អ្នកនាំពាក្យថា នាវាដឹកអាវុធកូរ៉េខាងជើងដែលដោតទង់ជាតិកម្ពុជា ជាការប្រើប្រាស់ខុសច្បាប់
បន្ទាប់ពីកាសែត Washington Post បានចុះផ្សាយអត្ថបទមួយនិយាយអំពីការចាប់ឃាត់ទុកនាវារបស់កូរ៉េខាងជើងដែលដោតទង់ជាតិកម្ពុជាកាលពីថ្ងៃទី០២ ខែតុលាដោយអាជ្ញាធរអេហ៊្សីប ហើយបានរកឃើញនូវកាំភ្លើងបាញ់រ៉ុកកែតជាង៣ម៉ឺនដើមនោះ ក្រសួងការបរទេសកម្ពុជាតាមរយៈអ្នកនាំពាក្យបានចេញប្រតិកម្មភា្លមៗតែម្តង។ អ្នកនាំពាក្យក្រសួងការបរទេសកម្ពុជា បានចាត់ទុកការប្រើប្រាស់ទង់ជាតិនៅលើនាវានោះថា ជាប្រើប្រាស់ខុសច្បាប់ ព្រោះថាកម្ពុជាបានបញ្ឈប់លែងឲ្យមាននាវាបរទេសប្រើប្រាស់ទង់ជាតិកម្ពុជាបែបនេះទៀតឡើយ។
ចុះផ្សាយនៅថ្ងៃ៖
ស្តាប់ - ០២:១៤
នៅក្នុងសេចក្តីបំភ្លឺរបស់ខ្លួនកាលពីថ្ងៃទី ០២ ខែតុលា ឆ្នាំ២០១៧ អ្នកនាំពាក្យក្រសួងការបរទេសកម្ពុជា បានគូសបញ្ជាក់ថា ដើម្បីការពារកិត្តិនាម និងកិត្តិយសនៃទង់ជាតិកម្ពុជា រដ្ឋាភិបាលកម្ពុជាបានសម្រេចបញ្ចប់កុងត្រាជាមួយក្រុមហ៊ុនចុះបញ្ជីនាវាអន្តរជាតិកម្ពុជាហៅកាត់ថា ISROC ក្នុងឋានៈជារដ្ឋបាលគ្រប់គ្រង់តែមួយនិងផ្តាច់មុខក្នុងការចុះបញ្ជីនាវានៅកម្ពុជា។ រដ្ឋាភិបាលកម្ពុជាក៏បានស្នើក្រុមហ៊ុនចុះបញ្ជីនាវាអន្តរជាតិកម្ពុជាបញ្ឈប់ការចុះបញ្ជីនាវាបំពាក់ទង់ជាតិកម្ពុជាតទៅទៀត។ អ្នកនាំពាក្យក្រសួងការបរទេសកម្ពុជាអះអាងដូចនេះដោយសំអាងទៅលើលិខិតរបស់ប្រធានគណៈកម្មាធិការគ្រប់គ្រងការចុះបញ្ជីនាវាសញ្ជាតិកម្ពុជាចុះថ្ងៃទី២៧ ខែសីហា ឆ្នាំ២០១៥ដែលបានជូនដំណឹងទៅកាន់ប្រធានក្រុមហ៊ុនចុះបញ្ជីនាវាអន្តរជាតិកម្ពុជា។
បន្ថែមលើនេះ អ្នកនាំពាក្យក្រសួងការបរទេសកម្ពុជា ក៏បានគូសបញ្ជាក់បន្ថែមទៀតដែរថា រដ្ឋាភិបាលកម្ពុជា បានសម្រេចបិទបញ្ឈប់ការចុះបញ្ជីនាវាចាប់ពីថ្ងៃទី១៧ ខែសីហា ឆ្នាំ២០១៥។ ប៉ុន្តែដើម្បីជាការសម្រួលដល់ម្ចាស់នាវាដែលនាវារបស់ខ្លួនមានវិញ្ញាបនប័ត្រចុះបញ្ជីជាមួយទង់ជាតិកម្ពុជានៅមានសុពលភាពនោះ រដ្ឋាភិបាលកម្ពុជាបានអនុញ្ញាតឲ្យនាវាទាំងនោះធ្វើប្រតិបត្តិការក្រោមទង់ជាតិកម្ពុជារហូតដល់ថ្ងៃវិញ្ញាបនប័ត្រអស់សុពលភាពនៅចុងខែសីហា ឆ្នាំ២០១៦។ ដូច្នេះបើតាមអ្នកនាំពាក្យក្រសួងការបរទេសកម្ពុជា នាវាទាំងឡាយណាដែលអះអាងថា ស្ថិតនៅក្រោមទង់ជាតិកម្ពុជាក្រោយថ្ងៃផុតសុពលភាពនេះ ត្រូវបានចាត់ទុកថា ខុសច្បាប់និងអាចត្រូវបានដាក់ទោសដោយច្បាប់ និងបទបញ្ញត្តិអន្តរជាតិ។
ការគូសបញ្ជាក់របស់ក្រសួងការបរទេសកម្ពុជានេះ ធ្វើឡើងក្រោយពីអាជ្ញាធរអេហ្ស៊ីបបានចាប់ឃាត់ទុកនាវាកូរ៉េខាងជើងមួយគ្រឿងឈ្មោះថា Jie Shun ដែលដោតទង់ជាតិកម្ពុជាធ្វើដំណើរចេញពីកូរ៉េខាងជើងឆ្ពោះសំដៅទៅកាន់ព្រែកជីកSuez។ អាជ្ញាធរអេហ្ស៊ីបបានរកឃើញនូវកាំភ្លើងបាញ់រ៉ុកកែតជាង៣ម៉ឺនដើមនៅក្នុងនាវានោះ។ នេះបើតាមចុះផ្សាយរបស់កាសែតWashington Post។ ប្រឈមនឹងបញ្ហានេះ អ្នកនាំពាក្យក្រសួងការបរទេសកម្ពុជា បញ្ជាក់ថា ការប្រើប្រាស់ទង់ជាតិកម្ពុជាដោយនាវាកូរ៉េខាងជើងនេះ ក៏ដូចជានាវាណាផ្សេងទៀតទាំងអស់ គឺជាការប្រើប្រាស់ដោយខុសច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ