អង្គការ VSO កម្ពុជាដាក់ឲ្យដំណើរការគម្រោងតស៊ូមតិ និងអភិបាលកិច្ច ដែលមានទឹកប្រាក់ជិត ១លានអឺរ៉ូ
អង្គការVSO កម្ពុជា និងដៃគូមួយចំនួន បានសម្ពោធដំណើរការគម្រោង «ការពង្រឹងបណ្តាញអង្គការសង្គមស៊ីវិល ដើម្បីការអភិវឌ្ឍប្រកបដោយបរិយាប័ន្ន» នារសៀលថ្ងៃទី ៣០ ខែសីហានេះ នៅឯសណ្ឋាគារកាំបូឌីយ៉ាណា។ គម្រោងនេះ នឹងបង្កើនសមត្ថភាពលើការគ្រប់គ្រងស្ថាប័នបណ្តាញ ការកៀរគរធនធាន និងការតស៊ូមតិ ដើម្បីបង្កើតឲ្យមានលទ្ធផលកាន់តែទៅដល់ប្រជាពលរដ្ឋក្នុងខេត្តចំនួន ៨ នៃប្រទេសកម្ពុជា។ គម្រោងនេះមានរយៈពេល ៣០ខែ ហើយមានការគាំទ្រពីសហភាពអឺរ៉ុបប្រចាំកម្ពុជាផងដែរ។អត្តបទដោយ ហង់ យុត្តិវង្ស ចេមី៖
ចុះផ្សាយនៅថ្ងៃ៖
ស្តាប់ - ០២:០៤
លោក ង៉ាន់ ចំរើន អនុរដ្ឋលេខាធិការក្រសួងមហាផ្ទៃ បានមានប្រសាសន៍ថា ការចូលរួមរបស់សង្គមស៊ីវិល គឺពិតជាមានតម្លៃជាខ្លាំងសម្រាប់រាល់កិច្ចការទាំងអស់របស់រដ្ឋាភិបាល ហើយថាខាងសង្គមស៊ីវិលនេះក៏ជាចំណែកមួយក្នុងការចូលរួម ទាំងការអនុវត្ត និងការរៀបចំគោលនយោបាយថែមទៀតផង។ លោក ង៉ាន់ ចំរើន ក៏បានបញ្ជាក់ថាអង្គការវីអេសអូធ្លាប់មានបទពិសោធន៍ជាង ២០ឆ្នាំមកហើយ ទៅលើការធ្វើអភិបាលកិច្ចនេះ ដូចនេះហើយលោករំពឹងទុកយ៉ាងមុតមាំថា អង្គការនេះនឹងទទួលបានលទ្ធផលល្អប្រសើរ និងមានប្រសិទ្ធិភាពខ្ពស់។
ជាគោលការណ៍គម្រោងនេះមានរយៈពេល៣០ខែ នឹងអនុវត្តក្រោមការគាំទ្រពីតំណាងសហភាពអឺរ៉ុបប្រចាំកម្ពុជាផងដែរ។ លោកស្រី Fiona Ramsey ប្រធានផ្នែកសហប្រតិបត្តិការនៃតំណាងសហភាពអឺរ៉ុបប្រចាំកម្ពុជា បានមានប្រសាសន៍ថា លោកស្រីមានសេចក្តីសោមនស្សរីករាយជាខ្លាំង ដែលបានឃើញអង្គការវីអេសអូកម្ពុជា និងអង្គការមួយចំនួនទៀត ធ្វើការជាមួយគ្នាក្នុងការពង្រឹងបណ្តាញអង្គការសង្គមស៊ីវិល ហើយសិក្សាទៅលើវិធីសាស្រ្តក្នុងការបង្កើតឲ្យមាននូវនិរន្តភាពនៃបណ្តាញនីមួយៗ នៅថ្នាក់ក្រោមជាតិ លើធនធាន និងផលប៉ះបាល់ផងដែរ។
សូមបញ្ជាក់ថា គម្រោងនេះ នឹងផ្តល់ពង្រឹងបណ្តាញអង្គការសង្គមស៊ីវិល ដើម្បីក្លាយខ្លួនទៅជាតួអង្គសំខាន់ក្នុងការធ្វើឲ្យប្រសើរឡើងនូវអភិបាលកិច្ច និងគណនេយ្យភាព និងជម្រុញឲ្យមានការបង្កើតគោលនយោបាយប្រកបដោយបរិយាប័ន្ន។ មិនតែប៉ុណ្ណោះ គម្រោងនេះក៏នឹងបង្កើនសមត្ថភាពលើការគ្រប់គ្រងស្ថាប័នបណ្តាញ ការកៀរគរធនធាន និងការតស៊ូមតិ ដើម្បីបង្កើតឲ្យមានលទ្ធផលកាន់តែទៅដល់ប្រជាពលរដ្ឋក្នុងខេត្តចំនួន ៨ នៃប្រទេសកម្ពុជា រួមមានខេត្ត សៀមរាប កំពង់ធំ ព្រៃវែង ស្វាយរៀង ក្រចេះ ស្ទឹងត្រែង រតនគិរី និងខេត្តមណ្ឌលគិរីផងដែរ។
លោក Guillaume Sauval នាយកប្រចាំប្រទេសនៃអង្គការវីអេសអូកម្ពុជាបានឲ្យដឹងថា គោលបំណងសំខាន់សម្រាប់ការសម្ពោធនាថ្ងៃនេះ គឺចង់ចែករំលែកចំណេះដឹងទៅវិញទៅមក ដោយសារតែគម្រោងនេះបានចាប់ផ្តើមប៉ុន្មានខែរួចមកហើយ ទើបតែដល់ពេលនេះបានដាក់សម្ពោធជាផ្លូវការ ដូចនេះហើយគឺផ្តោតសំខាន់លើការចែករំលែកចំណេះដឹង និងបទពិសោធន៍ ក៏ដូចជា ជួយពង្រឹងដល់អង្គការសង្គមស៊ីវិលនៅតាមខេត្ត និងតាមមូលដ្ឋានផងដែរ។ គួរបញ្ជាក់ថា គម្រោងនេះនឹងចំណាយថវិកាប្រមាណជាង ៩០ម៉ឺនអឺរ៉ូ ហើយនឹងផ្តល់អត្ថប្រយោជន៍ដល់អង្គការសង្គមស៊ីវិលប្រមាណជាង ១០០អង្គការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ