រដ្ឋាភិបាលកម្ពុជាសម្រេចដំឡើងប្រាក់ខែកម្មករបន្ថែមតែ២ដុល្លារសម្រាប់ឆ្នាំ២០២១ ដោយសារវិបត្តិកូវីដ១៩
កិច្ចប្រជុំចរចាដំឡើងប្រាក់ឈ្នួលអប្បបរមាដល់កម្មករនិយោជិតសម្រាប់ឆ្នាំ២០២១ដែលធ្វើឡើងរយៈពេលពីរថ្ងៃបានបិទបញ្ចប់ហើយនៅព្រឹកថ្ងៃព្រហស្បតិ៍នេះ។ ជាលទ្ធផល ក្រសួងការងារ និងបណ្តុះបណ្តាលវិជ្ជាជីវៈបានសម្រេចរក្សាទុកនូវចំនួនប្រាក់ខែគោល១៩០ដុល្លារអាមេរិកដដែល។ ប៉ុន្តែ ប្រមុខរដ្ឋាភិបាលកម្ពុជាបានចេញមកអន្តរាគមន៍ដោយបានបន្ថែមទឹកប្រាក់២ដុល្លារទៅលើប្រាក់ខែចាស់នេះ។ ដូច្នេះហើយ សម្រាប់ឆ្នាំ២០២១ខាងមុខនេះ ប្រាក់ខែគោលរបស់កម្មករ និយោជិតមានចំនួន១៩២ដុល្លារក្នុងមួយខែ។
ចុះផ្សាយនៅថ្ងៃ៖
ស្តាប់ - ០២:១៧
ចាប់ពីថ្ងៃទី១ ខែមករា ឆ្នាំ២០២១ កម្មករនិយោជិតផ្នែកវាយនភណ្ឌ កាត់ដេរ និង ផលិតស្បែកជើង នឹងទទួលប្រាក់ឈ្នួលអប្បរមាចំនួន ១៩២ ដុល្លារអាមេរិកក្នុងមួយខែចំពោះកម្មករនិយោជិតពេញសិទ្ធិ និងចំនួន ១៨០ ដុល្លារអាមេរិក ក្នុងមួយខែចំពោះកម្មករនិយោជិតសាកល្បង។ នេះបើតាមប្រកាសជាផ្លូវការរបស់ក្រសួងការងារ និងបណ្តុះបណ្តាលវិជ្ជាជីវៈ។ ក្រសួងការងារ និងបណ្តុះបណ្តាលវិជ្ជាជីវៈក៏បានអះអាងថា បន្ថែមពីលើប្រាក់ឈ្នួលអប្បរមានេះ កម្មករនិយោជិតនឹងបន្តទទួលបានអត្ថប្រយោជន៍ផ្សេងៗទៀតដូចដើម រួមមាន ប្រាក់សោហ៊ុយធ្វើដំណើរ និងស្នាក់នៅចំនួន៧ដុល្លារអាមេរិកក្នុងមួយខែ និង ប្រាក់រង្វាន់ធ្វើការទៀងទាត់ចំនួន១០ដុល្លារអាមេរិក ក្នុងមួយខែ។
ជាមួយគ្នានេះ កម្មករនិយោជិតក៏នឹងទទួលបានប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន២,០០០រៀលក្នុងមួយថ្ងៃ ឬការទទួលបានបាយមួយពេលដោយឥតគិតថ្លៃ និង ប្រាក់រង្វាន់អតីតភាពការងារចំនួនពី២ដុល្លារអាមេរិកដល់១១ដុល្លារអាមេរិកក្នុងមួយខែសម្រាប់កម្មករនិយោជិតដែលបានធ្វើការចាប់ពីឆ្នាំទី២ដល់ឆ្នាំទី១១។ ដូច្នេះហើយ ជាមធ្យមកម្មករនិយោជិតម្នាក់ៗនឹងទទួលបានប្រាក់បៀវត្សយ៉ាងតិចចំនួនពី ២០៩ដុល្លារអាមេរិកដល់២២០ដុល្លារអាមេរិកក្នុងមួយខែ។ នេះបើតាមក្រសួងការងារ និងបណ្តុះបណ្តាលវិជ្ជាជីវៈ។
សូមបញ្ជាក់ថា ការដំឡើងប្រាក់ឈ្នួលអប្បរមាកម្មករនិយោជិតបន្ថែមត្រឹមតែ២ដុល្លារនេះ ធ្វើឡើងស្របពេលដែលកម្ពុជាកំពុងប្រឈមនឹងបញ្ហាពីរធំៗ គឺទី១ បញ្ហារីករាលដាលនៃជំងឺកូវីដ ១៩ និង បញ្ហាអឺរ៉ុបដកផ្នែកខ្លះនៃប្រព័ន្ធអនុគ្រោះពន្ធEBA។ បញ្ហាទាំងពីរនេះបានធ្វើឱ្យរោងចក្រមួយចំនួននៅកម្ពុជាបានបិទទ្វារ ឬប្តូរសង្វាក់ផលិតកម្មដែលធ្វើឱ្យកម្មករនិយោជិតអស់ការងារធ្វើជាច្រើនពាន់នាក់។
ចំពោះបញ្ហានេះ តំណាងនិយោជកបានស្នើឱ្យមានការបន្ថយប្រាក់ខែកម្មករនិយោជិត។ ផ្ទុយទៅវិញ ក្រុមសហជីពតំណាងកម្មករនៅតែបន្តស្នើឱ្យមានការដំឡើងប្រាក់ខែដល់ទៅជាង២០០ដុល្លារក្នុងមួយខែ។ លោកហេង សួរ អ្នកនាំពាក្យក្រសួងការងារ និង បណ្តុះបណ្តាលវិជ្ជាជីវៈបានគូសបញ្ជាក់ឱ្យដឹងថា ថ្វីត្បិតប្រាក់ឈ្នួលនេះកើនតិចមែន ប៉ុន្តែកម្ពុជា គឺជាប្រទេសតែមួយគត់នៅក្នុងតំបន់ដែលបានដំឡើងប្រាក់ឈ្នួលអប្បបរមាដល់កម្មករនិយោជិតនៅក្នុងពេលមានវិបត្តិសកលនៃជំងឺកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ