មាឃបូជា៖អ្នកនយោបាយពីររូបផ្ដល់និយមន័យផ្សេងគ្នាពីតម្លៃសន្តិភាព
ក្នុងថ្ងៃបុណ្យមាឃបូជានាថ្ងៃទី៥ ខែកុម្ភៈនេះ លោក កឹម សុខា អតីតប្រធាននៃអតីតគណបក្សសង្គ្រោះជាតិបានរំលេចសារតាមឱវាទព្រះពុទ្ធថា «សន្តិភាព»ពិតគឺជាសន្តិភាពដែលកើតមាននៅក្នុងផ្លូវចិត្តរបស់បុគ្គលរៀងៗខ្លួនដែលស្តែងចេញតាមរយៈកាយនិងវាចា។ ទន្ទឹមគ្នានេះ លោក ហ៊ុន សែន ប្រធានគណបក្សប្រជាជនកម្ពុជាថា ព្រះពុទ្ធសាសនា បានរួមចំណែកយ៉ាងសំខាន់នៅក្នុងការពង្រឹងសណ្ដាប់ធ្នាប់ សុខសន្តិភាព ស្ថិរភាពសង្គម ។
ចុះផ្សាយនៅថ្ងៃ៖
ស្តាប់ - ០២:០៥
មិនថា លោក កឹម សុខា ឬ លោក ហ៊ុន សែន ឡើយសុទ្ធតែបានបង្ហាញពីសាវតាថ្ងៃបុណ្យមាឃបូជា។ លោក កឹម សុខា ចាត់ទុកបុណ្យមាឃបូជា គឺជាទិវាដ៏សំខាន់បំផុត នៅក្នុងព្រះពុទ្ធសាសនា។ ហើយថា អ្នកទាំងឡាយណាដែលតាំងខ្លួន ជាពុទ្ធសាសនិក ជាពិសេសប្រជាពលរដ្ឋខ្មែរ ក៏ដូចជាអ្នកដឹកនាំប្រទេសត្រូវយល់ដឹង និងពង្រឹងការប្រតិបត្តិនូវព្រះពុទ្ធឱវាទ ដូចបានកំណត់ក្នុងរដ្ឋធម្មនុញ្ញ។
អ្នកនយោបាយជាប់បំរាមផ្លូវច្បាប់រូបនេះបន្ថែមថា ព្រះសម្មាសម្ពុទ្ធសម្តែងនូវព្រះឱវាទ ឲ្យធ្វើអំពើល្អ កុំធ្វើអំពើអាក្រក់ សំអាតចិត្តឲ្យបរិសុទ្ធ គឺសន្តិភាពផ្លូវចិត្តដែលជាសន្តិភាពពិត។ ចំពោះមនុស្សគ្រប់រូប ដែលតាំងខ្លួនប្រាថ្នាចង់បានសន្តិភាព ត្រូវយល់ដឹងពីអត្ថន័យ«សន្តិភាព»ពិត។ សន្តិភាពពិតកើតមាននៅក្នុងផ្លូវចិត្តរបស់បុគ្គលរៀងៗខ្លួនដែលស្តែងចេញតាមរយៈកាយនិងវាចា។
ចំណែកលោកនាយករដ្ឋមន្ត្រី ហ៊ុន សែន មាឃបូជា គឺជាពិធីបុណ្យមួយដ៏មានសារសំខាន់បំផុតនៅក្នុងព្រះពុទ្ធសាសនា ដែលជាសាសនារបស់រដ្ឋ។ បុណ្យមាឃបូជាប្រារព្ធឡើង ដើម្បីរំលឹកដល់ថៃ្ងដែលព្រះសម្មាសម្ពុទ្ធ ទ្រង់ប្រកាសបង្កើតព្រះពុទ្ធសាសនាឡើង ក្នុងលោក នាប្រទេសឥណ្ឌា កាលពី៥៨៨ឆ្នាំមុនគ្រិស្តសករាជ នាថៃ្ងទី១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន៩ខែគត់។
សម្រាប់លោក ហ៊ុន សែន ព្រះពុទ្ធសាសនា មិនត្រឹមតែបានធ្វើឱ្យពលរដ្ឋ រួមរស់ជាមួយគ្នាដោយសុខសាន្តខាង ផ្លូវស្មារតីប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅក្នុងការពង្រឹងសណ្ដាប់ធ្នាប់ សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យ និងថែរក្សាការពារ អត្តសញ្ញាណ ជាតិទៀតផង។
ជុំវិញសាររបស់អ្នកនយោបាយដែលបង្ហាញគំរូអហិង្សាយកលំអានតាមព្រះពុទ្ធ ត្រូវបានអ្នកតាមដាននយោបាយនិងសង្គមស៊ីវិលមើលឃើញថា ការអនុវត្តជាក់ស្ដែងផ្ទុយពីនេះ។ លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូអង្កេតឃើញថា ពលរដ្ឋកម្ពុជាមិនទាន់ទទួលបានសន្តិភាពផ្លូវចិត្តនិងផ្លូវអារម្មណ៍នៅឡើយទេ។ ដូច្នេះអ្នកនយោបាយគួរពង្រឹងស្ថានភាពនេះឡើងវិញ ដើម្បីឲ្យពលរដ្ឋទទួលបានសន្តិភាពពេញលេញឲ្យស្របទៅតាមគោលការណ៍ប្រទេសប្រកាន់យកលទ្ធិប្រជាធិបតេយ្យ។ នេះបើតាមលោក អំ សំអាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ