អ៊ីស្រាអែលអាចកាត់យកដីស៊ីហ្សកដានីរបស់ប៉ាឡេស្ទីន ចាប់ពីថ្ងៃទី១កក្កដានេះ
ចាប់ពីថ្ងៃពុធ ទី១កក្កដានេះទៅ លោកនាយករដ្ឋមន្រ្តី អ៊ីស្រាអែល បិនចាមីន នេតាន់យ៉ាហ៊ូ នឹងអាចប្រកាសកាត់យកទឹកដីស៊ីហ្សកដានី របស់ប្រជាជនប៉ាឡេស្ទីន មកធ្វើជាដែនដីរបស់អ៊ីស្រាអែល។ រដ្ឋមន្រ្តីជាច្រើនរូបរបស់អ៊ីស្រាអែល ដែលនៅក្នុងនោះ មានផងដែរ រដ្ឋមន្រ្តីការបរទេស បានអះអាងថា រដ្ឋាភិបាលទំនងជានឹងមិនប្រកាសអ្វីទាក់ទងនឹងផែនការសន្តិភាពរបស់លោកដូណាល់ត្រាំនោះទេ។
ចុះផ្សាយនៅថ្ងៃ៖
ស្តាប់ - ០២:៣៨
ចាប់ពីថ្ងៃទី១កក្កដា នាយករដ្ឋមន្រ្តីអ៊ីស្រាអែល អាចប្រកាសកាត់យកទឹកដីប៉ាឡេស្ទីន នៅត្រង់តំបន់ស៊ីហ្សកដានី មកធ្វើជាដែនដីអ៊ីស្រាអែល។ ប៉ុន្តែ ទាំងរដ្ឋមន្រ្តីស្និទ្ធិនឹងនាយករដ្ឋមន្រ្តី និងរដ្ឋមន្រ្តីការបរទេសអ៊ីស្រាអែលបានអះអាងប្រាប់អ្នកកាសែតថា ហេតុការណ៍នោះ ទំនងនឹងមិនកើតមានភ្លាមៗ នៅថ្ងៃទី១កក្កដានេះទេ។
ទៅតាមកិច្ចព្រមព្រៀងនយោបាយរវាងមេដឹកនាំបក្សកាន់អំណាចទាំង២នៅអ៊ីស្រាអែល រដ្ឋាភិបាលចម្រុះ របស់អ៊ីស្រាអែល ចាប់ពីថ្ងៃទី១កក្កដា ត្រូវប្រកាសអនុវត្តផែនការសន្តិភាពរបស់ លោកដូណាល់ ត្រាំ សម្រាប់តំបន់ដើមបូព៌ា។ ផែនការសន្តិភាពអ៊ីស្រាអែល ប៉ាឡេស្ទីន ដែលផ្តួចផ្តើមដោយលោកដូណាល់ មានចែងអនុញ្ញាតឲ្យអ៊ីស្រាអែល អាចកាត់យកដែនអាណានិគមកិច្ចជ្វីហ្វ នៅក្នុងទឹកដីប៉ាឡេស្ទីន និងជ្រលងភ្នំJourdain នៅស៊ីហ្សកដានី មកធ្វើជាទឹកដីអ៊ីស្រាអែល។
នៅថ្ងៃអង្គារ លោកនាយករដ្ឋមន្រ្តីអ៊ីស្រាអែលបានជួប ឯកអគ្គរដ្ឋទូតអាមេរិកប្រចាំអ៊ីស្រាអែល និងទីប្រឹក្សាពិសេស របស់លោកដូណាល់ ត្រាំ ដើម្បីពិភាក្សាពីដែនអធិបតេយ្យភាពរបស់អ៊ីស្រាអែល។ ប្រមុខរដ្ឋាភិបាលអ៊ីស្រាអែលបានលើកឡើងថា លោកកំពុងធ្វើការ ជាប់ជាប្រចាំ លើផែនការរបស់លោកដូណាល់ ត្រាំ។
តាមអ្នកជំនាញ តំបន់ដើមបូព៌ា លោកនាយករដ្ឋមន្រ្តីអ៊ីស្រាអែល ដែលជាសម្ព័ន្ធមិត្ត ជិតស្និទ្ធិខ្លាំងនឹងប្រធានាធិបតី អាមេរិក កំពុងប្រញាប់ប្រញាល់ ដាក់ឲ្យអនុវត្តឲ្យបានឆាប់ ផែនការ របស់លោកដូណាល់ ត្រាំ ពោល គឺឲ្យបានមុនការជាប់ឆ្នោតណាមួយ របស់លោកចូបាយដិន គូប្រជែងរបស់លោកដូណាល់ ត្រាំ ដែលប្រឆាំងនឹងសំណង់អាណានិគមកិច្ចអ៊ីស្រាអែល នៅទឹកដីប៉ាឡេស្ទីន។
ការសម្រេចណាមួយ របស់នាយករដ្ឋមន្រ្តីអ៊ីស្រាអែល ទោះ នៅថ្ងៃនេះ ឬថ្ងៃស្អែក ឬថ្ងៃណាមួយ នាពេលខាងមុខ នឹងធ្វើឲ្យអ៊ីស្រាអែលអាចរំកិលខ្សែបន្ទាត់ព្រំដែន ពង្រីកទឹកដីរបស់ខ្លួន ឲ្យកាន់តែធំជាងមុន។ ជាព្រឹត្តិការណ៍សំខាន់ ក្នុងប្រវត្តិសាស្រ្តរបស់អ៊ីស្រាអែល ក្នុងរយៈពេល ៤០ឆ្នាំចុងក្រោយនេះ។ គួរបញ្ជាក់ថា នៅឆ្នាំ ១៩៦៧ អ៊ីស្រាអែល បានកាត់យកដែនដីប៉ាឡេស្ទីន នៅជេរុយសាឡិម ខាងកើត មកធ្វើជាកម្មសិទ្ធិរបស់ខ្លួន មុននឹងរឹបអូសយកខ្ពង់រាប ហ្កូឡង់ Golan របស់ស៊ីរីមកធ្វើជាទឹកដី អ៊ីស្រាអែល នៅឆ្នាំ ១៩៨១។ ២០២០ជាឆ្នាំថ្មីមួយទៀត ដែលប្រវត្តិសាស្រ្តអ៊ីស្រាអែល ត្រូវសរសេរដាក់បញ្ចូលដែនអាណានិគមកិច្ចជ្វីហ្វនៅស៊ីហ្សកដានី របស់ប៉ាឡេស្ទីន មកធ្វើជាដែនដីរបស់អ៊ីស្រាអែល។
ដោយចាប់អនុវត្តផែនការ សន្តិភាពរបស់ប្រធានាធិបតីអាមេរិក លោកដូណាល់ ត្រាំ អ៊ីស្រាអែលមានគម្រោងកាត់យកដែនដី ស៊ីហ្សកដានី របស់ប៉ាឡេស្ទីន ដែលជាហេតុធ្វើឲ្យប្រជាជនប៉ាឡេស្ទីន បណ្តាប្រទេសអារ៉ាប់ និងសហគមន៍អន្តរជាតិ ខឹងសម្បារ និងថ្កោលទោស។
នាយករដ្ឋមន្រ្តី អង់គ្លេសលោកបូរីស ចនសុន នៅថ្ងៃពុធនេះ បានព្រមានអ៊ីស្រាអែល ពីរឿងដែលចង់កាត់យកទឹកដីប៉ាឡេស្ទី មកធ្វើជាទឹកដីអ៊ីស្រាអែល ដែលលោកចាត់ទុកថា ខុសច្បាប់ និង ដើរផ្ទុយពីផលប្រយោជន៍របស់ជនជាតិជ្វីហ្វ។ នៅថ្ងៃនេះ ប្រជាជនប៉ាឡេស្ទីន បានអំពាវនាវឲ្យមានបាតុកម្ម ប្រឆាំងអ៊ីស្រាអែល នៅជ្រលងភ្នំ Jourdain និងនៅរ៉ាម៉ាឡា ដែលជាទីស្នាក់ការកណ្តាលរបស់អាជ្ញាធរប៉ាឡេស្ទីន។ សម្រាប់ប្រជាជនប៉ាឡេស្ទីន ការកាត់យកទឹកដីប៉ាឡេស្ទីន នៅត្រង់តំបន់ស៊ីហ្សកដានី នឹងសម្លាប់ទាំងស្រុង កិច្ចព្រមព្រៀងទីក្រុងអូស្លូ ដែលនិយាយពីដំណោះស្រាយ រដ្ឋពីរ គឺរដ្ឋប៉ាឡេស្ទីន ឯករាជ្យ ក្បែរអ៊ីស្រាអែល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ