សមាគមអ្នកកាសែតមួយ ប្រកាសបង្កើតគណៈកម្មាធិការ វាយតម្លៃលើសេរីភាពសារព័ត៌មាននៅកម្ពុជា
សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) ទើបតែបានប្រកាសពីការផ្ដួចផ្ដើមគំនិតបង្កើត «គណៈកម្មាធិការកម្ពុជា វាយតម្លៃសេរីភាពសារព័ត៌មាន» ហៅកាត់ថា «ស៊ីម៉ា»។ គណៈកម្មាធិការនេះ គឺជាយន្ដការថ្មីមួយ ដែលនឹងដើរតួនាទីក្នុងការឃ្លាំមើល និងសរសេររបាយការណ៍វាយតម្លៃ អំពីស្ថានភាពនិងលំហរសេរីភាពសារព័ត៌មាននៅក្នុងប្រទេសកម្ពុជា។ ប៉ុន្តែសម្រាប់ប្រធានក្លិបអ្នកកាសែតនៅកម្ពុជាខ្លះ ហាក់នៅអល់អែកក្នុងការចូលរួមនៅឡើយ។
ចុះផ្សាយនៅថ្ងៃ៖
ស្តាប់ - ០២:២២
បើតាមសេចក្តីប្រកាសព័ត៌មាន យន្តការថ្មីនេះ ត្រូវបានផ្តួចផ្តើមបង្កើតឡើង ដើម្បីវាយតម្លៃខ្លួនឯង និងដើម្បីឆ្លុះបញ្ចាំងពីខ្លួនឯង ហើយហ៊ានទទួលស្គាល់ការពិតដើម្បីកែលម្អ ក៏ដូចជា ស្នើសុំផ្នែកពាក់ព័ន្ធឲ្យចូលរួមកែលម្អរទាំងអស់គ្នា ដើម្បីធ្វើឲ្យគុណភាពសារព័ត៌មានកាន់តែប្រសើរឡើង។ បន្ថែមលើនេះ ការបង្កើតយន្តការនេះឡើង ក៏ដើម្បីកុំឲ្យកម្ពុជារងចាំតែការផ្តល់ចំណាត់ថ្នាក់ពីអង្គការបរទេស ហើយធ្វើឲ្យអ្នកកាសែតនៅក្នុងប្រទេសចែកនិន្នាការគ្នា។ នេះបើតាមការបញ្ជាក់បន្ថែមពីលោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា (ស.ស.ស.ក)។
លោក ប៉ែន បូណា ប្រធានក្លិបអ្នកកាសែតកម្ពុជានៅមិនទាន់មានអត្ថាធិប្បាយច្រើនជុំវិញការបង្កើតគណៈកម្មាធិការនេះនៅឡើយទេ ប៉ុន្តែជាទូទៅ ក្នុងនាមក្លិបអ្នកកាសែតកម្ពុជា លោកបានស្វាគមន៍ចំពោះគំនិតផ្តួចផ្តើមនេះ។ ហើយប្រសិនបើត្រូវបានអញ្ជើញឲ្យចូលរួមនៅក្នុងគណៈកម្មាធិការនេះ លោកស្នើសុំឲ្យមានការបង្កើតយន្តការមួយ ដើម្បីធានាឲ្យមានការជឿទុកចិត្តទៅលើការស៊ើបអង្កេត និងការសរសេររបាយការណ៍ដែលចេញដោយគណៈកម្មាធិការនេះ។ ចំណែកលោក ម៉ៃ ទិត្យថារ៉ា ប្រធានសម្ព័ន្ធអ្នកសារព័ត៌មានកម្ពុជា ហៅកាត់ថា (Cambo Ja) ដែលជាសមាគមអ្នកកាសែតទើបបង្កើតឡើងថ្មីៗនេះ បានថ្លែងស្វាគមន៍ចំពោះគំនិតផ្តួចផ្តើមនេះដែរ។ ប៉ុន្តែសម្រាប់លោក ថារ៉ា សំខាន់គេត្រូវមើលពីសមាសភាពនៅក្នុងគណៈកម្មាធិការនេះថា មកពីសមាសភាពណាខ្លះ? ហើយថា តើគណៈកម្មាធិការនេះ នឹងហ៊ានសរសេរការពិតដែលឬទេ?
បើតាមសេចក្តីប្រកាសព័ត៌មាន គណៈកម្មាធិការកម្ពុជា វាយតម្លៃសេរីភាពសារព័ត៌មាន នេះ ត្រូវបានបង្កើតឡើង ដោយផ្តើមចេញពីលទ្ធផលសមាជលើកទី២របស់ សហភាពសហព័ន្ធអ្នកសារព័ត៌មានកម្ពុជា កាលពីថ្ងៃទី ១២ ខែតុលា ឆ្នាំ២០១៩ ហើយត្រូវបានទទួលការគាំទ្រពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មានកម្ពុជាផងដែរ។ សម្រាប់សហភាពសហព័ន្ធអ្នកសារព័ត៌មានកម្ពុជា នេះគឺជាលើកដំបូង ក្នុងប្រវត្តិសាស្រ្តនៃវិស័យសារព័ត៌មាននៅប្រទេសកម្ពុជា ដែលរៀបចំបង្កើតយន្តការនេះឡើង។ កន្លងមក មានតែអង្គការអ្នកកាសែតគ្មានព្រំដែន (RSF) និងអង្គការ Freedom House ប៉ុណ្ណោះដែលតែងតែផ្តល់ចំណាត់ថ្នាក់សេរីភាពសារព័ត៌មាននៅក្នុងពិភពលោក ក្នុងនោះរួមទាំងកម្ពុជាផងដែរ។
យ៉ាងណាក្តី លោក ណុប វី នាយកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យហៅកាត់ថា CCIM បានចោទសួរដែរថា តើគណៈកម្មាធិការនេះ នឹងហ៊ានសរសេរការពិតដែរឬទេ? ហើយថា តើរបាយការណ៍ដែលសរសេរឡើងដោយគណៈកម្មាធិការនេះ អាចជឿទុកចិត្តកម្រិតណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ