យុទ្ធនាការតេស្តគ្រឿងញៀន៖ ខេត្តព្រៃវែងរកឃើញនគរបាល១១នាក់មានសារធាតុញៀន
ស្នងការនគរបាលខេត្តព្រៃវែងនៅថ្ងៃព្រហស្បតិ៍ម្សិលមិញនេះ បានប្រកាសរកឃើញមន្ត្រីនគរបាលប្រើប្រាស់គ្រឿងញៀនសរុបចំនួន ១១នាក់ នៅក្នុងយុទ្ធនាការធ្វើតេស្តស្វែងរកសារធាតុញៀនទូទាំងខេត្តក្នុងរយៈពេលជិត១ខែមកនេះ។ បើតាមសេចក្តីប្រកាស ស្នងការនគលបាលខេត្តបានបញ្ជូនមន្ត្រីនគលបាលទាំងនោះទៅកាន់មណ្ឌលបន្សាបគ្រឿងញៀនក្នុងខេត្តកណ្តាល ខណៈការអនុវត្តវិន័យយ៉ាងណានោះ គេនៅមិនទាន់ដឹងនៅឡើយ។
ចុះផ្សាយនៅថ្ងៃ៖
ស្តាប់ - ០២:២៣
ស្នងការនគរបាលខេត្តព្រៃវែងនៅថ្ងៃទី០២វិច្ឆិកាម្សិលមិញ បានប្រកាសរកឃើញមន្ត្រីនគរបាលប្រើប្រាស់គ្រឿងញៀនសរុបចំនួន១១នាក់ នៅក្នុងយុទ្ធនាការធ្វើតេស្តស្វែងរកសារធាតុញៀនទូទាំងខេត្តចាប់ពីថ្ងៃទី០៩ដល់ថ្ងៃទី៣០តុលាឆ្នាំ២០២៣។
បើតាមសេចក្តីប្រកាស ស្នងការនគលបាលខេត្តព្រៃវែងបានបញ្ជូនមន្ត្រីនគលបាលទាំងនោះទៅកាន់មណ្ឌលស្តារនិតិសម្បទាព្យាបាលបន្សាបអ្នកញៀនគ្រឿងញៀន នៅស្រុកកណ្តាលស្ទឹង ខេត្តកណ្តាល ខណៈការអនុវត្តវិន័យយ៉ាងណានោះ គេនៅមិនទាន់ដឹងនៅឡើយ។
ពាក់ព័ន្ធនឹងយុទ្ធនាការបង្ក្រាបគ្រឿងញៀននៅក្នុងស្ថាប័ន រដ្ឋមន្ត្រីក្រសួងមហាផ្ទៃ លោក ស សុខា បានអះអាងនៅថ្ងៃទី០២វិច្ឆិកាម្សិលមិញនេះដែរថា មន្ត្រីនគលបាលរូបណាដែលរកឃើញជាប់ពាក់ព័ន្ធនឹងបទល្មើសគ្រឿងញៀននឹងត្រូវអនុវត្តវិន័យតឹងរ៉ឺង ដោយអាចបណ្តេញចេញពីក្របខណ្ឌជាដើម។
ក្នុងសំណុំរឿងមន្ត្រីប៉េអ៊ឹមនគលបាលជាតិមានជាប់បទល្មើសគ្រឿងញៀននេះដែរ! កាលពីថ្ងៃទី៣១តុលាកន្លងទៅ មន្ត្រីកងរាជអាវុធហត្ថស្រុកភ្នំស្រួចចំនួន៦រូប ត្រូវបានចាប់ខ្លួន ក្រោមការសង្ស័យថា ពាក់ព័ន្ធការទទួលផលពីការជួញដូរគ្រឿងញៀននៅខេត្តព្រះសីហនុ។ ក្នុងចំណោមនោះ មានម្នាក់ពាក់ស័ក្ត៥ ជាបញ្ជាការរងប៉េអឹមខេត្តកំពង់ស្ពឺ និងម្នាក់ពាក់ស័ក្ត៤ជាមេបញ្ជាការប៉េអឹមស្រុកភ្នំស្រួច។
គួរជម្រាបថា ក្រសួងមហាផ្ទៃគ្រោងនឹងដាក់ចេញយុទ្ធសាស្ត្រកាត់បន្ថយបទល្មើសគ្រឿងញៀនឱ្យបានចន្លោះពី២០-៣០ ភាគរយ ខណៈបច្ចុប្បន្ន ក្រសួងមហាផ្ទៃក៏មានដែរយុទ្ធនាការចុះបង្ក្រាបការប្រើប្រាស់គ្រឿងញៀនក្នុងពន្ធធនាគារ ទៅលើមន្ត្រីពន្ធនាគារជាទូទៅ និងជនជាប់ឃុំដែលមានការសង្ស័យប្រើប្រាស់គ្រឿងញៀន។
អ្នកឃ្លាំមើលមួយចំនួនយល់ថា យុទ្ធនាការបង្ក្រាបគ្រឿងញៀនរបស់រដ្ឋាភិបាលកម្ពុជានឹងក្លាយជាអាសារបង់ គ្មានប្រសិនភាព ប្រសិនបើការអនុវត្តការងាររបស់មន្ត្រីមួយចំនួននៅតែគ្មានតម្លាភាព អនុវត្តដោយបក្សពួកនិយម និងអំពើពុករលួយនោះ។
បញ្ហាគ្រឿងញៀនត្រូវបានរដ្ឋាភិបាលកម្ពុជាចាត់ចូលជាបញ្ហាដោះស្រាយជាអាទិភាពទី៤ ក្នុងអាណត្តិទី៧នេះ ខណៈលោកនាយករដ្ឋមន្ត្រី ហ៊ុន ម៉ាណែតថ្មីៗនេះ ចង់រុះរើក្បាលម៉ាស៊ីនដឹកនាំរបស់អាជ្ញាធរជាតិប្រយុទ្ធប្រឆាំងគ្រឿងញៀន ដើម្បីបង្កើនប្រសិទ្ធិភាព និងធ្វើឱ្យមានទម្ងន់ក្នុងការចុះបង្ក្រាបទប់ស្កាត់ការជួញដូរគ្រឿងញៀនឱ្យអស់ពីកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ