ផ្លូវមួយចំនួនត្រូវហាមឃាត់រថយន្ត និងរ៉ឺម៉កឆ្លងកាត់៤ថ្ងៃ
នៅក្នុងពិធីបុណ្យអុំទូកនេះ ការធ្វើចរាចរណ៍ដោយរថយន្តដឹកអ្នកដំណើរគ្រប់ប្រភេទ និងម៉ូតូសណ្តោងរ៉ឺម៉ក គឺមិនអនុញ្ញាតឲ្យចូលតំបន់រៀបចំពិធីបុណ្យអុំទូក និងបរិវេនជុំវិញទីតាំងនោះ ឡើយចាប់ពីថ្ងៃទី២៥នេះរហូតដល់ថ្ងៃទី២៩វិច្ឆិកាចាប់ពីម៉ោង១០ព្រឹកដល់ម៉ោង២២យប់។ នេះបើតាមសេចក្តីជូនដំណឹងរបស់រដ្ឋបាលរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:៥១
យានយន្តគ្រប់ប្រភេទដែលធ្វើដំណើរមកចូលរួមទស្សនាពិធីបុណ្យអុំទូក មិនអនុញ្ញាតឲ្យធ្វើចរាចរណ៍លើវិថីខេមរភូមិន្ទ(ផ្លូវលេខ១៣០) ផ្លូវលេខ៥ វិថីដំឌិន(ផ្លូវ១៥៤) វិថីសម្តេចប៉ាន(ផ្លូវ២១៤) ផ្លូវ២៩៤ កំណាត់វិថីសុធារស ចាប់ពីផ្លូវលេខ២៤០ដល់ខាងជើងស្ថានទូតរុស្ស៊ី វិថីរដ្ឋសភា ជាដើម។
ក្រៅពីការបិទចរាចរណ៍នៅលើផ្លូវសំខាន់នៃតំបន់ប្រារព្ធពិធីនោះ នៅតាមបណ្តាផ្លូវជាតិដែលចូលមកកាន់រាជធានីវិញក៏ត្រូវបញ្ចៀសចរាចរណ៍ដែរសម្រាប់រថយន្តធំ និងរថយន្តដឹកទំនិញគឺត្រូវចូលចតនៅវត្តនិរោធរង្ស៊ី ចំណតរថយន្តច្បារអំពៅសម្រាប់ផ្លូវជាតិលេខ១។ រីឯផ្លូវជាតិ៣ និងផ្លូវជាតិលេខ៤ រថយន្តគ្រប់ប្រភេទដែលធ្វើដំណើរឆ្លងកាត់រាជធានី គឺត្រូវវាងទៅតាមវិថីឈ្នះឈ្នះ ទៅកាន់ផ្លូវជាតិលេខ៥ ឬស្ពានព្រែកព្នៅ និងត្រូវបញ្ចៀសគោលចរាចរណ៍នៅអតីតរង្វង់មូលចោមចៅ ស្តុបមុខព្រលានយន្តហោះ និងស្តុប២០០៤។
ចំពោះផ្លូវជាតិ៥ រថយន្តធំត្រូវបង្វែរទៅវិថីឈ្នះឈ្នះ ឬចូលចតនៅគីឡូម៉ែត្រលេខ៩ ខណៈរថយន្តអ្នកដំណើរនិងម៉ូតូសណ្តោងរ៉ឺម៉ក ត្រូវចតមិនឲ្យហួសផ្លូវ៦៨ឡើយ។
ដោយឡែកផ្លូវជាតិលេខ៦ រថយន្តធំត្រូវបង្វែរទិសចរាចរណ៍តាមស្ពានព្រែកព្នៅ ខណៈរថយន្តអ្នកដំណើរ និងម៉ូតូសណ្តោងរ៉ឺម៉ក ត្រូវចូលចតនៅតំបន់OCIC។
សម្រាប់ផ្លូវ២៧១ និង៣៧១ រថយន្តធំត្រូវបញ្ចៀសចរាចរណ៍នៅកែងផ្លូវ២៧១ និង៣៧១ ខណៈរថយន្តអ្នកដំណើរ និងម៉ូតូសណ្តោងរ៉ឺម៉កត្រូវចូលចតត្រឹមចំណុចច្រមុះជ្រូកក្បាលថ្នល់។ ចំណែកផ្លូវវែងស្រេងរថយន្តធំត្រូវបញ្ចៀសចរាចរណ៍នៅច្រមុះជ្រូកស្ទឹងមានជ័យ។
រីឯរថយន្តដែលធ្វើដំណើរមកចូលរួមពិធីបុណ្យអុំទូកតាមផ្លូវម៉ុងឬទ្ធីត្រូវចូលចតនៅបរិវេនតំបន់បឹងកក់។
បន្ថែមពីនេះ អាជ្ញាធរក៏បានផ្អាកចំពោះការដ្ឋានសំណង់គ្រប់ប្រភេទនៅក្នុងខណ្ឌដូនពេញ សាឡង់ដឹកខ្សាច់ និងទូក កប៉ាល់ដែលធ្វើចរាចរណ៍ឆ្លងកាត់មុខព្រះបរមរាជវាំងគឺត្រូវផ្អាកពីថ្ងៃទី២៥ដល់ថ្ងៃទី២៩វិច្ឆកា ខណៈការធ្វើចរាចរណ៍ឆ្លងស្ពានកោះនរា ក៏ត្រូវផ្អាកចាប់ពីថ្ងៃទី២៦ដល់ថ្ងៃទី២៨វិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ