ អ្នកពាក្យរូបនេះ បានអះអាងបន្ថែមទៀតថា គណបក្សប្រជាជនកម្ពុជាប្តេជ្ញា និងរក្សាជំហរដឹកនាំប្រទេសតាមគោលការណ៍លទ្ធិប្រជាធិបតេយ្យ និង នីតិរដ្ឋ ដោយធ្វើជាមជ្ឈមណ្ឌលនៃសុខដុមនីយកម្មសង្គមទាំងមូល ដើម្បីថែរក្សា ការពារសន្តិភាព ស្ថិរភាពនយោបាយ និងសុខសុវត្ថិភាពសង្គមឲ្យស្ថិតស្ថេរ។
លោកបណ្ឌិតឡៅ ម៉ុងហៃ អ្នកវិភាគបញ្ហានយោបាយកម្ពុជា លើកឡើងថា ការនិយាយពីការដឹកនាំប្រទេសតាមបែបលទ្ធិប្រជាធិបតេយ្យ និង នីតិរដ្ឋពីសំណាក់បក្សកាន់អំណាចនេះ គឺកើតមានយូរមកហើយ ប៉ុន្តែការអនុវត្តតាមពាក្យសម្តីទាំងនេះវិញ មិនទាន់កើតមាននៅឡើយទេ។ សម្រាប់អ្នកវិភាគរូបនេះ ការដឹកនាំនៅកម្ពុជាត្រូវបានរៀបចំឡើងជាទម្រង់លទ្ធិប្រជាធិបតេយ្យ ប៉ុន្តែលទ្ធិប្រជាធិបតេយ្យនេះ លោកចាត់ទុកថា ជាប្រជាធិបតេយ្យតែសំបកក្រៅប៉ុណ្ណោះ។ បើតាមលោកបណ្ឌិតឡៅ ម៉ុងហៃ នេះគឺដោយសារតែប្រព្រឹត្តរបស់រដ្ឋាភិបាល និងរដ្ឋសភា មិនស្របតាមស្តង់ដារលទ្ធិប្រជាធិបតេយ្យ ហើយបញ្ហាសិទ្ធិ សេរីភាព និងច្បាប់ទៀតសោត មិនត្រូវបានគោរព និងអនុវត្តឲ្យបានល្អនោះទេ។
ផ្ទុយពីលោកបណ្ឌិតឡៅ ម៉ុងហៃ លោកបណ្ឌិតគិន ភា អ្នកជំនាញផ្នែកវិទ្យសាស្ត្រនយោបាយ និងជាប្រធានវិទ្យាស្ថានទំនាក់ទំនងអន្តរជាតិនៃរាជ្យបណ្ឌិតសភាកម្ពុជាវិញ យល់ថា ប្រព័ន្ធគ្រប់គ្រងនៅកម្ពុជា គឺធ្វើឡើងតាមបែបបទប្រជាធិបតេយ្យ ដោយសារតែរដ្ឋាភិបាលកម្ពុជាសុទ្ធតែបានកើតចេញពីបោះឆ្នោតស្របច្បាប់ទាំងអស់។ សម្រាប់លោកបណ្ឌិត គិន ភា លទ្ធិប្រជាធិបតេយ្យគឺអាស្រ័យតាមប្រទេសនីមួយៗ ដូច្នេះហើយលោកថា ចង់ឬមិនចង់ កម្ពុជាប្រកាន់យកនូវលទ្ធិប្រជាធិបតេយ្យតាមបែបកម្ពុជា។
លទ្ធិប្រជាធិបតេយ្យកម្ពុជា ត្រូវបានអង្គការអន្ដរជាតិជាច្រើនវាយតម្លៃថា បានធ្លាក់ចុះខ្លាំងនៅក្នុងរយៈពេលចុងក្រោយនេះ និយាយឲ្យចំទៅគឺនៅក្នុងឆ្នាំ២០១៧កន្លងទៅនេះតែម្តង។ នេះក៏ព្រោះតែមានការរំលាយគណក្សប្រឆាំងដ៏ធំបំផុតនៅកម្ពុជា ហើយអង្គការក្រៅរដ្ឋាភិបាលមួយចំនួនត្រូវបានបញ្ជាឲ្យបិទទ្វារ ព្រមទាំងមានការបិទទ្វាររបស់ប្រព័ន្ធផ្សព្វផ្សាយមួយចំនួនផងទៀត។ ប៉ុន្តែបញ្ហាទាំងនេះ រដ្ឋាភិបាលកម្ពុជាបានគូសបញ្ជាក់ជាញយដងថា គឺជាការអនុវត្តច្បាប់ក្នុងនាមកម្ពុជាជានីតិរដ្ឋ ហើយថា វិធានការទាំងឡាយនោះ គឺធ្វើឡើងដើម្បីការពារសន្តិភាព និងសន្តិសុខរបស់ប្រទេសជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ