លោក ហ៊ុន សែន ប្រាប់អង្គការសហប្រជាជាតិថា ប្រទេសមានអំណាចយកសិទ្ធិមនុស្សជាឧបករណ៍នយោបាយ
ដូចការគ្រោងទុក នៅថ្ងៃទី០៤កក្កដានេះ លោកនាយករដ្ឋមន្ដ្រី ហ៊ុន សែន បានឡើងថ្លែងសុន្ទរកថាពីស្ថានភាពសិទ្ធិមនុស្សនៅកម្ពុជា ក្នុងកិច្ចប្រជុំលើកទី៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ប្រទេសស្វីស។ ក្រៅពីលើកឡើងអំពីការវិវត្តផ្នែកសិទ្ធិមនុស្សនៅកម្ពុជា លោក ហ៊ុន សែន បានឆ្លៀតឱកាសនោះ សង្កត់ធ្ងន់បន្ថែមថា បញ្ហាសិទ្ធិមនុស្ស នាពេលបច្ចុប្បន្ននេះ បានក្លាយទៅជាឧបករណ៍នយោបាយ ឬជាលេស ដែលប្រទេសមានអំណាចនិងស្ថាប័នមួយចំនួនប្រើប្រាស់ សម្រាប់លូកដៃជ្រៀតជ្រែកលើអធិបតេយ្យភាព និងឯករាជ្យភាពរបស់ប្រទេសទន់ខ្សោយ។
ចុះផ្សាយនៅថ្ងៃ៖
ស្តាប់ - ០២:០១
ជាប្រទេសមួយធ្លាប់ហែលឆ្លងកាត់របបមួយដែលមិនផ្ដល់សិទ្ធិអ្វីទាំងអស់ដល់ប្រជាជន កម្ពុជា ពិតជាត្រូវការណាស់ នូវសិទ្ធិគ្រប់យ៉ាង។ នេះគឺជាអ្វីដែលប្រមុខរដ្ឋាភិបាលកម្ពុជា លោក ហ៊ុន សែន ថ្លែងប្រាប់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ ក្នុងសុន្ទរកថាគន្លឹះ នៅថ្ងៃទី០៤កក្កដានេះ។
នៅក្នុងបញ្ហាសិទ្ធិមនុស្ស លោក ហ៊ុន សែន បានគូសពីបញ្ជាក់ពីជំហរបស់កម្ពុជាថា នឹងបន្តប្ដេជ្ញាពង្រឹងកិច្ចសហប្រតិបត្តិការយ៉ាងជិតស្និទ្ធ ជាមួយដៃគូពាក់ព័ន្ធ ដើម្បីជំរុញលើកកម្ពស់ និងការពារសិទ្ធិមនុស្សឲ្យបានកាន់តែប្រសើរថែមទៀត។
ប៉ុន្តែទន្ទឹមគ្នានេះ នាយករដ្ឋមន្ដ្រីកម្ពុជា បានគូសបញ្ជាក់ថា បញ្ហាសិទ្ធិមនុស្ស នាពេលបច្ចុប្បន្ននេះ ត្រូវបានប្រទេសនិងស្ថាប័នមួយចំនួន យកទៅធ្វើជាចំណាប់ខ្មាំង ទាក់ទងនឹងការផ្ដល់ជំនួយ ឬការអនុគ្រោះផ្នែកសេដ្ឋកិច្ចដល់កម្ពុជា។ ប្រទេសមានអំណាចខ្លះទៀត បានយកបញ្ហាសិទ្ធិមនុស្សដដែលនេះ ទៅធ្វើជាឧបករណ៍នយោបាយ ជានិយាមប្រតិបត្តិថ្មី ឬជាលេស សម្រាប់រាល់ការលូកដៃជ្រៀតជ្រែកលើអធិបតេយ្យភាព និងឯករាជ្យភាពរបស់ប្រទេសទន់ខ្សោយ។
សម្រាប់លោក ហ៊ុន សែន ការគោរពចំពោះអធិបតេយ្យភាពជាតិ និងបូរណភាពទឹកដី ការមិនជ្រៀតជ្រែកកិច្ចការផ្ទៃក្នុងរបស់ប្រទេសនានា ភាពមិនលំអៀង និងមិនរើសអើង គប្បីត្រូវបានកំណត់ជាគោលការណ៍ណែនាំ ដែលទាំងប្រទេសតូចនិងប្រទេសធំ ត្រូវគោរពប្រតិបត្តិនៅក្នុងការខិតខំលើកកម្ពស់សិទ្ធិមនុស្ស។ លោកបន្តថា បញ្ហាសិទ្ធិមនុស្ស គួរតែត្រូវបានដោះស្រាយនៅក្នុងបរិការណ៍ពិភពលោក ដោយឈរលើអភិក្រមស្ថាបនា ប្រើប្រាស់ស្តង់ដារតែមួយ គ្មានការប្រឈមមុខដាក់គ្នា មិនពាក់ព័ន្ធនឹងរបៀបវារៈនយោបាយ និងផ្អែកលើកិច្ចសន្ទនា។ ប្រមុខដឹកនាំកម្ពុជា ស្នើឲ្យភាគីទាំងអស់ ពិនិត្យមើលបញ្ហាទាំងឡាយជាប្រព័ន្ធ។ ពោលគឺមើលព្រៃទាំងមូល ជាជាងមើលតែឈើមួយដើមៗ ដោយផ្សារភ្ជាប់ជាមួយរបៀបវារៈនយោបាយរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ