ថ្ងៃសែនចូលឆ្នាំចិន ស្ថានភាពចរាចរណ៍នៅភ្នំពេញស្ងប់ស្ថាត់តែអាជ្ញាធរប្រាប់ឲ្យប្រុងប្រយ័ត្នរឿងអគ្គិភ័យ
ថ្ងៃព្រហស្បតិ៍នេះ គឺជាថ្ងៃសែននៃពិធីបុណ្យចូលឆ្នាំថ្មីប្រពៃណីចិនដែលនឹងធ្វើឡើងចាប់ពីថ្ងៃទី១៥ដល់ថ្ងៃទី១៨ ខែកុម្ភៈ ឆ្នាំ២០១៨។ តាមការសង្កេត នៅព្រឹកនេះស្ថានភាពចរាចរណ៍នៅក្នុងទីក្រុងភ្នំពេញហាក់មានសភាពស្ងប់ស្ងាត់ជាងធម្មតា។ នេះអាចដោយសារតែពលរដ្ឋខ្មែរកាត់ចិនខ្លះរៀបចំសែននៅក្នុងគេហដ្ឋានរៀងៗខ្លួន ហើយខ្លះទៀតធ្វើដំណើរទៅស្រុកកំណើតដើម្បីសែនរួមគ្នាជាមួយក្រុមគ្រួសារ។ តែយ៉ាងណាក៏ដោយ អាជ្ញាធរបានដាស់តឿនដល់ពលរដ្ឋខ្មែរទាំងអស់ឲ្យមានការប្រុងប្រយ័ត្នលើបញ្ហាអគ្គិភ័យ។
ចុះផ្សាយនៅថ្ងៃ៖
ស្តាប់ - ០២:១៨
នៅក្នុងឱកាសនៃពិធីបុណ្យចូលឆ្នាំថ្មីប្រពៃណីចិន-វៀតណាមនេះ សាលារាជធានីភ្នំពេញបានហាត់ឃាត់ដាច់ខាតលើបញ្ហាបីចំណុច។ ទីមួយ គឺមិនឲ្យមានការដុតបាវ កាំជ្រួចឬបង្កសំឡេងផ្ទុះគ្រប់ប្រភេទនៅក្នុងឱកាសនៃពិធីបុណ្យនេះ។ ទីពីរ គឺមិនឲ្យលេងល្បែងគ្រប់ប្រភេទដែលមានលក្ខណៈស៊ីសង និងទីបី គឺរាល់ការហែក្បួនផ្សេងៗទាំងបែបសាសនាឬប្រពៃណីដែលគ្មានការអនុញ្ញាតត្រូវហាមឃាត់។ នេះបើតាមសេចក្តីណែនាំស្តីពីការរៀបចំសន្តិសុខ សណ្តាប់ធ្នាប់ និងរបៀបរៀបរយសាធារណៈក្នុងឱកាសនៃពិធីបុណ្យចូលឆ្នាំថ្មីប្រពៃណីចិន និងវៀតណាមរបស់សាលារាជធានីភ្នំពេញចុះថ្ងៃទី៨ កុម្ភៈកន្លងទៅ។
ក្រៅពីវិធានការហាមផ្តាច់ទាំងនេះ សាលារាជធានីភ្នំពេញក៏បានធ្វើការណែនាំដល់មន្ទីរ អង្គភាព ខណ្ឌ សង្កាត់ សមាគម ក្រុមហ៊ុនឯកជន អង្គការក្រៅរដ្ឋាភិបាល និងសាធារណជនផងដែរដូចជា នៅគ្រប់ទីកន្លែងកំសាន្តសប្បាយនានា មន្ទីរអង្គភាព រោងចក្រ សហគ្រាស គេហដ្ឋាន ត្រូវរក្សា សន្តិសុខ សុវត្ថិភាព សណ្តាប់ធ្នាប់សាធារណៈ សេចក្តីថ្លៃថ្នូរ និងត្រូវប្រុងប្រយ័ត្នក្នុងការអុជទៀនធូប ក្រដាសសែន ភ្លើងចង្រ្កាន្ត ចរន្តអគ្គីសនី ដែលអាចបង្កឲ្យមានគ្រោះអគ្គីភ័យកើតឡើងដោយយថាហេតុ។ ចំណែកការដុតក្រដាសសែនវិញ សាលារាជធានីភ្នំពេញ តម្រូវឲ្យប្រើធុងដែកឬឆ្នាំងដី ដើម្បីដុត ដោយហាមដាច់ខាតមិនឲ្យដុតលើចិញ្ចើមផ្លូវ ឬទ្រូងផ្លូវសាធារណៈ។
បន្ថែមលើនេះ សាលារាជធានីភ្នំពេញ ក៏បានបញ្ជាទៅកាន់អាជ្ញាធរគ្រប់លំដាប់ថ្នាក់ត្រូវចាត់វិធានការឲ្យម៉ឺងម៉ាត់កុំឲ្យមានការនាំចូលផាវ កាំជ្រួច ជាតិផ្ទុះគ្រប់ប្រភេទតាមច្រកចូលរាជធានីភ្នំពេញ និងត្រូវត្រួតពិនិត្យដកហូតវត្ថុទាំងនេះដែលមានតាំងលក់នៅគ្រប់ទីកន្លែងនៅក្នុងរាជធានីភ្នំពេញ។ ជាមួយគ្នានេះ សាលារាជធានីភ្នំពេញក៏បានព្រមានដល់សាធារណជនទាំងអស់ផងដែរ បើបំពានលើសេចក្តីណែនាំនេះនឹងត្រូវទទួលខុសត្រូវតាមច្បាប់។
សូមបញ្ជាក់ថា ពិធីបុណ្យចូលឆ្នាំថ្មីប្រពៃណីចិន និងវៀតណាម នឹងចាប់ផ្តើមឡើងពីថ្ងៃទី១៥ កុម្ភៈរហូតដល់ថ្ងៃទី១៨ ខែកុម្ភៈ ឆ្នាំ២០១៨។ នៅក្នុងឱកាសនៃពិធីបុណ្យចូលឆ្នាំចិននេះដែរ លោកនាយករដ្ឋមន្រ្តីហ៊ុន សែន ប្រមុខរដ្ឋាភិបាលកម្ពុជាក៏បានជូនពរដល់ពលរដ្ឋខ្មែរទាំងកាត់ចិន និងខ្មែរសុទ្ធទាំងអស់ឲ្យធ្វើដំណើរកំសាន្តជិតឆ្ងាយមានសុខសុវត្ថិភាព និងបានសប្បាយជួបជុំក្រុមគ្រួសារ។ លោកនាយករដ្ឋមន្រ្តី ក៏បានអំពាវនាវឲ្យពលរដ្ឋទាំងអស់ប្រុងប្រយ័ត្នភ្លើងអគ្គីភ័យដែលអាចបណ្តាលមកពីការដុតធូបទៀនដោយមិនបានប្រុងប្រយ័ត្នផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ