ធនាគារពិភពលោក៖កម្ពុជាអាចសម្រេចគោលដៅយានយន្តអគ្គិសនីឆ្នាំ២០៥០
ប្រធានគ្រប់គ្រងធនាគារពិភពលោក(World Bank)ប្រចាំនៅកម្ពុជាយល់ឃើញថាគោលដៅនៃដំណើរឆ្ពោះទៅប្រើយានយន្តអគ្គិសនី គឺអាចសម្រេចបាន និងជួយឲ្យកម្ពុជាសម្រេចគោកដៅអព្យាក្រឹតកាបូនតាមមហិច្ឆតារបស់ខ្លួននៅឆ្នាំ២០៥០។ នេះបើតាមសេចក្តីប្រកាសព័ត៌មានមួយរបស់ធនាគារពិភពលោកចេញផ្សាយនៅថ្ងៃទី២៨ ខែមីនា ឆ្នាំ២០២៤នេះ។
ចុះផ្សាយនៅថ្ងៃ៖
ស្តាប់ - ០២:២៤
ប្រទេសកម្ពុជាអាចសម្រេចគោលដៅដ៏មានមហិច្ឆតារបស់ខ្លួនក្នុងការបង្កើនចំនួនយានយន្តអគ្គិសនីនៅលើដងផ្លូវ ប្រសិនបើអនុវត្តតាមផែនការដែលបានរៀបចំឡើងយ៉ាងប្រុងប្រយ័ត្ន។ នេះបើតាមសេចក្តីប្រកាសព័ត៌មានរបស់ធនាគារពិភពលោកនៅថ្ងៃព្រហស្បតិ៍នេះ។
លោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំនៅកម្ពុជាក៏មានសុទិដ្ឋិនិយមដូចគ្នានេះដែរ និងថាគោលដៅមួយនេះទាមទារឲ្យមានការវាយតម្លៃដោយប្រុងប្រយ័ត្នលើការផ្លាស់ប្តូរនេះ។ អ្នកគ្រប់គ្រងធនាគារពិភពលោកប្រចាំកម្ពុជាដដែលពន្យល់ថា បច្ចុប្បន្នប្រជាជនកម្ពុជាទទួលបានអត្ថប្រយោជន៍ច្រើនពីការប្រើប្រាស់យានយន្តជជុះតម្លៃទាប ដែលនាំចូលពីបរទេស តែវាក៏ជាឧបសគ្គមួយដល់កំណើននៃការប្រើប្រាស់យានយន្តអគ្គិសនីផងដែរ។
ដោយអះអាងពីការព្យាយាមជួយដល់រដ្ឋាភិបាលកម្ពុជាលើបញ្ហានេះ លោកស្រី ម៉ារីយ៉ាម សាលីម ផ្តល់យោបល់ថា ដើម្បីធានាឲ្យមានយានយន្តអគ្គិសនីនៅលើដងផ្លូវច្រើនជាងយានយន្តប្រើសាំង ឬប្រេងម៉ាស៊ូត កម្ពុជាចាំបាច់ត្រូវធ្វើកំណែទម្រង់បទបញ្ញត្តិនៃការនាំចូល និងការប្រើប្រាស់យានយន្តដោយប្រើវិធីរឹតបន្តឹងបន្តិចម្តងៗ។
កម្ពុជាគួរតែអនុវត្តគោលនយោបាយដែលតម្រូវឲ្យលែងមានយានយន្តប្រើប្រេងឥន្ធនៈ ធ្វើចរាចរណ៍តទៅទៀតនៅពេលអាយុកាលរបស់វាចូលដល់រយៈពេលជាក់លាក់ណាមួយ។ វិធីនេះនឹងបង្កើនតម្រូវការសម្រាប់យានយន្តថ្មី និងជួយបើកផ្លូវឲ្យយានយន្តអគ្គិសនីជ្រៀតចូលក្នុងទីផ្សារឲ្យកាន់តែលឿន។ នេះបើតាមប្រធានធនាគារពិភពលោកប្រចាំកម្ពុជា។
សូមរំលឹកថា កាលពីខែធ្នូ ឆ្នាំ២០២១ រដ្ឋាភិបាលកម្ពុជាបានកំណត់គោលដៅក្លាយជាសេដ្ឋកិច្ចមានអព្យាក្រឹតកាបូននៅត្រឹមឆ្នាំ ២០៥០។ យុទ្ធសាស្ត្ររបស់រដ្ឋាភិបាលនៅឆ្នាំ២០៥០ សម្រាប់ការដឹកជញ្ជូនគ្មានបំភាយកាបូនគឺរួមមាន៧០%នៃម៉ូតូ និង៤០%នៃរថយន្ត និងរថយន្តសាធារណៈក្នុងទីប្រជុំជនជាយានយន្តអគ្គិសនី។
ស្របពេលកំណើនសេដ្ឋកិច្ចកម្ពុជា ចំនួនយានយន្តសរុបដែលកំពុងធ្វើចរាចរណ៍នៅតាមដងផ្លូវត្រូវបានប៉ាន់ស្មានថាអាចនឹងកើនឡើងពី ៦លានគ្រឿង នាពេលបច្ចុប្បន្នទៅដល់ ៨លានគ្រឿងនៅឆ្នាំ២០៣០ និងកើនដល់ ១៤លានគ្រឿងនៅឆ្នាំ២០៥០។ ក៏ប៉ុន្តែបច្ចុប្បន្ននេះ ចំនួនរថយន្តអគ្គិសនីជាក់ស្តែងដែលកំពុងធ្វើចរាចរណ៍នៅលើដងផ្លូវក្នុងប្រទេសកម្ពុជាមានតិចជាង ១ ០០០គ្រឿងនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ