ភាពតានតឹងកើនឡើងខ្លាំង រវាងអ៊ីស្រាអែល និងប៉ាឡេស្ទីន នៅតំបន់ហ្កាហ្សា
កងទ័ពអ៊ីស្រាអែលនៅថ្ងៃ អាទិត្យនេះ បានបើកការវាយប្រហារតាមផ្លូវអាកាសលើទីតាំង របស់ក្រុមហាម៉ាស និងបិទដែននេសាទ នៅហ្កាហ្សា ដែនដីប៉ាឡេស្ទីន នៅបន្ទាប់ពីមានការបាញ់ផ្លោង រ៉ុកកែត និងការបង្ហោះប៉េងប៉ោងភ្ជាប់គ្រាប់ផ្ទុះ ចេញពីតំបន់ហ្កាហ្សា សំដៅទឹកដីភាគខាងត្បូងអ៊ីស្រាអែល។ ភាពតានតឹង នៅព្រំដែន អ៊ីស្រាអែល និងហ្កាហ្សា របស់ប្រជាជនប៉ាឡេស្ទីន កើនឡើងមួយកម្រិតថែមទៀត នៅក្នុងបរិបទដែល អ៊ីស្រាអែលទើបបានចុះកិច្ចព្រមព្រៀង ចងស្ពានមេត្រី ជាមួយប្រទេសអារ៉ាប់មួយទៀត គឺអេមរ៉ាតអារ៉ាប់រួម ដែលប្រជាជនប៉ាឡេស្ទីនចាត់ទុកថា ជាការក្បត់ ផលប្រយោជន៍ប៉ាឡេស្ទីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
កងទ័ពអ៊ីស្រាអែល នៅថ្ងៃអាទិត្យនេះ បានសម្រេចបិទដែននេសាទរបស់ប្រជាជនប៉ាឡេស្ទីន បិទច្រកចេញចូលតែមួយ រវាងអ៊ីស្រាអែល ជាមួយហ្កាហ្សា និងបើកការវាយប្រហារតាមផ្លូវអាកាសលើទីតាំងរបស់ក្រុមហាម៉ាស នៅតំបន់ហ្កាហ្សា។ វិធានការរបស់កងទ័ពអ៊ីស្រាអែល ធ្វើឡើង នៅក្នុងកាលៈទេសៈ ដែលអ៊ីស្រាអែល និងប៉ាឡេស្ទីន កំពុងចាប់តានតឹង នឹងគ្នា កាន់តែខ្លាំង នៅមួយរយៈចុងក្រោយនេះ។
នៅចុងសប្តាហ៍កន្លងទៅ អ៊ីស្រាអែលបានបើកការវាយប្រហារតាមផ្លូវអាកាស សំដៅ ទីតាំងរបស់ក្រុមហាម៉ាស ដែលគ្រប់គ្រងតំបន់ហ្កាហ្សាប៉ាឡេស្ទីន នៅបន្ទាប់ពីខ្លែង និងប៉េងប៉ោង ដែលមានភ្ជាប់គ្រឿងផ្ទុះឆេះ ត្រូវបានបង្ហោះចេញពីតំបន់ហ្កាហ្សា ទៅធ្លាក់ឆេះ នៅទឹកដីភាគខាងត្បូង អ៊ីស្រាអែល។
តាមក្រុមពន្លត់អគ្គិភ័យអ៊ីស្រាអែល ខ្លែង និងប៉េងប៉ោង ភ្ជាប់គ្រឿងផ្ទុះបានបង្កឲ្យមានភ្លើងឆេះ រាប់រយកន្លែង ដែលនៅក្នុងមាន១៩កន្លែង នៅក្នុងថ្ងៃសៅរ៍ម្សិលមិញ។ នៅថ្ងៃអាទិត្យនេះ កងទ័ពអ៊ីស្រាអែលបានអះអាងថា ខ្លួនបានបើកប្រតិបត្តិការ ផ្លូវអាកាស វាយប្រហារ សាជាថ្មីទីតាំង ហេដ្ឋារចនាសម្ព័ន្ធរបស់ក្រុមហាម៉ាស ដែលមានផងដែរ កន្លែងស្តុកទុក គ្រាប់រ៉ុកកែត ប៉ុន្ទាប់ពីមានរ៉ុកកែត ៣ដើម ត្រូវគេបាញ់ចេញពីហ្កាហ្សា ចូលទឹកដី អ៊ីស្រាអែល នៅព្រឹកព្រលឹមថ្ងៃអាទិត្យ។
ភាពតានតឹង បានកើនឡើង នៅតាមព្រំដែនអ៊ីស្រាអែល ជាមួយតំបន់ហ្កាហ្សា ជាទី ដែលប្រជាជនប៉ាឡេស្ទីនបានចាប់ធ្វើកុប្បកម្ម គប់គ្រាប់បែក និងគ្រឿងផ្ទុះ សំដៅ របងសន្តិសុខ អ៊ីស្រាអែល ដើម្បីសំដែងកំហឹងតវ៉ារបស់ពួកគេ ទៅនឹងកិច្ចព្រមព្រៀងចងស្ពានមេត្រី ដែល អ៊ីស្រាអែល បានចុះជាមួយ អេមីរ៉ាតអារ៉ាប់រួម កាលពីថ្ងៃ ព្រហស្បតិ៍។
តាមអេមីរ៉ាតអារ៉ាប់រួម កិច្ចព្រមព្រៀង សន្តិភាព ជាមួយអ៊ីស្រាអែលនឹងធ្វើឲ្យអ៊ីស្រាអែល ឈប់កាត់យកដីប៉ាឡេស្ទីន នៅតំបន់ស៊ីហ្សកដានី។ អ៊ីស្រាអែលវិញ ប្រើពាក្យ ផ្អាកគម្រោងកាត់យកដីប៉ាឡេស្ទីន ប៉ុន្តែមិនមែនឈប់នោះទេ។ យ៉ាងណាក៏ដោយ សម្រាប់ ប្រជាជនប៉ាឡេស្ទីន ដោយចុះកិច្ចព្រមព្រៀង ចងស្ពានមេត្រីជាមួយ អ៊ីស្រាអែល ប្រទេសអារ៉ាប់ អេមីរ៉ាតអារ៉ាប់រួម បានក្បត់ផលប្រយោជន៍របស់ប្រជាជនប៉ាឡេស្ទីន។
ប៉ុន្តែ សម្រាប់អ្នកវិភាគប៉ាឡេស្ទីន ការបាញ់គ្រាប់រ៉ុកកែត និងការបញ្ជូនខ្លែង ប៉េងប៉ោងមានគ្រឿងផ្ទុះ ឲ្យទៅផ្ទុះធ្លាក់នៅក្នុងទឹកដីអ៊ីស្រាអែលជាចេតនារបស់ប្រជាជនប៉ាឡេស្ទីន ដើម្បី ដាក់សម្ពាធលើរដ្ឋាភិបាលអ៊ីស្រាអែល ឲ្យយល់ព្រមបើកផ្លូវ ឲ្យ មានជំនួយមនុស្សធម៌ របស់ប្រទេសកាតា សម្រាប់ប្រជាជនប៉ាឡេស្ទីន ទៅតាមកិច្ចព្រមព្រៀង បទឈប់បាញ់ កាលពីឆ្នាំមុន។
អ៊ីស្រាអែល ដែលបានធ្វើសង្រ្គាម ប្រយុទ្ធគ្នា ៣លើក ជាមួយ ក្រុមហាម៉ាស ប៉ាឡេស្ទីន បានយល់ព្រមចុះកិច្ចព្រមព្រៀង បទឈប់បាញ់ជាមួយក្រុមហាម៉ាស ក្រោមជំនួយអន្តរាគមន៍របស់អង្គការសហប្រជាជាតិ អេហ្ស៊ីប និងកាតារ។ ប៉ុន្តែ អ៊ីស្រាអែល ដែលឡោមព័ទ្ធជុំវិញ ទឹកដីហ្កាហ្សា របស់ប្រជាជនប៉ាឡេស្ទីន បានចេញមុខគ្រប់គ្រង ដែនអាកាស ដែនគោក និងដែនទឹករបស់ហ្កាហ្សា នៅក្រោមហេតុផល ការពារកុំឲ្យក្រុមហាម៉ាស បំពាក់អាវុធ សម្រាប់វាយប្រហារអ៊ីស្រាអែល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ