ទណ្ឌិតជាង៥០០នាក់ នឹងត្រូវស្នើសុំលើកលែងនិងបន្ធូរបន្ថយទោស នៅក្នុងពិធីបុណ្យអុំទូកឆ្នាំនេះ
យ៉ាងហោចណាស់មានទណ្ឌិតចំនួន៥៣២នាក់ នឹងត្រូវស្នើសុំលើកលែង និងបន្ធូបន្ថយទោស នៅក្នុងឱកាសនៃព្រះរាជពិធីបុណ្យអុំទូក បណ្តែតប្រទីប និងអកអំបុកសំពះព្រះខែ នៅពាក់កណ្តាលខែវិច្ឆិកាខាងមុខនេះ។ បញ្ជីឈ្មោះទណ្ឌិតទាំងនេះ ត្រូវបានស្នើមកគណៈកម្មការថ្នាក់ជាតិប្រជុំសម្រេចកាលពីថ្ងៃពុធ។ ប៉ុន្តែបញ្ជីឈ្មោះទាំងនេះ នឹងត្រូវឆ្លងកាត់ការយល់ព្រមពីលោកនាយករដ្ឋមន្ត្រី ហ៊ុន សែន ជាមុនសិន មុននឹងបញ្ជូនទៅកាន់ព្រះមហាក្សត្រដើម្បីឡាយព្រះហត្ថលេខា។
ចុះផ្សាយនៅថ្ងៃ៖
ស្តាប់ - ០៣:០៣
ផ្អែកតាមបញ្ជីឈ្មោះដែលបានស្នើសុំបន្ធូរបន្ថយនិងលើកលែងទោស ដែលត្រូវបានបញ្ជូនមកគណៈកម្មការជាតិ កាលពីថ្ងៃពុធ ទី៣១ តុលា យ៉ាងហោចណាស់មានទណ្ឌិតចំនួន៥៣២នាក់ នឹងត្រូវស្នើសុំលើកលែង និងបន្ធូបន្ថយទោស នៅក្នុងឱកាសនៃពិធីបុណ្យអុំទូក បណ្តែតប្រទីប និងអកអំបុក សំពះព្រះខែ នៅក្នុងឆ្នាំនេះ។ ក្នុងចំណោមទណ្ឌិតទាំង ៥៣២នាក់នោះ មានស្រីចំនួន៣៧នាក់ មកពីពន្ធនាគារ ខេត្ត-ក្រុង ចំនួន២៤ និងមណ្ឌលអប់រំកែប្រែចំនួន៤។ នេះបើតាមការបញ្ជាក់ពីមន្ត្រីជាន់ខ្ពស់ក្រសួងយុត្តិធម៌ ខណៈដែលគណៈកម្មការថ្នាក់ជាតិត្រួតពិនិត្យការបន្ធូរបន្ថយនិងលើកលែងទោស ដឹកនាំដោយលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ បានបើកកិច្ចប្រជុំដើម្បីពិនិត្យកាលពីថ្ងៃទី៣១តុលា។
ការស្នើសុំលើកលែង និងបន្ធូរបន្ថយទោសទណ្ឌិត នឹងផ្អែកលើគោលការណ៍មនុស្សធម៌ ដល់ទណ្ឌិតណាដែលមានអាយុចាប់ពី៦៥ឆ្នាំឡើងទៅ ទណ្ឌិតដែលមានជំងឺធ្ងន់ធ្ងរប្រចាំខ្លួននៅក្នុងពន្ធនាគារ ទណ្ឌិតជាស្រ្តីដែលមានកូននៅក្នុងពន្ធនាគារ និងទណ្ឌិតដែលគោរពបាននូវគោលការណ៍ច្បាប់ ដោយការអនុវត្តទោសបាន២ភាគ៣ នឹងទទួលបានការលើកលែងទោស និងអនុវត្តទោសបាន១ភាគ៣ នឹងទទួលបានការបន្ធូរបន្ថយទោសជាដើម។ យ៉ាងណាក៏ដោយ លោក គឹម សន្តិភាព អ្នកនាំពាក្យក្រសួងយុត្តិធម៌បានអះអាងថា បញ្ជីឈ្មោះទណ្ឌិតទាំង៥៣២នាក់នេះ គ្រាន់តែបញ្ជីឈ្មោះដែលបញ្ជូនមកពីពន្ធនាគារនៅទូទាំងប្រទេសប៉ុណ្ណោះ។ ការសម្រេចយ៉ាងណានោះ គឺអាស្រ័យលើការពិនិត្យនិងវាយតម្លៃពីគណៈកម្មការថ្នាក់ជាតិ ដែលកំពុងសិក្សានិងស្រាវជ្រាវទៅលើប្រវត្តិរបស់ទណ្ឌិតនីមួយៗ។ តាមគោលការណ៍ច្បាប់ បញ្ជីឈ្មោះទណ្ឌិតដែលសម្រេចពីគណៈកម្មការថ្នាក់ជាតិ នឹងត្រូវបញ្ជូនទៅកាន់លោកនាយករដ្ឋមន្ត្រី ហ៊ុន សែន សម្រេច មុនបញ្ជូនទៅកាន់ព្រះមហាក្សត្រ ដើម្បីឡាយព្រះហត្ថលេខា។
គួររំឭកជូនថា ទណ្ឌិតដែលបានកែប្រែខ្លួន បានទទួលឱកាសទទួលបានការលើកលែងនិងបន្ធូរបន្ថយទោស នៅក្នុងពិធីបុណ្យជាតិធំៗចំនួន៣ គឺនៅក្នុងពិធីបុណ្យចូលឆ្នាំម្តង ពិធីបុណ្យវិសាខបូជាម្តង និងពិធីបុណ្យអុំទូកម្តងទៀត។ ប៉ុន្តែអ្វីដែលចម្លែកនៅឆ្នាំនេះ មន្ត្រីជាន់ខ្ពស់ក្រសួងយុត្តិធម៌ បានអះអាងថា កម្ពុជានឹងបន្ថែមឱកាសក្នុងការស្នើសុំបន្ធូរបន្ថយនិងលើកលែងទោសដល់ទណ្ឌិតកម្ពុជាចំនួនបីបន្ថែមទៀត គឺនៅក្នុងឱកាសនៃពិធីភ្ជុំបិណ្ឌ ពិធីបុណ្យឯករាជ្យជាតិ៩វិច្ឆិកា និងទិវាឈ្នះឈ្នះ២៩ធ្នូ ដែលរដ្ឋាភិបាលគ្រោងនឹងប្រារព្ធធ្វើឡើងនៅចុងឆ្នាំនេះ។
លោក អ៊ូ ចន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិបានអំពាវនាវនៅក្នុងឱកាសនេះ ឲ្យរដ្ឋាភិបាលកម្ពុជា ពិចារណាក្នុងការលើកលែង និងបន្ធូបន្ថយទោសដល់សមាជិកអតីតគណបក្សសង្គ្រោះជាតិ ដែលកំពុងជាប់ពន្ធនាគារ ក្នុងនោះរួមមាន លោក ចៅ វាសនា អតីតចៅសង្កាត់ប៉ោយប៉ែត ដែលកំពុងធ្លាក់ខ្លួនឈឺនៅក្នុងពន្ធនាគារផងដែរ។ ការស្នើសុំលើកលែង និងបន្ធូរបន្ថយទោសដល់ទណ្ឌិតកម្ពុជានៅក្នុងឱកាសនៃពិធីបុណ្យអុំទូកឆ្នាំនេះ បានធ្វើឡើងខណៈមានរបាយការណ៍ថា ចំនួនអ្នកជាប់ឃុំនៅក្នុងពន្ធនាគារនៅកម្ពុជា បានកើនឡើងដល់កម្រិតខ្ពស់ ដែលមិនធ្លាប់មានពីមុនមក។ សូមបញ្ជាក់ថា បច្ចុប្បន្ននេះ កម្ពុជាមានទណ្ឌិតប្រមាណជាង៣ម៉ឺននាក់ (៣១.២២៦នាក់) កំពុងជាប់ពន្ធនាគារនៅទូទាំងប្រទេស ក្នុងនោះ មានស្ត្រីចំនួនជាង២ពាន់នាក់ (២.៦៦៣នាក់)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ