ឆ្មាំបដិវត្តអ៊ីរ៉ង់ ចេញមុខព្រមានអាមេរិកភ្លាមៗក្រោយមាននាវាចម្បាំងជាច្រើនគ្រឿងក្នុងដៃ
ឆ្មាំបដិវត្តអ៊ីរ៉ង់ នៅថ្ងៃព្រហស្បតិ៍ ទី ២៨ ឧសភា បានចេញមុខព្រមានអាមេរិកថាអ៊ីរ៉ង់ ប្រឆាំងជាដាច់ខាតទៅនឹងវត្តមានរបស់កងទ័ពជើងទឹកអាមេរិកនៅក្នុងតំបន់ឈូងសមុទ្រពែក្ស។ ការប្រកាសព្រមានខាងលើនេះ ត្រូវគេដឹងថា ធ្វើឡើងក្តៅៗភ្លាមតែម្តង បន្ទាប់ពីប្រទេសអ៊ីរ៉ង់ ទទួលបាននាវាចម្បាំង និងទូកល្បាតថ្មីៗនៅក្នុងដៃជាង ១០០ គ្រឿងរួចមក។
ចុះផ្សាយនៅថ្ងៃ៖
ស្តាប់ - ០២:១២
នាវាចម្បាំង និងទូកល្បាតថ្មីៗទាំងនោះ រួមមានដូចជានាវាល្បាតតាមឆ្នេរសមុទ្រ Zolfaghar នាវាមុជទឹក Taregh និងទូកល្បឿនលឿន Ashura ជាដើម។ ឧត្តមសេនីយ៍ ហូសស៊ីន សាឡាមី មេបញ្ជាការកងឆ្មាំបដិវត្តអ៊ីរ៉ង់ បាននិយាយថា ការពង្រីកអំណាចកងទ័ពជើងទឹកអ៊ីរ៉ង់ ដើម្បីការពារខ្លួនគឺជារឿងដែលអ៊ីរ៉ង់ត្រូវតែធ្វើ។
ស្របពេលដែលអះអាងប្រាប់ថា ការពង្រឹងអំណាចផ្លូវទឹករបស់ក្រុងតេហេរ៉ង់ មិនមែនជាសកម្មភាពចង់វាយប្រយុទ្ធសត្រូវនោះ លោកមេបញ្ជាការ ហូសស៊ីន សាឡាមី បានសង្កត់ធ្ងន់ដែរថា អ៊ីរ៉ង់ នឹងមិនឱនក្បាលជាដាច់ខាតនៅចំពោះមុខសត្រូវ មិនថាសត្រូវនោះជាអ្នកណាឡើយ។
គួរគូសបញ្ជាក់ជូនថា ទំនាក់ទំនងរវាងប្រទេសអ៊ីរ៉ង់និងសហរដ្ឋអាមេរិក បានផ្តើមតានតឹងនឹងគ្នាខ្លាំងតាំងពីឆ្នាំ ២០១៨ នៅពេលដែលលោកប្រធានាធិបតីអាមេរិកដូណាល់ ត្រាំ សម្រេចដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ និងបានដាក់ទណ្ឌកម្មសេដ្ឋកិច្ចជាបន្តបន្ទាប់លើប្រទេសនេះ។
មួយវិញទៀត ទំនាក់ទំនងរវាងអាមេរិក-អ៊ីរ៉ង់ កាន់តែអាក្រក់ទ្វេឡើងនៅក្នុងខែមករាដើមឆ្នាំ ២០២០ នេះ បន្ទាប់ពីឧត្តមសេនីយអ៊ីរ៉ង់កាសឹម សូឡីម៉ានី ត្រូវយន្តហោះដ្រូនអាមេរិកបាញ់សម្លាប់នៅប្រទេសអ៊ីរ៉ាក់។
ប្រទេសអ៊ីរ៉ង់ រហូតមកទល់នឹងពេលនេះ មិនដែលចុះញ៉មនឹងសម្ពាធទណ្ឌកម្មរបស់អាមរិក ដែលធ្លាក់មកជាបន្តបន្ទាប់នោះឡើយ។ មិនតែប៉ុណ្ណោះ អ៊ីរ៉ង់ថែមទាំងបានធ្វើសកម្មភាពផ្គើនអាមេរិកជារឿយៗ មានដូចជាលូកដៃក្នុងកិច្ចការប៉ាឡេស្ទីននិងបន្តចម្រើនសារធាតុអ៊ុយរ៉ាញ៉ូមជាដើម។
នៅថ្ងៃព្រហស្បតិ៍ ទី ២៨ ឧសភា ក្រុងតេហេរ៉ង់ ថែមទាំងបានអះអាងថា អ៊ីរ៉ង់ គ្មានបានរងផលប៉ះពាល់អ្វីពីទណ្ឌកម្មទាំងអស់របស់អាមេរិកដែលដាក់ធ្វើខ្លួនឡើយ។
គួររំឭកជូនថា នៅប៉ុន្មានថ្ងៃមុន សហរដ្ឋអាមេរិកបានសម្រេចបញ្ឈប់នូវរាល់ការលើកលែងចំពោះទណ្ឌកម្មដាក់លើអ៊ីរ៉ង់។ នេះ ជាការឆ្លើយតបយ៉ាងឆាប់រហ័សរបស់អាមេរិក ចំពោះសកម្មភាពផ្គើនរបស់អ៊ីរ៉ង់ដែលហ៊ានដឹកប្រេងចំនួន ៥កប៉ាល់ ក្នុងចំណុះ ១លាន ៥សែនធុងទៅឲ្យវ៉េណេស៊ុយអេឡា កាលពីថ្ងៃទី ២៤ ឧសភាកន្លងទៅ។
រដ្ឋមន្រ្តីការបរទេសអាមេរិកលោក ម៉ៃក៏ ប៉ុមប៉េអូ បាននិយាយ សហរដ្ឋអាមេរិកកំពុងឆ្លើយតបដោយ “ភាពឆ្លាតវៃ” ទៅកាន់ប្រទេសអ៊ីរ៉ង់ដែលកំពុងដើរលើផ្លូវបំផ្លាញខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ