កម្ពុជាដាក់ចេញយុទ្ធសាស្ត្រកម្ចាត់ជំងឺគ្រុនចាញ់ឲ្យដល់កម្រិតសូន្យពីពេលនេះទៅ
នៅថ្ងៃទី២៥មេសាស្អែកនេះ គឺជាទិវាជាតិប្រយុទ្ធនឹងជំងឺគ្រុនចាញ់។ ជាប្រភេទជំងឺដែលបង្កឡើងដោយមូសដែកគោលចម្លងមេរោគទៅមនុស្សបណ្តាលទៅជាបញ្ហាព្រួយបារម្ភចំបងដល់សុខភាពសាធារណៈ និងប៉ះពាល់ដល់សេដ្ឋកិច្ចសង្គម។ នៅចំពោះមុខនេះ រដ្ឋាភិបាលកម្ពុជា បានដាក់ចេញយុទ្ធសាស្ត្រដោយប្តេជ្ញានឹងកម្ចាត់ចោលជំងឺគ្រុនចាញ់ឲ្យដល់កម្រិតសូន្យចាប់ពេលនេះតទៅ ខណៈដែលផែនការលុបបំបាត់ជំងឺគ្រុនចាញ់នឹងបញ្ចប់នៅឆ្នាំ២០២៥។
ចុះផ្សាយនៅថ្ងៃ៖
ស្តាប់ - ០១:៥៨
ក្នុងសារលិខិតសម្រាប់ទិវាជាតិប្រយុទ្ធជំងឺគ្រុនចាញ់ នៅក្រោមប្រធានបទ«នេះជាពេលដែលជំងឺគ្រុនចាញ់ត្រូវសូន្យ តាមរយៈការវិនិយោគ ការកែច្នៃ និងអនុវត្ត» ប្រមុខរដ្ឋាភិបាលកម្ពុជា អះអាងថា ផែនការយុទ្ធសាស្ត្រជាតិលុបបំបាត់ជំងឺគ្រុនចាញ់នៅកម្ពុជាកំពុងទទួលបានជោគជ័យ។
បើតាម លោក ហ៊ុន សែន ចាប់តាំងពីឆ្នាំ២០១៦មក ត្រូវបានបញ្ឈប់លែងឲ្យមានភាពស៊ាំនឹងថ្នាំសម្លាប់មេរោគគ្រុនចាញ់ បន្ទាប់មកនៅចាប់ពីឆ្នាំ១០២៨មកទល់ពេលនេះ ជំងឺនេះមិនអាចសម្លាប់មនុស្សណាម្នាក់ឡើយ។
ម្យ៉ាងទៀត ជំងឺគ្រុនចាញ់បានកាត់បន្ថយអត្រាចម្លងធ្លាក់ចុះពី១១ម៉ឺនករណីក្នុងមួយឆ្នាំ និងស្លាប់ជាង៥០០នាក់ នៅឆ្នាំ២០១១ មកនៅសល់៤០៤១ ករណីឈឺនៅឆ្នាំ២០២២។ ចំនួននេះមានការថយចុះចំនួន ៦ ភាគរយ បើធៀបនឹងឆ្នាំ ២០២១ ដែលមានករណីគ្រុនចាញ់ ចំនួន ៤ ៣១៨ ករណី។
បើតាមមជ្ឈមណ្ឌលជាតិប្រយុទ្ធជំងឺគ្រុនចាញ់ កម្ពុជាមិនមានករណីស្លាប់ដោយសារជំងឺគ្រុនចាញ់ ចាប់តាំងពីឆ្នាំ ២០១៨ មកដល់បច្ចុប្បន្ន ដែលមានន័យថា កម្ពុជាសម្រេចបានជោគជ័យមុនគោលដៅគ្រោងទុកឆ្នាំ ២០២៥។
ទោះជាយ៉ាងណា នាយករដ្ឋមន្ត្រីកម្ពុជា នៅតែអំពាវនាវពីភាគីពាក់ព័ន្ធចូលរួមលុបបំបាត់ជំងឺគ្រុនចាញ់ ទៅតាមផែនកាឲ្យដល់កម្រិតសូន្យចាប់ពេលនេះតទៅ។
បើតាមមន្ត្រីសុខាភិបាល ខេត្តគោលដៅចំនួន ៦ ដែលនៅមានអត្រាឆ្លងជំងឺគ្រុនចាញ់នៅឡើយ រួមមានខេត្តកំពង់ស្ពឺ មណ្ឌលគិរី រតនគិរី ស្ទឹងត្រែង ព្រះវិហារ និងក្រចេះ ខណៈខេត្តព្រះសីហនុអាចគ្រប់គ្រងការឆ្លងជំងឺគ្រុនចាញ់។ នៅចំពោះមុខនេះ អ្នកជំនាញសុខាភិបាលផ្តល់យោបល់ថា ប្រជាសហគមន៍ទាំងអស់ត្រូវតែសម្រាន្តក្នុងមុងជ្រលក់ថ្នាំ និងត្រូវមានអនាម័យ ថែរក្សាសុខភាព បរិស្ថានស់នៅប្រចាំថ្ងៃ ដើម្បីចៀសផុតពីជំងឺគ្រុនចាញ់ និងជំងឺផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ