យេម៉ែន៖កិច្ចព្រមព្រៀងសន្តិភាពរវាងរដ្ឋាភិបាល និងពួកអ្នកទាមទារផ្តាច់ទឹកដីនិយមកំពុងជួបគ្រោះថ្នាក់
នៅក្នុងប្រទេសយេម៉ែន ក្រុមអ្នកទាមទារផ្តាច់ទឹកដីនិយមបានប្រកាសក្នុងថ្ងៃអាទិត្យ ទី២៦ មេសាពីការដាក់តំបន់ប៉ែកខាងត្បូងជាតំបន់ស្វយ័ត។ ការសម្រេចជាអន្តោម័តរបស់ក្រុមអ្នកទាមទារផ្តាច់ទឹកដីនិយមយ៉ាងដូចនេះបានធ្វើឲ្យប៉ះពាល់ដល់កិច្ចព្រមព្រៀងដែលពួកគេបានចុះហត្ថលេខាជាមួយរដ្ឋាភិបាល និងបានរុញទម្លាក់ថែមទៀតនូវជម្លោះរវាងរដ្ឋាភិបាល និងក្រុមឧទ្ទាមហ៊ូទីដែលកំពុងកាន់កាប់នៅតំបន់ប៉ែកខាងជើង។ គួររម្លឹកថា យេម៉ែនបានធ្លាក់ក្នុងសង្រ្គាមផ្ទៃក្នុងហែកហួរគ្នាតាំងពីឆ្នាំ ២០១៤ មកម្ល៉េះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
គឺតាមរយៈសេចក្តីប្រកាសព័ត៌មានមួយដែលក្រុមប្រឹក្សាអន្តរកាលប៉ែកខាត្បូងបានប្រកាសស្វ័យភាពក្នុងតំបន់ដែលខ្លួនកំពុងឈរជើង។ តាមរយៈសេចក្តីប្រកាសព័ត៌មានដដែល ក្រុមអ្នកទាមទារផ្តាច់ទឹកដីនិយមបានទម្លាក់ការទទួលខុសត្រូវលើរដ្ឋាភិបាលទទួលស្គាល់ដោយអង្គការសហប្រជាជាតិពីបទមិនគោរពកាតព្វកិច្ច និងបានប្រឆាំងនឹងបុព្វហេតុនៃតំបន់ប៉ែកខាងត្បូង។ ហេតុអ្វីបានជាមានការប្រកាសស្វ័យភាពនៅពេលនេះ ព្រោះតាមពិតទៅ និងអ្វីដែលក្រុមអ្នកបះបោរនៅប៉ែកខាងត្បូងចង់បានតាំងពីដើម គឺឯករាជ្យភាពទេតើ។ តែក្នុងពេលជាមួយគ្នានេះ ពួកគេក៏បានចុះហត្ថលេខាលើកិច្ចព្រមព្រៀងសន្តិភាពមួយជាមួយរដ្ឋាភិបាលកាលពីខែវិច្ឆិកា ឆ្នាំ ២០១៩ ក្នុងប្រទេសអារ៉ាប៊ីសាអូឌីត។
កិច្ចព្រមព្រៀងសន្តិភាពកាលណោះបានបិទបញ្ចប់ការប្រឈមមុខដាក់គ្នារវាងកម្លាំងរដ្ឋាភិបាល និងកម្លាំងអ្នកទាមទារផ្តាច់ទឹកដីនិយម។ ដូច្នេះចង់ ឬមិនចង់ ការសម្រេចជាអន្តោម័តរបស់ក្រុមអ្នកទាមទារផ្តាច់ទឹកដីនិយមពេលនេះបានធ្វើឲ្យអតីតសម្ព័ន្ធមិត្តទាំងពីរវិលត្រឡប់ទៅប្រឈមមុខដាក់គ្នាជាថ្មីក្នុងពេលដែលប្រទេសកំពុងប្រឈមទប់នឹងការឆ្លងរបស់ជំងឺកូវីដ-១៩។ ទន្ទឹមគ្នានេះ ភាពប្រេះឆាជាថ្មីរវាងរដ្ឋាភិបាល និងក្រុមអ្នកទាមទារផ្តាច់ទឹកដីនិយមនៅប៉ែកខាងត្បូងនឹងអាចរុញជម្លោះរវាងរដ្ឋាភិបាល និងក្រុមឧទ្ទាមហ៊ូទីដែលកំពុងគ្រប់គ្រងតំបន់ប៉ែកខាងជើងឲ្យធ្លាក់ដុនដាបកាន់តែខ្លាំងដែរ។
ខុសពីពួកអ្នកទាមទារផ្តាច់ទឹកដីនិយមនៅប៉ែកខាងត្បូង ក្រុមឧទ្ទាមហ៊ូទីនៅប៉ែកខាងជើងដែលគាំទ្រដោយប្រទេសអ៊ីរ៉ង់មិនបានចុះហត្ថលេខាលើកិច្ចព្រមព្រៀងសន្តិភាពជាមួយរដ្ឋាភិបាលទេ។ ការវាយប្រហារផ្លូវយោធារវាងកម្លាំងរដ្ឋាភិបាល និងកម្លាំងឧទ្ទាមហ៊ូទីនារយៈពេល ៥ឆ្នាំចុងក្រោយបានបណ្តាលឲ្យមានជនស៊ីវិលស្លាប់ជាច្រើនពាន់នាក់ និងបានរុញប្រទេសឲ្យធ្លាក់ក្នុងមហន្តរាយមនុស្សធម៌ដ៏អាក្រក់ខ្លាំងជាងគេក្នុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ