FMI ផ្តល់ប្រាក់កម្ចី ៧៤៥លានដុល្លារ ដល់ ទុយនីស៊ី ដើម្បីដោះស្រាយវិបត្តិកូវីដ១៩
អង្គការមូលនិធិរូបិយវត្ថុអន្តរជាតិ (FMI) បានសម្រេចផ្តល់ប្រាក់កម្ចី ចំនួន៧៤៥លានដុល្លារ ទៅឱ្យទុយនីស៊ី ដើម្បីជួយប្រយុទ្ធប្រឆាំងនឹងការរីករាលដាលកូវីដ១៩។ រដ្ឋមន្ត្រីក្រសួងហិរញ្ញវត្ថុទុយនីស៊ី បានបញ្ជាក់នៅថ្ងៃទី១០មេសាថា ទុយនីស៊ី បានទទួលកញ្ចប់លុយកម្ចីពី អង្គការរូបិយវត្ថុអន្តរជាតិ បន្ទាប់ពីប្រទេសខ្លួនបានដាក់ពាក្យស្នើសុំខ្ចី អស់រយៈចំនួនបីសប្តាហ៍រួចមក។
ចុះផ្សាយនៅថ្ងៃ៖
ស្តាប់ - ០២:២១
អង្គការមូលនិធិរូបិយវត្ថុអន្តរជាតិ(FMI) ផ្តល់កម្ចីប្រាក់យ៉ាងបន្ទាន់ ដល់ប្រទេសទុយនីស៊ី គឺបន្ទាប់ពីមើលឃើញពីវិបត្តិសេដ្ឋកិច្ចដ៏អាក្រក់ធ្ងន់ធ្ងរខ្លាំង មិនធ្លាប់ជួបសោះ នៅទុយនីស៊ី ចាប់តាំងពីស្គាល់ឯករាជ្យនៅឆ្នាំ១៩៥៦មក។ នេះបើតាមការគូសបង្ហាញ ក្នុងសេចក្តីថ្លែងការណ៍របស់ FMI ដោយបញ្ជាក់បន្ថែមថា សេដ្ឋកិច្ចរបស់ទុយនីស៊ី នឹងធ្លាក់ចុះ៤,៣ភាគរយ នៅឆ្នាំ២០២០នេះ ព្រោះតែវិបត្តិមេរោគឧត្បាតកូវីដ១៩។
បើតាមអាជ្ញាធរទុយនីស៊ី, ជំនួយជាប្រាក់កម្ចីរបស់ស្ថាប័នអន្តរជាតិនេះ នឹងត្រូវប្រើប្រាស់សម្រាប់ចាត់ចែងទប់ទល់នឹងការរីករាលដាលមេរោគកូរ៉ូណាថ្មី, ប្រើសម្រាប់កាត់បន្ថយដោះស្រាយ បញ្ហាផ្នែកសង្គមនិងសេដ្ឋកិច្ច នៅក្នុងបរិបទមួយលំបាកបំផុត មិនធ្លាប់មានសោះ នៅក្នុងប្រទេសនៅពិភពអារ៉ាប់មួយនេះ។
ទន្ទឹមនឹងគ្នានេះ អគ្គនាយករងមូលនិធិរូបិយវត្ថុអន្តរជាតិ លោក Mitsuhiro Furusawa បានលើកឡើងថា អាជ្ញាធរទុយនីស៊ី ត្រូវមានវិធានការដោះស្រាយបន្ទាន់និងផ្តោតសំខាន់បំផុតទៅលើផ្នែកសុខាភិបាល, ចាត់ចែងផ្នែកសង្គមកិច្ច និងជួយសម្រួលការលំបាករបស់ក្រុមហ៊ុនសហគ្រាស។ អាជ្ញាធរត្រូវធ្វើយ៉ាងទប់ទល់ការធ្លាក់ថ្លៃប្រេង ហើយនិង ត្រូវរកយន្តការកែសម្រួលការធ្លាក់ចុះសេវាកម្មសាធារណៈ ដែលធ្លាក់ចុះយ៉ាងគំហុក ព្រោះតែកូវីដ១៩។
បើតាមអ្នកជំនាញកិច្ចការទុយនីស៊ី, ទោះបីជា ប្រទេសមួយនេះ ទទួលបានប្រាក់កម្ចី ចំនួនរាប់រយលានដុល្លារពី FMI ហើយក្តី ក៏វាមិនគ្រប់គ្រាន់ឡើយសម្រាប់ដោះស្រាយបញ្ហានៅក្នុងស្រុក។ ហេតុនេះ ទុយនីស៊ី នៅតែបន្តត្រូវការប្រាក់ជំនួយនិយោគ និង កម្ចីគ្មានសំណង ផ្សេងៗទៀតពីដៃគូវិនិយោគ ដើម្បីជួយស្រោចស្រង់ប្រទេសនេះ ចេញពីវិបត្តិបំណុល និងវិបត្តិមហន្តរាយកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ