លោកចិប ប៊ូស ដកខ្លួនពីការបោះឆ្នោតប្រធានាធិបតីអាមេរិក
លោកស្រីហ៊ីឡារី គ្លីនតុន និងលោកដូណាល់ ត្រាំ គឺជាអ្នកទទួលជោគជ័យក្នុងការបោះឆ្នោតជ្រើសរើសបេក្ខជនប្រធានាធិបតីអាមេរិក កាលពីយប់ថ្ងៃសៅរ៍។ ចំណែកឯលោក ចិប ប៊ូស (Jeb Bush) ដែលត្រូវជាកូនប្រុស និងប្អូនប្រុសអតីតប្រធានាធិបតីអាមេរិក បានប្រកាសដកខ្លួនចេញពីការបោះឆ្នោត ក្រោយពីទទួលបានសំឡេងគាំទ្រតិចតួច នៅក្នុងការបោះឆ្នោតចំនួន ៣រដ្ឋជាប់ៗគ្នា។
ចុះផ្សាយនៅថ្ងៃ៖
ស្តាប់ - ០២:០២
លោក ចិប ប៊ូស អតីតអភិបាលរដ្ឋ Florida ត្រូវបានគេមើលឃើញថាជាមនុស្សទី៣នៅក្នុងត្រកូលប៊ូស ដែលអាចនឹងក្លាយជាប្រធានាធិបតីអាមេរិក បន្ទាប់ពីលោកចច ប៊ូស ជាឪពុក ដែលកាន់តំណែងពីឆ្នាំ១៩៨៩ ដល់ឆ្នាំ១៩៩៣ និងលោកចច ដាបិលយូ ប៊ូស ជាបងប្រុស ដែលកាន់តំណែងពីឆ្នាំ២០០១ ដល់ឆ្នាំ២០០៩។
កន្លងមក លោកចិប ប៊ូស ត្រូវបានគណបក្សសាធារណរដ្ឋដាក់ក្តីសង្ឃឹមច្រើនជាងគេ ក្នុងការប្រជែងដណ្តើមតំណែងប្រធានាធិបតីពីគណបក្សប្រជាធិបតេយ្យ។ ក៏ប៉ុន្តែ ក្តីសង្ឃឹមបានក្លាយទៅជាការខកចិត្ត នៅពេលដែលគេមើលឃើញ ពីសំឡេងគាំទ្រតិចតួច ដែលលោកចិប ប៊ូស ទទួលបាននៅក្នុងការបោះឆ្នោតចំនួន ៣រដ្ឋកន្លងទៅនេះ។
នៅរដ្ឋ Iowa ដែលជារដ្ឋរៀបចំការបោះឆ្នោតដំបូងគេ កាលពីថ្ងៃទី១កុម្ភៈ លោកចិប ប៊ូស ទទួលបានសំឡេងគាំទ្រមិនដល់ ៣%ផង ហើយស្ថិតនៅលំដាប់ទី ៦ បើធៀបនឹងបេក្ខជនផ្សេងទៀត ដែលមកពីគណបក្សសាធារណរដ្ឋដូចគ្នា។ នៅរដ្ឋបន្ទាប់មកទៀត គឺនៅរដ្ឋ New Hampshire អតីតអភិបាលរដ្ឋ Florida បានកើនសំឡេងមកដល់ ១១% ប៉ុន្តែ នៅតែចាញ់ប្រៀបឆ្ងាយពីបេក្ខជនផ្សេងទៀត ដោយស្ថិតនៅរហូតដល់ទៅលំដាប់ទី៤។
លទ្ធផលដ៏គួរឲ្យខកចិត្តជាបន្តបន្ទាប់នេះ គឺជាសម្ពាធដ៏ធំមួយ សម្រាប់លោក ចិប ប៊ូស ដោយសារតែលោកចាប់ផ្តើមបាត់ការគាំទ្រទាំងខាងនយោបាយ និងខាងហិរញ្ញវត្ថុ ពីសំណាក់អ្នកគាំទ្រគណបក្សសាធារណរដ្ឋ។ លោកចិប ប៊ូស បានដាក់ក្តីសង្ឃឹមច្រើនទៅលើរដ្ឋ South Carolina ក្នុងការស្តារប្រជាប្រិយភាពឡើងមកវិញ ដោយលោកបានទាក់ទាញបងប្រុសរបស់លោក គឺលោកចច ដាបិលយូ ប៊ូស ឲ្យចូលមកជួយធ្វើយុទ្ធនាការឃោសនាបោះឆ្នោត។ ក៏ប៉ុន្តែ នៅទីបំផុតទៅ លោកចិប ប៊ូស នៅតែត្រូវទទួលបរាជ័យ ដោយទទួលបានសំឡេងគាំទ្រតែ ៨% ប៉ុណ្ណោះ និងស្ថិតនៅយ៉ាងដាច់ឆ្ងាយពីលោកដូណាល់ ត្រាំ។
នៅយប់ថ្ងៃសៅរ៍ ក្រោយពីការប្រកាសលទ្ធផលនៅរដ្ឋ South Carolina លោកចិប ប៊ូស ក៏បានប្រកាសទាំងទឹកភ្នែកដកខ្លួនចេញពីការបោះឆ្នោតប្រធានាធិបតី ហើយក្តីសង្ឃឹមដែលថានឹងអាចមានមនុស្សទី៣ នៃត្រកូលប៊ូស នៅសេតវិមាន ក៏ត្រូវរលាយតែត្រឹមនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ