លោក ហ៊ុន សែន អំពាវនាវឲ្យពលរដ្ឋ ចូលរួមទប់ទល់រាល់ឧបាយកល និងការប៉ុនប៉ងឱ្យកម្ពុជាធ្លាក់ក្នុងភាពវឹកវរជាថ្មី
លោកនាយករដ្ឋមន្រ្តី ហ៊ុន សែន តាមរយៈសារលិខិតចុះថ្ងៃទី ២១ កញ្ញា នាឱកាសទិវាសន្តិភាពអន្តរជាតិ បានអំពាវនាវឲ្យប្រជាពលរដ្ឋខ្មែរ ចូលរួមក្នុងការថែរក្សាសន្តិភាព ពង្រឹងឯកភាពជាតិ អនុវត្តវប្បធម៌សន្ទនា។ ជាពិសេសចូលរួមដោះស្រាយបញ្ហាដោយសន្តិវិធី និងទប់ស្កាត់រាល់ឧបាយកល រួមទាំងការប៉ុនប៉ងគ្រប់រូបភាពដែលធ្វើឲ្យកម្ពុជា ធ្លាក់ក្នុងសភាពវឹកវរ និងអស្ថេរភាព។
ចុះផ្សាយនៅថ្ងៃ៖
ស្តាប់ - ០២:១៩
នៅក្នុងសារលិខិតដដែលនេះ លោកនាយករដ្ឋមន្រ្តី ហ៊ុន សែន បានបន្តលើកឡើងពីជំហររបស់កម្ពុជា ក្នុងកិច្ចខិតខំប្រឹងប្រែងលើកកម្ពស់លទ្ធិប្រជាធិបតេយ្យប្រកបដោយសន្តិភាព ផ្អែកតាមគោលការណ៍គោរពនីតិរដ្ឋ។ ព្រមជាមួយនឹងការ ប្រកាន់ខ្ជាប់របស់កម្ពុជានូវគោលការណ៍ជាសកលនៃការគោរពសិទ្ធិមនុស្សជាមូលដ្ឋាន។
លោក ហ៊ុន សែន ក៏បានលើកឡើងពីចេតនាក្នុងការទប់ស្កាត់រាល់សកម្មភាព ល្បិចកិច្ចកល ការជ្រៀតជ្រែកកិច្ចការផ្ទៃក្នុង ការអុចអាល រើសអើងពូជសាសន៍ ដែលអាចបង្កហិង្សា ការបះបោរ និងបំបែកបំបាក់សាមគ្គីភាពជាតិក្រោមផ្លាកលទ្ធិប្រជាធិបតេយ្យ និងសិទ្ធិមនុស្ស និងបរទេសដែលចង់ផ្លាស់ប្តូររាជរដ្ឋាភិបាលស្របច្បាប់។ នៅក្នុងសារលិខិតចុះថ្ងៃទី ២១ កញ្ញា ដដែល ក៏បានលើកឡើងផងដែរ ការរិះគន់ មួលបង្កាច់រដ្ឋាភិបាលដោយឥតឈប់ឈរ ដែលលោក នាយករដ្ឋមន្រ្តី ហ៊ុន សែន ហៅថាជាការធ្វើឡើងដោយលំអៀង និងមើលលើហេតុការណ៍តែមួយជ្រុង និងការបន្តទាមទារលទ្ធិប្រជាធិបតេយ្យផ្ទុយនឹងគោលការណ៍នីតិរដ្ឋ។
លោក ហ៊ុន សែន បន្តប៉ាន់ស្មានថា បើសកម្មភាពដែលបានរៀបរាប់ខាងលើនេះ នៅតែបន្តកើតឡើងនោះ វាអាចនឹងបំផ្លិចបំផ្លាញសន្តិភាពដែលកម្ពុជា ទើបតែបានស្គាល់មិនដល់ទសវត្សរ៍ផងនោះ ឲ្យរលាយសាបសូន្យ ដូចជាករណីប្រទេសមួយចំនួនដែលធ្លាក់ចូលទៅក្នុងភ្លើងសង្គ្រាមដោយសារតែបដិវត្តន៍ពណ៍ ដែលជ្រកក្រោមស្លាកលទ្ធិប្រជាធិបតេយ្យ។
ជាការកត់សម្គាល់ការថ្លែងសាររបស់ប្រមុខរដ្ឋាភិបាលកម្ពុជា នាឱកាសទិវាសន្តិភាពអន្តរជាតិយ៉ាងដូច្នេះ ធ្វើឡើងបន្ទាប់ពីប្រតិកម្មពីបក្សប្រឆាំង អង្គការសង្គមស៊ីវិល ស្ថានទូតនានាប្រចាំនៅកម្ពុជា និងសហគមន៍អន្តរជាតិ បានធ្លាក់មកជាបន្តបន្ទាប់ ក្រោយការវិវត្តន៍ស្ថានការណ៍ចុងក្រោយថ្មីៗនៅកម្ពុជា។ មានជាអាថ៍ ការចាប់ខ្លួន លោក កឹម សុខា ប្រធានគណបក្សសង្រ្គោះជាតិ ការបិទវិទ្យុក្នុងស្រុកមួយចំនួនដែលផ្សាយបន្តកម្មវិធីវិទ្យុអាស៊ីសេរី និងវិទ្យុសម្លេងសហរដ្ឋអាមេរិក ការបិទកាសែតThe Cambodia Daily ដែលមានអាយុកាលជិត ២៥ ឆ្នាំ និងការបិទវិទ្យាស្ថានជាតិប្រជាធិបតេយ្យ NDI ជាដើម។
សូមជម្រាបជូនផងដែរថា ទិវាសន្តិភាពអន្តរជាតិ ត្រូវបានប្រារព្ធទូទាំងពិភពលោកនៅថ្ងៃទី២១ កញ្ញា ជារៀងរាល់ឆ្នាំ បន្ទាប់ពីមានការអនុម័តដោយមហាសន្និបាតអង្គការសហប្រជាជាតិលើកទី៥៥ កាលពីឆ្នាំ២០០១ ដើម្បីលុបបំបាត់អំពើហិង្សា បញ្ឈប់សង្រ្គាម ជម្រុញឲ្យមានសន្តិភាពក្នុងប្រទេស តំបន់ ក៏ដូចជាពិភពលោកទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ