បណ្ឌិត មាស នី៖ ពលរដ្ឋអាយុនៅតិចកាន់តែច្រើន សេពគ្រឿងស្រវឹង ខណៈកន្លែងលក់កាន់តែបង្ខិតមកជិតផ្ទះ
អ្នកសិក្សាស្រាវជ្រាវពីការអភិវឌ្ឍន៍សង្គម កត់សំគាល់ថា ចំនួនពលរដ្ឋក្មេងៗអាយុនៅតិចកាន់តែច្រើនឡើង នាំគ្នាសេពគ្រឿងស្រវឹង ខណៈដែលទីតាំងលក់គ្រឿងស្រវឺងកាន់តែបង្ខិតមកជិតផ្ទះពួកគេ។ ការកត់សំគាល់នេះ គឺស្របគ្នានឹងរបាយការណ៍ស្តីពីការអង្កេតប្រជាសាស្ត្រ និងសុខភាពកម្ពុជា ២០២១-២០២២ ដែលធ្វើឡើងដោយក្រសួងសុខាភិបាល ចេញផ្សាយកាលពីថ្ងៃទី៤ ខែមេសា។ ជារបាយការណ៍ស្ទង់មតិដែលរកឃើញថា បុរស៧នាក់ក្នុងចំណោម១០នាក់ស្មើ៧០% សេពគ្រឿងស្រវឹង។
ចុះផ្សាយនៅថ្ងៃ៖
ស្តាប់ - ០២:១៦
ការស្ទង់មតិថ្មីមួយ ដែលធ្វើឡើងដោយក្រសួងសុខាភិបាល និងស្ថាប័នរដ្ឋាភិបាលពាក់ព័ន្ធ បានបង្ហាញថា បុរស៧នាក់ក្នុងចំណោម១០នាក់ដែលស្មើប្រមាណ៧០% សេពគ្រឿងស្រវឹង។ ការស្ទង់មតិបង្ហាញថា ក្នុងមួយខែ បុរស១០% ពិសាគ្រឿងស្រវឹងជារៀងរាល់ថ្ងៃ ឬស្ទើរតែរាល់ថ្ងៃ។ ចំណែក៦០% សេពគ្រឿងស្រវឹងពី១ថ្ងៃទៅ៥ថ្ងៃ ខណៈ១៨% ពិសាគ្រឿងស្រវឹង៦ថ្ងៃទៅ១០ថ្ងៃ ហើយ១២%ពិសាគ្រឿងស្រវឹងពី១១ថ្ងៃទៅ២៤ថ្ងៃ។
ដោយឡែកចំពោះស្ត្រីវិញ គឺស្រ្តីចំនួន១៦%ពិសាគ្រឿងស្រវឹង ដែលភាគច្រើនសេពគ្រឿងស្រវឹងពី១ទៅ៥ថ្ងៃនៅក្នុងមួយខែ ខណៈស្ត្រីនៅទីប្រជុំជនសេពគ្រឿងស្រវឹងច្រើនជាងស្ត្រីនៅតាមទីជនបទ។ ប៉ុន្តែទាំងបុរសនៅតាមទីជនបទ និងបុរសនៅទីក្រុង ការសេពគ្រឿងស្រវឹងមិនមានភាពខុសគ្នាឡើយ។ ការស្ទង់មតិនោះក៏បង្ហាញដែរថា ស្ត្រីរហូតដល់៥០%ធ្លាប់រងអំពើហិង្សាពីស្វាមី ឬដៃគូស្និទ្ធស្នាលដែលសេពគ្រឿងស្រវឹង និងស្រវឹងម្តងម្កាល។
លោកបណ្ឌិត មាស នី អ្នកសិក្សាស្រាវជ្រាវពីការអភិវឌ្ឍន៍សង្គម យល់ស្របនឹងរបាយការណ៍នេះ ខណៈដែលោកធ្លាប់ធ្វើការអង្កេតក៏កត់សំគាល់ថា ចំនួនពលរដ្ឋក្មេងៗអាយុនៅតិចកាន់តែច្រើនឡើង នាំគ្នាសេពគ្រឿងស្រវឹង ខណៈដែលទីតាំងលក់គ្រឿងស្រវឺងកាន់តែបង្ខិតមកជិតផ្ទះពួកគេ ដោយបង្ខិតពីជាង៥០០ម៉ត្រ មកនៅជាង១៥០ ម៉ែត្រពីផ្ទះ។
បើតាមលោកបណ្ឌិត មាស នី និន្នាការនេះ គឺដោយសារតែការផ្សព្វផ្សាយគ្រឿងស្រវឹងពាសវាលពាសកាល គ្មានច្បាប់ទប់ស្កាត់។ លោកយល់ថា ផលវិបាកនៃការសេពគ្រឿងស្រវឺងគឺធ្លាក់ទៅក្នុងសង្គម ទាំងអ្នកសេពផ្ទាល់ អ្នកសមាជិកគ្រួសារក៏រងផលប៉ះពាល់។ ចំណែកអ្នកផលិតគ្រឿងស្រវឺងគឺជាអ្នកឆក់យកផលចំណេញពីឱកាសនេះ។
ក្រុមអ្នកតស៊ូមតិ ជាញឹកញាប់តែងតែធ្វើយុទ្ធនាការជំរុញឱ្យរដ្ឋាភិបាលពន្លឿនការអនុម័តច្បាប់ស្តីពីគ្រឿងស្រវឹង ដោយការដំឡើងពន្ធ និងលុបបំបាត់ចោលនូវការផ្សាយពាណិជ្ជកម្មគ្រឿងស្រវឹង ក៏ដូចជាការកំណត់អាយុក្នុងការទិញគ្រឿងស្រវឹង។
ប៉ុន្តែសេចក្តីព្រាងច្បាប់ស្តីពីគ្រឿងស្រវឹង ដែលតាក់តែងឡើងនៅឆ្នាំ២០១៥នោះ នៅជាប់គាំង ខណៈមាត្រាមួយចំនួននៃសេចក្តីព្រាងនោះ មិនអនុញ្ញាតឱ្យយុវជនអាយុក្រោម២១ឆ្នាំប្រើប្រាស់គ្រឿងស្រវឹង ហើយច្បាប់នេះនឹងដាក់បន្ទុកពន្ធខ្ពស់ទៅលើគ្រឿងស្រវឹង និងរឹតបន្តឹងលើការបើកលក់គ្រឿងស្រវឹងពេលយប់ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ