រង្វាន់ណូបែលគីមីវិទ្យាឆ្នាំ ២០១៩ បានប្រគល់ឲ្យអ្នកស្រាវជ្រាវ ៣នាក់សម្រាប់ស្នាដៃបង្កើតថ្មសាកធ្វើពី Lithium
នៅថ្ងៃពុធ ទី៩ តុលា គណៈកម្មការណូបែលក្នុងប្រទេសស៊ុយអែតបានសម្រេចប្រគល់រង្វាន់ណូបែលគីមីវិទ្យាឲ្យអ្នកស្រាវជ្រាវចំនួន ៣នាក់ គឺជនជាតិអាមេរិកាំងលោក John Goodenough ជនជាតិអង់គ្លេសលោក Stanley Whittingham និងជនជាតិជប៉ុនលោក Akira Yoshino។ ស្នាដៃរបស់អ្នកស្រាវជ្រាវទាំង ៣នាក់ គឺការបង្កើតថ្មសាក និងអាគុយសាកធ្វើពី Lithium។ ផលិផលទាំងពីរមុខនេះកំពុងពេញនិយមខ្លាំងនៅក្នុងបច្ចេកវិទ្យាពិភពលោកសព្វថ្ងៃ។ គួរជម្រាបថា ក្នុងចំណោមអ្នកស្រាវជ្រាវទាំង ៣នាក់ ជនជាតិអាមេរិកាំងលោក John Goodenough ដែលមានអាយុ ៩៧ឆ្នាំជាជ័យលាភីរង្វាន់ណូបែលដែលមានវ័យចំណាស់ជាងគេនៅប្រវត្តិរង្វាន់ណូបែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ប្រភេទថ្មសាក និងអាគុយសាកធ្វើពី Lithium ត្រូវបានគេយកទៅប្រើនៅសឹងគ្រប់ផ្នែកទាំងអស់ ពិសេសនៅក្នុងទូរស័ព្ទដៃ កុំព្យូទ័រ និងរថយន្តអគ្គិសនី។ គឺជាប្រភេទថ្ម និងអាគុយដែលមានទម្ងន់ស្រាល សាកបានច្រើនដង កាន់ភ្លើងបានយូរ និងមានកម្លាំងខ្លាំង ពិសេសអាចស្តុកថាមពលបានមកពីព្រះអាទិត្យ និងពីកង្ហារយក្ស។ ការរកឃើញថ្ម និងអាគុយធ្វើពី Lithium បានអនុញ្ញាតឲ្យពិភពលោកកាត់បន្ថយបន្តិចម្តងៗពីថាមពលធ្យូងថ្ម។ ក្នុងពេលដែលពិភពលោកជួបវិបត្តិប្រេងក្នុងទសវត្ស ៧០ លោក Stanley Whittinggham បានចាប់ផ្តើមស្រាវជ្រាវរកប្រភពថាមពលមិនប្រើធ្យូងថ្មតាមរយៈការបង្កើតផ្លូវចរន្តអគ្គិសនីនៅក្នុងថ្មសាកធ្វើពី Lithium ដែលផ្សំពីធាតុគីមីទីតាន។
បន្ទាប់មកក្នុងឆ្នាំ ១៩៨០ លោក John Goodenough បានបន្តការងាររបស់លោក Stanley Whittinggham ដោយផ្សំជាមួយធាតុគីមីផ្សេងទៀតដែលអាចបង្កើនកម្លាំងអគ្គិសនីនៅក្នុងថ្មធ្វើ Lithium។ ៥ឆ្នាំក្រោយមក ពោលក្នុងឆ្នាំ ១៩៨៥ លោក Akira Yoshino បានបង្កើតថ្មសាកធ្វើពី Lithium លក់ជាផ្លូវការក្នុងលោក។ ថ្ងៃនេះ និងជាង ៣ ទសវត្សក្រោយមក តម្រូវការថ្មសាកធ្វើពី Lithium នៅលើទីផ្សារក្នុងលោកបានកើនឡើងខ្ពស់ ពិសេសសម្រាប់បំពាក់នៅក្នុងរថយន្តអគ្គិសនី។ កំណើនតម្រូវការថ្មប្រភេទនេះនឹងកើនកាន់តែខ្លាំងថែមទៀតខណៈដែលពិភពលោកកំពុងប្រឈមនឹងការឡើងកម្តៅនៅក្នុងបរិយាកាស។
« ខ្ញុំគិតថា បម្រែបម្រួលអាកាសធាតុជាបញ្ហាប្រឈមមួយធ្ងន់ធ្ងរសម្រាប់មនុស្សជាតិ ហើយថ្មសាកធ្វើពី Lithium អាចស្តុកភ្លើងអគ្គិសនីក្នុងបរិមាណច្រើន » នេះជាការថ្លែងរបស់អ្នកស្រាវជ្រាវជប៉ុនលោក Akira Yoshino។ គួរបញ្ជាក់ថាពីដំបូង មានសារធាតុ Lithium តែ ៦% ប៉ុណ្ណោះត្រូវបានគេប្រើដើម្បីផលិតថ្មពិល និងអាគុយ តែសព្វថ្ងៃមានដល់ទៅ ៣៥%។ ក្នុងរយៈពេលប៉ុន្មានឆ្នាំចុងក្រោយនេះ តម្រូវការផលិតកម្ម Lithium ក្នុងលោកមានការកើនឡើងយ៉ាងខ្លាំង គឺកើន ៧៤% ក្នុងឆ្នាំ ២០១៧ និងកើនបន្ថែមចំនួន ២៣% ទៀតក្នុងឆ្នាំ ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ