លោក ហ៊ុន សែន បង្ហាញពីវត្តមានភរិយា ទៅសួរសុខទុក្ខសម្តេចសង្ឃ ទេព វង្ស
លោក ហ៊ុន សែន នៅថ្ងៃសៅរ៍នេះ បានបង្ហាញរូបភាពជាច្រើនសន្លឹកនៃសកម្មភាពរបស់លោក និងភរិយា ក្នុងការចុះទៅសួរសុខទុក្ខដោយផ្ទាល់អំពីព្រះរាជសុខភាពរបស់សម្តេចព្រះសង្ឃរាជ ទេព វង្ស។ សម្តេចព្រះសង្ឈរាជ ទេព វង្ស ដែលកំពុងគង់ព្យាបាលព្រះរោគនៅមន្ទីរពេទ្យកាល់ម៉ែត្រ។
ចុះផ្សាយនៅថ្ងៃ៖
ស្តាប់ - ០១:៤៣
ការបង្ហាញពីសកម្មភាពរបស់លោកស្រី ប៊ុនរ៉ានី ហ៊ុន សែន នៅថ្ងៃទី១៧កុម្ភៈនេះ គឺទំនងជាការបង្ហាញឲ្យសាធារណៈជនបានដឹងពីស្ថានភាពសុខភាពរបស់ភរិយាលោក បន្ទាប់ពីលោកបានប្រកាសលើបណ្តាញសង្គមហ្វេសប៊ុកនៅថ្ងៃទី២កុម្ភៈថា ភរិយារបស់លោកពិតជាមានជម្ងឺ ក្រោយដួលក្នុងបន្ទប់ និងត្រូវបានបញ្ជូនទៅព្យាបាលនៅមន្ទីរពេទ្យកាល់ម៉ែត្រ។
បើតាមលោក ហ៊ុន សែន ភរិយារបស់លោក គឺលោកស្រី ប៊ុន រ៉ានី បានដួលក្នុងបន្ទប់សម្រាក កាលពីថ្ងៃទី២៩មករា២០២៤ ដោយបានប៉ះទង្គិចផ្នែកក្បាល ដែលចាំបាច់ត្រូវយកទៅពិនិត្យព្យាបាលនៅមន្ទីរពេទ្យកាល់ម៉ែត្រ។
លោក ហ៊ុន សែន បានអះអាងថា សុខភាពរបស់ភរិយាលោក មានភាពល្អប្រសើរឡើងវិញក្រោយមានការយកចិត្តទុកដាក់ពីគ្រូពេទ្យ។ ទន្ទឹមនឹងការបញ្ជាក់ជាសាធារណៈពីស្ថានភាពរបស់ភរិយា លោក ហ៊ុន សែន បានឆ្លៀតផ្តាំផ្ញើដល់ជនមួយចំនួនឲ្យបញ្ឈប់បំពុលព័ត៌មាន និងយកចិត្តទុកដាក់ការពារសុខភាពខ្លួនឯងល្អជាងមកគិត ពីក្រុមគ្រួសាររបស់លោក។
ការតបតរបស់អតីតនាយករដ្ឋមន្ត្រីនេះ គឺដោយសារតែការចុះផ្សាយរបស់សារព័ត៌មានពីខាងក្រៅប្រទេស មកថា លោក ហ៊ុន សែន និងក្រុមគ្រួសារ បានរក្សាភាពស្ងៀមស្ងាត់នៅចំពោះមុខនៃការដួលសន្លប់របស់លោកស្រី ប៊ុន រ៉ានី។
ក៏ប៉ុន្តែតាមរយៈសកម្មភាពដែលបង្ហាញនៅថ្ងៃទី១៧កុម្ភៈនេះ គឺលោកស្រី ប៊ុនរ៉ានី ហាក់ដូចជាមានសុខភាពធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ