និស្សិតមួយក្រុម បន្តបរាជ័យសុំឲ្យលោកកឹម សុខា បកស្រាយរឿងអាស្រូវស្នេហា
នៅព្រឹកថ្ងៃសៅរ៍នេះ យុវជនមួយក្រុមប្រមាណ៥០នាក់ដែលបានអះអាងខ្លួនឯងថា ជានិស្សិតនៅតាមបណ្តាសាកលវិទ្យាល័យនានានៅក្នុងទីក្រុងភ្នំពេញ បានបន្តទៅរំខានលោកកឹម សុខា ដល់ខេត្តព្រះសីហនុ ដែលប្រធានស្តីទីគណបក្សប្រឆាំងរូបនេះត្រូវធ្វើវេទិកាសាធារណៈជាមួយអ្នកគាំទ្ររបស់ខ្លួននៅទីនោះ។ គោលបំណងរបស់ក្រុមនេះ គឺទាមទារឲ្យលោកកឹម សុខា បកស្រាយពីការពិតរឿងខ្សែអាត់សំឡេងដែលគេសង្ស័យថា ជាសំឡេងសារសងស្នេហារវាងរូបលោក និង ស្រីកំណាន់។ ប៉ុន្តែគោលបំណងរបស់ពួកគេទាំងនោះ មិនបានសម្រេចនោះទេ។
ចុះផ្សាយនៅថ្ងៃ៖
ស្តាប់ - ០២:០៦
ក្រុមយុវជនទាំងនេះ បានទៅប្រមូលគ្នានៅក្បែរវេទិការបស់លោកកឹម សុខា ប្រធានស្តីទីគណបក្សសង្រ្គោះជាតិតាំងពីលោកមិនទាន់ទាំងទៅដល់ទីនោះផង។ តែទោះជាយ៉ាងណា ពួកគេត្រូវបានរារាំងដោយក្រុមយុវជនគណបក្សសង្រ្គោះជាតិ និង កងអង្គរក្ស មិនឲ្យបានជួបជាមួយលោកកឹម សុខា នៅពេលដែលប្រធានស្តីទីគណសង្រ្គោះជាតិទៅដល់វេទិកានោះឡើយ។ នៅក្នុងការរារាំងនោះ លោកជា ប៉ូច តំណាងរាស្រ្តគណបក្សសង្រ្គោះជាតិប្រចាំខេត្តកំពត ក៏បានចូលរួមសម្របសម្រួលដោយកុំឲ្យពួកគេរំខានដល់វេទិកាគណបក្សប្រឆាំង។
ទោះជាបែបនេះក្តី លោកប៉េង ភីរ៉េន អ្នកដឹកនាំក្រុមយុវជនទាំងនេះ បានថ្លែងប្រាប់វិទ្យុបារាំងអន្តរជាតិថា នៅក្នុងការរារាំងនោះ ក្រុមរបស់លោកចំនួន៣នាក់បានរងរបួសស្រាល ហើយអ្នកដឹកនាំក្រុមចំនួន៥នាក់ទៀតត្រូវបានកងអង្គរក្សលោកកឹម សុខា ចាប់ខ្លួនបង្ឃាំទុកនៅក្នុងវេទិកាក្នុងអំឡុងពេលដែលលោកកឹម សុខាកំពុងថ្លែងសារនយោបាយទៅកាន់អ្នកគាំទ្រ។ ផ្ទុយទៅវិញ លោកយ៉ែម បុញ្ញឫទ្ធិ អ្នកនាំពាក្យគណបក្សសង្រ្គោះជាតិបានបញ្ជាក់ប្រាប់វិទ្យុបារាំងអន្តរជាតិដែរថា លោកមិនបានសង្កេតឃើញហេតុការណ៍បែបនោះកើតឡើងនោះទេ។ ប៉ុន្តែអ្នកនាំពាក្យរូបនេះ បានសង្កេតឃើញថា ក្រុមយុវជនដែលទៅទាមទារឲ្យលោកកឹម សុខា បកស្រាយការពិតនោះ ខ្លះបានអង្គុយនៅក្នុងវេទិកា និង ខ្លះទៀត ស្ថិតនៅខាងក្រៅវេទិកា។
យ៉ាងណាក៏ដោយ វេទិកាជួបជាមួយសកម្មជន និង អ្នកគាំទ្ររបស់គណបក្សប្រឆាំងនៅក្នុងខេត្តព្រះសីហនុ បានប្រព្រឹត្តទៅដោយរលូនដដែល។ សូមបញ្ជាក់ថា សកម្មភាពតវ៉ារបស់ក្រុមយុវជនដែលអះអាងថា ជានិស្សិតនៅក្នុងទីក្រុងភ្នំពេញនៅពេលនេះ គឺជាលើកទីពីរហើយក្នុងការទាមទារឲ្យលោកកឹម សុខា បកស្រាយការពិតពីរឿងខ្សែអាត់សំឡេងដែលគេសង្ស័យថា ជាសំឡេងសារសងស្នេហារវាងរូបលោក និង ស្រីកំណាន់។ កាលពីម្សិលមិញ ក្រុមនេះ ក៏បានទៅតវ៉ានៅពីមុខទីស្នាក់ការគណបក្សសង្រ្គោះជាតិក្នុងរាជធានីភ្នំពេញម្តងរួចមកហើយ។
ទោះបីពេលនេះ ការទាមទាររបស់ខ្លួនមិនបានសម្រេច ប៉ុន្តែក្រុមយុវជនទាំងនេះ បានអះអាងថា នឹងនៅតែតវ៉ាជាបន្តទៀត រហូតទាល់តែលោកកឹម សុខា ចេញមុខមកបកស្រាយការពិតអំពីរឿងនេះ។ ប៉ុន្តែលោក កឹម សុខា បានអះអាងក្រោយការបែកធ្លាយខ្សែអាត់សំឡេងនោះថា គណបក្សរបស់លោកមិនចាប់អារម្មណ៍នោះទេ ព្រោះថា គណបក្សផ្តោតតែទៅលើយុទ្ធនាការបោះឆ្នោតក្រុមប្រឹក្សាឃុំ សង្កាត់ ឆ្នាំ២០១៧ និងការបោះឆ្នោតជាតិនៅឆ្នាំ២០១៨តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ