កម្ពុជារំព្ញកហាមឃាត់បុគ្គលចូលលេងល្បែង ក្រោយកក្រើកករណីឆបោកអនឡាញបង្កប់ក្នុងកាស៊ីណូ
គណៈកម្មការគ្រប់គ្រងល្បែងពាណិជ្ជកម្មកម្ពុជាបានរំព្ញកឱ្យម្ចាស់កាស៊ីណូដែលកំពុងប្រតិបត្តិការនៅកម្ពុជាទាំងអស់ ត្រូវតែរឹតបន្តឹងឱ្យមានប្រសិទ្ធិភាព ចំពោះការហាមឃាត់បុគ្គលចូលលេងល្បែងនៅក្នុងគ្រឹះស្ថានល្បែងពាណិជ្ជកម្មរបស់ខ្លួន។ ជាការរឹតបន្តឹងការគ្រប់គ្រងល្បែងពាណិជ្ជកម្មនៅកម្ពុជា ខណៈដែរកម្ពុជាកំពុងកក្រើកករណីឆបោកតាមអនឡាញសំងំលាក់ខ្លួនក្រោមអាជីវកម្មល្បែងកាស៊ីណូមួយចំនួន។
ចុះផ្សាយនៅថ្ងៃ៖
ស្តាប់ - ០២:៤២
គណៈកម្មការគ្រប់គ្រងល្បែងពាណិជ្ជកម្មកម្ពុជា បានរំព្ញកឱ្យម្ចាស់កាស៊ីណូដែលកំពុងប្រតិបត្តិការនៅកម្ពុជាទាំងអស់ត្រូវតែរឹតបន្តឹង ឱ្យមានប្រសិទ្ធភាព ចំពោះការហាមឃាត់បុគ្គលចូលលេងល្បែង នៅក្នុងគ្រឹះស្ថានល្បែងពាណិជ្ជកម្ម ឬ កាស៊ីណូរបស់ខ្លួន។
នៅក្នុងសេចក្តីណែនាំស្តីពីការហាមឃាត់បុគ្គលចូលកាស៊ីណូក្នុងប្រទេសកម្ពុជា ចុះថ្ងៃទី៥ខែតុលាម្សិលមិញនេះបានលម្អិតថា តាមច្បាប់ ការចូលលេងល្បែងនៅក្នុងកាស៊ីណូ ឬ គ្រឹះស្ថានល្បែងពាណិជ្ជកម្មនៅប្រទេសកម្ពុជា ត្រូវហាមឃាត់ដាច់ខាតចំពោះ ប្រជាពលរដ្ឋខ្មែរទាំងអស់ បុគ្គលអាយុក្រោម១៨ឆ្នាំ បុគ្គលមានវិបត្តិស្មារតី បុគ្គលអសមត្ថភាពហិរញ្ញវត្ថុ បុគ្គលស្ថិតក្រោមឥទ្ធិពលគ្រឿងស្រវឹង ឬ ថ្នាំញៀន និងបុគ្គលយកមកជាមួយនូវអាវុធគ្រប់ប្រភេទ។
ហើយប្រសិនបើមានបុគ្គលហាមឃាត់ខាងលើចូលក្នុងកាស៊ីណូ ម្ចាស់ ឬប្រតិបត្តិករគ្រឹះស្ថានល្បែងពាណិជ្ជកម្មនោះ ត្រូវតែបណ្តេញជនទាំងនោះចេញពីទីតាំងលេងល្បែង និង រក្សាទុករបាយការណ៍បច្ចុប្បន្នកម្ម អំពីការរឹតត្បិតភ្ញៀវចូលលេងល្បែងក្នុងកាស៊ីណូរបស់ខ្លួន។ ទន្ទឹមគ្នានេះដែរ កាស៊ីណូទាំងអស់ត្រូវតែដាក់កម្លាំងភ្នាក់ងារសន្តិសុខ និងមានយន្តការតាមដានត្រួតពិនិត្យការចូលលេងល្បែងរបស់ភ្ញៀវល្បែងឱ្យមានប្រសិទ្ធភាព និងដោយត្រូវផ្សព្វផ្សាយអំពីបុគ្គលហាមឃាត់លេងល្បែងឱ្យបានច្បាស់លាស់នៅទីតាំងលេងល្បែងតែម្តង។ នេះ បើតាមសេចក្តីណែនាំ។
គួរដឹងថា នេះគឺជាការប្រកាសរឹតបន្តឹងការគ្រប់គ្រងល្បែងពាណិជ្ជកម្មជាថ្មី ខណៈកម្ពុជាកំពុងកក្រើកករណីឆបោកតាមអនឡាញសំងំលាក់ខ្លួនក្រោមអាជីវកម្មល្បែងកាស៊ីណូនៅតាមបណ្តាខេត្តមួយចំនួនដូចជា ខេត្តព្រះសីហនុ ក្រុងបាវិតខេត្តស្វាយរៀង និងក្រុងប៉ោយប៉ែតខេត្តបន្ទាយមានជ័យ តាមរយៈរបាយការណ៍អង្គការក្រៅស្រុក និងការចុះផ្សាយរបស់កាសែតបរទេសមួយចំនួន។
គួរជម្រាបជូនផងដែរថា កាលពីចុងឆ្នាំ២០២០ កម្ពុជាបានអនុម័តច្បាប់ស្តីពីការគ្រប់គ្រងល្បែងពាណិជ្ជកម្ម ដែលមាន ១២ជំពូក និង ៩៧មាត្រា។ អនុលោមតាមច្បាប់ស្ដីពីការបង្ក្រាបល្បែងស៊ីសង នៅឆ្នាំ១៩៩៨ រដ្ឋាភិបាលកម្ពុជា បានកំណត់ឲ្យមានអាជីវកម្មកាស៊ីណូនៅកម្ពុជា ក្រៅរង្វង់២០០គីឡូម៉ែត្រពីរាជធានីភ្នំពេញ ដោយយកផ្ចិតនៅវត្តភ្នំ លើកលែងតែតំបន់ព្រំដែន តំបន់ភ្នំបូកគោ និងរមណីយដ្ឋានគិរីរម្យ។ ច្បាប់នេះ ត្រូវបានរដ្ឋាភិបាល បញ្ជាក់ថា មានគោលបំណងធានាការគ្រប់គ្រងមណ្ឌលល្បែងពាណិជ្ជកម្មសមាហរ័ណនិងល្បែងពាណិជ្ជកម្ម ដើម្បីរួមចំណែកជំរុញកំណើនសេដ្ឋកិច្ច លើកកម្ពស់វិស័យទេសចរណ៍ បង្កើតការងារ ប្រមូលចំណូល និងរក្សាសុវត្ថិភាពនិងសន្តិសុខសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ