ដោយសារជំងឺកូវីដ១៩ បទឈប់បាញ់ នៅក្នុងតំបន់ជម្លោះក្នុងពិភពលោក ត្រូវបានប្រកាសជាបន្តបន្ទាប់
អង្គការសហប្រជាជាតិ កាលពីថ្ងៃព្រហស្បតិ៍ បានថ្លែងស្វាគម ជំហររបស់ក្រុមជម្លោះប្រដាប់អាវុធ នៅក្នុងប្រទេសមួយចំនួន ដូចជា ស៊ីរី យេម៉ែនជាដើម ដែលបានប្រកាសផ្អាកប្រយុទ្ធគ្នាមួយរយៈ ដើម្បី ប្រឈមទប់ទល់នឹងវិបត្តិជំងឺកូវីដ ១៩។ បទឈប់បាញ់របស់ភាគីជម្លោះ នៅបណ្តាប្រទេសកំពុងមានសង្រ្គាមស៊ីវិល នឹងអាចទទួលការគាំទ្រ នៅក្នុងសេចក្តីសម្រេចចិត្តរបស់ក្រុមប្រឹក្សាសន្តិសុខ និងមហាសន្និបាតរបស់អង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
ក្រុមជម្លោះប្រដាប់អាវុធ នៅស៊ីរី យេម៉ែន ហ្វីលីពីន និងកាមឺរូនបានឆ្លើយតបជាវិជ្ជមានទៅនឹងការអំពាវនាវរបស់អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយទែរស៍ ដែល បានអំពាវនាវ កាលពីថ្ងៃចន្ទ ឲ្យមានបទឈប់បាញ់ជាបន្ទាន់ ដើម្បីការពារជីវិតប្រជាជនស៊ីវិល ពីជំងឺរាតត្បាតកូវីដ ១៩ នៅក្នុងបណ្តាប្រទេសដែលកំពុងមានសង្រ្គាមស៊ីវិល។
នៅស៊ីរី ជាទី ដែលគេរកឃើញ មានករណីអ្នកផ្ទុកមេរោគកូរ៉ូណា លើកដំបូង នៅក្នុងតំបន់អ៊ីដលិប ដែលគ្រប់គ្រងដោយក្រុមប្រឆាំង នៅភាគខាងជើងស៊ីរី ក្រុមប្រឆាំងគួដស៊ីរីបានប្រកាសគាំទ្រ គំនិតឲ្យមានបទឈប់បាញ់មួយរយៈ និងសន្យាថា ពួកគេនឹងព្យាយាមកាត់បន្ថយ ការប្រឈមមុខយោធា ជាមួយ ភាគីកងទ័ពរដ្ឋាភិបាល នៅក្នុងកាលៈទេសៈនៃជំងឺឆ្លងរាតត្បាតកូវីដ ១៩។
តាមអ្នកជំនាញរបស់អង្គការសហប្រជាជាតិ ប្រជាជនស៊ីវិលស៊ីរី ប្រមាណ ៤លាននាក់ ដែលត្រូវផ្លាស់ទី ដោយសារសង្រ្គាមស៊ីវិល នឹងអាចប្រឈមខ្លាំង នឹងជំងឺរាតត្បាតកូវីដ ១៩ ដោយសារថា ប្រព័ន្ធសុខាភិបាល អគារមន្ទីរពេទ្យ រងការបំផ្លាញ ដ៏ធ្ងន់ធ្ងរ ដោយសារសង្រ្គាមស៊ីវិល ដែលអូសបន្លាយពេល ជាង៩ឆ្នាំមកហើយ។
នៅយេម៉ែនឯណោះវិញ ភាគីជម្លោះសំខាន់ទាំងពីរ គឺកងទ័ព រដ្ឋាភិបាលដែលគាំទ្រដោយអារ៉ាប៊ី សាអូឌីត និងក្រុមឧទ្ទាមហ៊ូទី គាំទ្រដោយអ៊ីរ៉ង់ បានប្រកាសផ្អាកប្រយុទ្ធគ្នាមួយរយៈ ផងដែរ ដោយសារតែជំងឺកូវីដ១៩។ បេសកជនពិសេសរបស់អង្គការសហប្រជាជាតិប្រចាំប្រទេសយេម៉ែន កាលពីថ្ងៃម្សិលមិញ បានថ្លែងសាទរ ជំហរបទឈប់បាញ់របស់ភាគីជម្លោះ ក្នុងការប្រឈមទប់ទល់នឹងកូវីដ ១៩។ តាមប្រេសិត របស់អង្គការសហប្រជាជាតិ បទឈប់បាញ់រវាងភាគីជម្លោះ នឹងអាច សម្រួលបើកផ្លូវឲ្យមានជំនួយមនុស្សធម៌សម្រាប់ប្រជាជនដែលកំពុងរងគ្រោះរួចទៅហើយ ដោយសារភាពអត់ឃ្លាន និងជំងឺអាសន្នរោគ។
រហូតមកដល់ពេលនេះ យេម៉ែន នៅមិនទាន់មានករណីអ្នកផ្ទុកមេរោគណាម្នាក់នៅឡើយទេ។ ប៉ុន្តែ គេបារម្ភថា ដូចជាប្រទេសផ្សេងទៀត ដែលកំពុងរងបំផ្លាញញាំញី ដោយសារសង្រ្គាមស៊ីវិល យេម៉ែន ដែលកំពុងមានវិបត្តិមនុស្សធម៌ ខ្វះថ្នាំពេទ្យ ខ្វះមន្ទីរពេទ្យ នឹងអាចជួបគ្រោះអន្តរាយបាត់បង់ជីវិតមនុស្សមួយទៀត ដោយសារ កូវីដ ១៩ ដែលគ្មានថ្នាំព្យាបាល និងគ្មានវាក់សាំង។
តាមមន្រ្តីរបស់អង្គការសហប្រជាជាតិ ក្រៅតែពីយេម៉ែន និងស៊ីរី ក្រុមប្រដាប់អាវុធ នៅប្រទេសពីរផ្សេងទៀត គឺហ្វីលីពីន និងកាមូរ៉ូនបានឆ្លើយតបជាវិជ្ជមានទៅនឹងការអំពាវនាវរបស់អគ្គលេខាធិការអង្គការសហប្រជាជាតិ ដោយបានប្រកាសផ្អាកប្រយុទ្ធគ្នាមួយរយៈ។ ក្រុមឧទ្ទាមរបស់បក្សកម្មុយនិស្តហ្វីលីពីន ដែលបានបើកការប្រយុទ្ធ ចង់ផ្តួលរដ្ឋាភិបាលហ្វីលីពីនកន្លងមក បានប្រកាសបទឈប់បាញ់ កាលពីថ្ងៃអង្គារកន្លងទៅ។ សម្រាប់អគ្គលេខាធិការអង្គការសហប្រជាជាតិ បទឈប់បាញ់ នឹងក្លាយជាឧទាហករណ៍ សម្រាប់ការដាក់អាវុធចុះនៅក្នុងពិភពលោក ដើម្បី ប្រមូលមនុស្ស ប្រមូលកម្លាំង ទុកប្រឆាំងទប់ទល់នឹងជំងឺកូវីដ ១៩ ដែលកំពុងរាតត្បាត ខ្លាំងពេញសកលលោក។
តាមមន្រ្តីអង្គការសហប្រជាជាតិ ដែលសុំមិនបញ្ចេញឈ្មោះ ជំហរបទឈប់បាញ់របស់ភាគីជម្លោះ ខាងលើ នឹងអាចត្រូវដាក់បញ្ចូលក្នុងសេចក្តីសម្រេចចិត្តរបស់ក្រុមប្រឹក្សាសន្តិសុខរបស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ