អង្គការអន្តរជាតិ២ ថ្កោលទោស និងទាមទារឱ្យរដ្ឋាភិបាលកម្ពុជា ដោះលែងកញ្ញា ឈឹម ស៊ីថរដោយឥតលក្ខខណ្ឌ
អង្គការអន្តរជាតិចំនួន២ បានចេញសេចក្តីថ្លែងការណ៍ថ្កោលទោស និងទាមទារឱ្យរដ្ឋាភិបាលកម្ពុជា ដោះលែងមេដឹកនាំសហជីពប្រចាំក្រុមហ៊ុនណាហ្គាវើលដ៍ កញ្ញា ឈឹម ស៊ីថរដោយឥតលក្ខខណ្ឌ។ ការទាមទារបែបនេះធ្វើឡើងបន្ទាប់ពីកញ្ញា ឈឹម ស៊ីថរត្រូវបានប៉ូលីសអន្តោប្រវេសន្ត៍ចាប់ខ្លួននៅព្រលានយន្តហោះអន្តរជាតិភ្នំពេញកាលពីថ្ងៃទី២៦ វិច្ឆិកា និងបានបញ្ចូនទៅឃុំខ្លួននៅពន្ធនាគារព្រៃស ក្រោយមេដឹកនាំសហជីពរូបនេះត្រឡប់មកពីកិច្ចប្រជុំមួយនៅឯប្រទេសអូស្ត្រាលី។ បើតាមអង្គការអន្តរជាតិទាំង២ ការចាប់ខ្លួនកញ្ញា ឈឹម ស៊ីធរ ហាក់ដូចជា ការសងសឹកពីសំណាក់អាជ្ញាធរទៅវិញ។
ចុះផ្សាយនៅថ្ងៃ៖
ស្តាប់ - ០២:៤៤
ក្នុងសេចក្តីថ្លែងការណ៍រួមដែលចេញផ្សាយកាលពីថ្ងៃទី០១ ធ្នូ ដោយវេទិកាអាស៊ីសម្រាប់សិទ្ធិមនុស្ស និងការអភិវឌ្ឍន៍ និងអង្គការសម្ព័ន្ធពិភពលោកសម្រាប់ការចូលរួមរបស់ពលរដ្ឋ បានជំរុញឱ្យរដ្ឋាភិបាលកម្ពុជាដោះលែងកញ្ញា ឈឹម ស៊ីថរ មេដឹកនាំសហជីពប្រចាំក្រុមហ៊ុនណាហ្គាវើលដ៍ដោយឥតលក្ខខណ្ឌ ក៏ដូចជាស្នើឱ្យក្រុមហ៊ុនបញ្ឈប់រូបភាពធ្វើទុកបុកម្នេញលើកម្មករ ហើយផ្ទុយទៅវិញត្រូវស្វែងរកដំណោះស្រាយដោយសន្តិវិធី ជុំវិញវិវាទការងារដែលបានអូសបន្លាយអស់រយៈពេលជាង១ឆ្នាំមកនេះ។
ក្នុងសេចក្តីថ្លែងការណ៍ដដែល អង្គការទាំង២នេះបានបញ្ជាក់ជំហររបស់ខ្លួនថា នឹងបន្តជំរុញរដ្ឋាភិបាលកម្ពុជាឱ្យធ្វើយ៉ាងណាត្រូវគោរពសិទ្ធិសេរីភាពក្នុងការជួបជុំ ឬបង្កើតសហជីពដោយសន្តិវិធី ហើយក៏គួរបញ្ឈប់សកម្មភាពគម្រាមកំហែង យាយី និងកាត់ទោសសកម្មជនសហជីពបន្ថែមទៀតដូចដែលរដ្ឋាភិបាលបានចាប់ខ្លួនសកម្មជននិងសហជីពការពារសិទ្ធិដល់បុគ្គលិកនៃក្រុមហ៊ុនណាហ្គាវើលដ៍នាពេលកន្លងមកចំនួន៩នាក់។
ក្នុងនោះ មន្ត្រីផ្នែកតស៊ូមតិ និងយុទ្ធនាការអាស៊ីនៃអង្គការសម្ព័ន្ធពិភពលោកសម្រាប់ការចូលរួមរបស់ពលរដ្ឋ លោក ខលណែឡូស ហានុង បានលើកឡើងក្នុងសេចក្តីថ្លែងការណ៍ថា ប្រសិនបើរដ្ឋាភិបាលបដិសេធមិនព្រម ដោះលែងកញ្ញាឈឹម ស៊ីថរ លោកនឹងចាត់ទុកថា រដ្ឋាភិបាលកម្ពុជាកំពុងរំលោភបំពានមកលើសិទ្ធិសហជីពយ៉ាងធ្ងន់ធរ។ ហើយលោកយល់ថា ការចាប់ខ្លួនជាលើកទី២មកលើមេដឹកនាំសហជីពរូបនេះ គឺជាចេតនាសងសឹករបស់អាជ្ញាធរ ក្រោយកញ្ញាមានភាពសកម្មក្នុងការដឹកនាំបុគ្គលិកចេញមកតវ៉ាដោយសន្តិវិធី ទោះបីអាជ្ញាធរចោទប្រកាន់ថា ជាការតវ៉ាខុសច្បាប់។
តែយ៉ាងណា អ្នកនាំពាក្យក្រសួងយុត្តិធម៌លោក ជិន ម៉ាលីន បានឆ្លើយតបជុំវិញសេចក្តីថ្លែងការណ៍នេះថា ក្នុងករណីចាប់ខ្លួនរបស់កញ្ញា ឈឹម ស៊ីថរនាពេលកន្លងមក គឺរដ្ឋាភិបាលអនុវត្តទៅតាមនីតិវិធីច្បាប់របស់តុលាការសុទ្ធសាធ ដោយមិនជាប់ពាក់ព័ន្ធនឹងរឿងនយោបាយអ្វីឡើយ ហើយក៏មិនមែនជារឿងរំលោភសិទ្ធិអ្វីដែរ។ ប៉ុន្តែ លោកថា កញ្ញា ឈឹម ស៊ីថរ បានបំពានលក្ខខណ្ឌរបស់តុលាការ ដោយមិនបានសុំការអនុញ្ញាតពីអង្គចៅក្រមស៊ើបសួរមុននឹងចេញទៅក្រៅប្រទេស ខណៈការរស់នៅក្រៅឃុំរបស់កញ្ញា គឺស្ថិតក្រោមការត្រួតពិនិត្យតាមផ្លូវតុលាការ។
សូមជម្រាបថា កញ្ញា ឈឹម ស៊ីថរ ដែលជាប្រធានសហជីពទ្រទ្រង់សិទ្ធិការងារនៃបុគ្គលិកកម្មករខ្មែរនៃ ក្រុមហ៊ុនណាហ្គាវើលដ៍ត្រូវបានប៉ូលីសអន្តោប្រវេសន្ត៍ប្រចាំព្រលានយន្តអន្តរជាតិភ្នំពេញចាប់ឃាត់ខ្លួននិងត្រូវបានបញ្ចូនទៅឃុំខ្លួននៅពន្ធនាគារព្រៃសទី២ ជាលើកទី២ បន្ទាប់ពីកញ្ញាធ្វើដំណើរត្រឡប់មកពីចូលរួមកិច្ចប្រជុំមួយនៅប្រទេសអូស្រា្តលីកាលពីថ្ងៃទី២៦ វិច្ឆិកា។
ក្រោយការចាប់ខ្លួនមេដឹកនាំសហជីពរូបនេះ បណ្តាស្ថានទូតមួយចំនួនដូចជា ស្ថានទូតសហរដ្ឋអាមេរិក និងអូស្រា្តលី ក៏ដូចជាក្រុមអង្គការសង្គមស៊ីវិលនានាបានចេញសេចក្តីថ្លែងការណ៍របស់ខ្លួន ដោយស្នើឱ្យរដ្ឋាភិបាលកម្ពុជាដោះលែងកញ្ញា ឈឹម ស៊ីថរ និងសមាជិកសហជីពផ្សេងទៀតដែលកំពុងជាប់ឃុំឱ្យមានសេរីភាពឡើងវិញ និងបញ្ឈប់ការគំរាមកំហែងមកលើសហជីព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ