អ្នកជំនាញផ្នែកសិទ្ធិមនុស្ស UN ស្នើឲ្យកម្ពុជាធ្វើកំណែទម្រង់ឡើងវិញ ក្រោយការបោះឆ្នោតដែលរឹតត្បិត
លោក Vitit Muntarbhorn អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានលើកឡើងថា កម្ពុជាត្រូវមានការធ្វើកំណែទម្រង់ជាបន្ទាន់ បន្ទាប់ពីការបោះឆ្នោតកន្លងទៅ ដែលមានលក្ខណៈរឹតត្បិត។ នេះបើតាមសេចក្តីប្រកាសព័ត៌មានរបស់ការិយាល័យឧត្តមស្នងការអង្គការសហប្រជាជាតិ កាលពីដើមសប្តាហ៍។
ចុះផ្សាយនៅថ្ងៃ៖
ស្តាប់ - ០២:០០
តាមរយៈសេចក្តីប្រកាសព័ត៌មានពីទីក្រុងហ្សឺណែវ លោក Vitit Muntarbhorn អ្នករាយការណ៍ពិសេសរបស់អង្គការសហប្រជាជាតិទទួលបន្ទុកស្ថានភាពសិទ្ធិមនុស្សបានបញ្ជាក់ថា កម្ពុជាមានតម្រូវការបន្ទាន់សម្រាប់កំណែទម្រង់ដ៏ទូលំទូលាយដើម្បីធានានូវតម្លាភាព និងយុត្តិធម៌នៃការបោះឆ្នោតឆ្នាំ២០២៣ ទាំងនៅក្នុងប្រព័ន្ធបោះឆ្នោត និងក្នុងបរិយាកាសនយោបាយ។
នៅក្នុងរបាយការណ៍របស់ខ្លួន ដែលដាក់ទៅកាន់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ លោក Vitit Muntarbhorn បានកំណត់នូវឧបសគ្គសំខាន់ៗដែលបានប៉ះពាល់ដល់ការបោះឆ្នោតឆ្នាំ២០២៣ រួមមាន ការដកសិទ្ធិបេក្ខជន ការយាយីសមាជិកបក្សប្រឆាំង និងការព្រួយបារម្ភអំពីឯករាជ្យភាពរបស់គណៈកម្មាធិការជាតិរៀបចំការបោះឆ្នោត។ លោកបានអំពាវនាវឲ្យមានកំណែទម្រង់ដូចជាការរៀបចំរចនាសម្ព័ន្ធគណៈកម្មាធិការឡើងវិញ ការជ្រើសរើសបុគ្គលិកបោះឆ្នោតដោយមិនលម្អៀង និងវត្តមានអ្នកសង្កេតការណ៍ឯករាជ្យ។
បើតាមរបាយការណ៍ គឺលោក Vitit Muntarbhorn នៅតែទទួលបានការរាយកាណ៍ ពីការបន្តវាយប្រហារ ការចាប់ខ្លួនដោយអយុត្តិធម៌ និងការកាត់ទោសអ្នកការពារសិទ្ធិមនុស្ស អ្នកកាសែត អ្នកនយោបាយប្រឆាំង និងអ្នកដទៃដែលរិះគន់អាជ្ញាធរ។ តាមលោក Vitit អ្នកការពារសិទ្ធិមនុស្ស និងសកម្មជនបរិស្ថានជាច្រើននាក់ នៅតែជាប់ឃុំឃាំងតាំងពីដើមឆ្នាំ ដោយមានការកើនឡើងបើធៀបនឹងឆ្នាំ២០២២។
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានអះអាងថា ទាំងនេះគឺជាក្តីកង្វល់ពីបញ្ហាសិទ្ធិមនុស្សកម្ពុជា ហើយកម្ពុជាត្រូវការធ្វើកំណែទម្រង់ឲ្យប្រសើរឡើង។ តាមលោក Vitit ការបន្តពូជពង្សដែលបានឡើងកាន់អំណាច បានធ្វើឱ្យមានការព្រួយបារម្ភយ៉ាងខ្លាំងទាក់ទងនឹងសិទ្ធិមនុស្ស គោលការណ៍ប្រជាធិបតេយ្យ និងច្បាប់អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ