វិស័យឯកជន៖ មានការប៉ះពាល់ការប្រកួតប្រជែង នៅពេលកម្ពុជាមានថ្ងៃឈប់សម្រាកច្រើន
ក្រសួងការងារកាលពីថ្ងៃអង្គារម្សិលមិញបានប្រកាសពីថ្ងៃឈប់សម្រាកថ្ងៃបុណ្យប្រចាំឆ្នាំសម្រាប់ឆ្នាំ២០១៩ ខាងមុខ ដោយមានសរុបចំនួន២៨ថ្ងៃ។ សេចក្តីប្រកាស ដែលមានចុះហត្ថលេខាដោយលោក អ៊ិត សំហេង រដ្ឋមន្ត្រីក្រសួងការងារ បញ្ជាក់ថា ប្រទេសកម្ពុជាមានថ្ងៃឈប់សម្រាកថ្ងៃបុណ្យ ដែលមានប្រាក់ឈ្នួលចាប់ពី១ថ្ងៃរហូតដល់៣ថ្ងៃ ស្ទើររៀងរាល់ខែក្នុងរយៈពេលពេញមួយឆ្នាំ លើកលែងតែខែសីហា និងកក្កដា ប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:០៦
តាមរយៈថ្ងៃឈប់សម្រាករយៈពេលជិត១ខែ ក្នុងមួយឆ្នាំបែបនេះ បានធ្វើឲ្យប្រទេសកម្ពុជាក្លាយជាប្រទេស ដែលមានថ្ងៃឈប់សម្រាកសាធារណៈ ដោយមានប្រាក់ឈ្នួល ច្រើនជាងគេបំផុតនៅលើពិភពលោក។ ក្នុងចំណោមថ្ងៃឈប់សម្រាកទាំងនេះ គឺថ្ងៃបុណ្យដែលមានទំនាក់ទំនងទៅនឹងពិធីបែបព្រះពុទ្ធសាសនាច្រើនជាងគេ។
គេហទំព័រ Worldatlas ដែលធ្វើការអង្កេតទាក់ទងទៅនឹងពេលវេលាឈប់សម្រាករបស់ប្រទេសនានានៅលើពិភពលោក បង្ហាញថាប្រទេសស្រីលង្ការជាប់ចំណាត់ថ្នាក់ទី២ បន្ទាប់ពីកម្ពុជា ដែលមានថ្ងៃឈប់សម្រាកប្រចាំឆ្នាំចំនួន២៥ថ្ងៃ បន្ទាប់មកប្រទេសឥណ្ឌា និងការហ្សាស្ថាន ២១ថ្ងៃ និងតាមពីក្រោយដោយប្រទេសកូឡំប៊ី ហ្វីលីពីន ទ្រីនីដាតនិងតូបាហ្គូ ចិន ថៃ តួកគី និងប៉ាគីស្ថាន ដែលប្រទេសទាំងនេះមានថ្ងៃឈប់សម្រាកប្រចាំឆ្នាំតែជាង១០ថ្ងៃប៉ុណ្ណោះ។
ទាក់ទងទៅនឹងថ្ងៃឈប់សម្រាកប្រចាំឆ្នាំច្រើនជាងគេបែបនេះ លោកកាំង ម៉ូនីកា អគ្គលេខាធិការរងសមាគមនិយោជករោងចក្រកាត់ដេរនៅកម្ពុជា(GMAC) បានថ្លែងថាចំនួនថ្ងៃសម្រាកដ៏ច្រើននេះ អាចធ្វើឲ្យប៉ះពាល់ដល់ការអភិវឌ្ឍសេដ្ឋកិច្ចរបស់ប្រទេសផងដែរ។ ប៉ះពាល់ដោយសារ ធ្វើឲ្យបាត់បង់ការប្រកួតប្រជែងរបស់វិស័យឯកជនជាពិសេសប៉ះពាល់ដល់វិស័យឧស្សាហកម្ម ដែលរោងចក្រ។
លោកផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរដ្ឋាភិបាលកម្ពុជា បានថ្លែងថា ការដែលបង្កើតឲ្យមានថ្ងៃឈប់សម្រាកជាបន្តបន្ទាប់ច្រើនក្នុងមួយឆ្នាំៗ គឺដោយសាររដ្ឋាភិបាលចង់ឲ្យមានការរំលឹកដល់ស្មារតីនៃពិធីនីមួយៗ។ ក៏ប៉ុន្តែលោកជឿថា រដ្ឋាភិបាលនឹងពិចារណា ប្រសិនបើមានស្ថាប័នណាមួយ សរសេរលិខិតស្នើសុំកាត់បន្ថយ ដោយមានហេតុផលត្រឹមត្រូវ។
ទោះយ៉ាងណា សមាគម GMAC កន្លងមកធ្លាប់បានត្អូញត្អែរផងដែរ ដោយស្នើសុំឲ្យមានការកាត់ចោលចំនួនថ្ងៃឈប់សម្រាកខ្លះ ដើម្បីបង្កើនផលិតភាពប្រទេសកម្ពុជាឡើងវិញ ខណៈដែលវិស័យឧស្សាហកម្មកាត់ដេរ សំខាន់សម្រាប់ប្រទេស និងមានការប្រកួតប្រជែងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ