ប្រទេសអារ៉ាប់កាន់តែច្រើនបានធ្វើពហិការ មិនទិញផលិតផលបារាំង ដោយសាររូបត្លុកមហាម៉េដ
សារប្រឆាំងប្រធានាធិបតីបារាំង និងពហិការមិនទិញទំនិញបារាំង ផ្ទុះឡើងនៅបណ្តាប្រទេសអារ៉ាប់។ នៅថ្ងៃសៅរ៍ ប្រជាជនកាន់សាសនាអ៊ីស្លាម ប្រមាណ ២០០នាក់បានធ្វើបាតុកម្ម នៅមុខស្ថានទូតបារាំង ក្នុងទីក្រុងតែលអាវីវ ប្រទេសអ៊ីស្រាអែល ដើម្បីស្រែកបរិហារិះគន់ ប្រធានាធិបតី បារាំង លោកអេម៉ានុយអែល ម៉ាក្រុង។ ដោយសារតែ សុន្ទរកថា ទាក់ទងនឹងរូបត្លុក មហាម៉េដ លោកប្រធានាធិបតីបារាំង ម៉ាក្រុង កាលពីថ្ងៃសៅរ៍ម្សិលមិញ ត្រូវបានប្រធានាធិបតី តួកគី លោកអ៊ែរដូហ្កាន និយាយប្រមាថ ថា លោកត្រូវទៅពិនិត្យសុខភាព ខួរក្បាល ឡើងវិញ។
ចុះផ្សាយនៅថ្ងៃ៖
ស្តាប់ - ០៨:០៦
នៅក្នុងបណ្តាប្រទេសអារ៉ាប់ សារអំពាវនាវឲ្យធ្វើពហិការ មិនទិញទំនិញបារាំងបានកើនឡើងកាន់តែច្រើន នៅចុងសប្តាហ៍នេះ ដោយសារតែ សុន្ទរកថា ដ៏ចម្រូងចម្រាស របស់ប្រធានាធិបតីបារាំង ទាក់ទងនឹងរូបត្លុក ព្យាការី មហាម៉េដ។
សារជាភាសាអារ៉ាប់ ប្រឆាំងប្រធានាធិបតីបារាំង និងសារអំពាវនាវឲ្យធ្វើពហិកាមិនទិញទំនិញបារាំង ត្រូវបានបង្ហោះ ផ្សាយ នៅក្នុងបណ្តាញសង្គមតាំងពីថ្ងៃ សុក្រ ពោលគឺនៅមួយថ្ងៃក្រោយ ការថ្លែងសុន្ទរកថា របស់លោកប្រធានាធិបតីបារាំង លោកអេម៉ានុយអែល ម៉ាក្រុង នៅក្នុងពិធីគោរពវិញ្ញាណក្ខន្ធថ្នាក់ជាតិសម្រាប់គ្រូបង្រៀន Samuel Paty នៅសកលវិទ្យាល័យSorbonne។ នៅក្នុងពិធីបុណ្យគោរពវិញ្ញាណក្ខន្ធ លោកគ្រូ Samuel Paty ដែលត្រូវភេរវជនអ៊ីស្លាមជ្រុលនិយម សម្លាប់ ដោយសារ តែលោកគ្រូបានយករូបត្លុក ព្យាការី មហាម៉េដ មកបង្ហាញ បង្រៀនដល់សិស្ស លោកប្រធានាធិបតីបារាំងបានបញ្ជាក់ថា “បារាំង នឹងមិនបោះបង់ចោលទម្លាប់ គូររូបត្លុក នោះទេ”។
គឺពាក្យថា បារាំង “មិនឈប់គូររូបត្លុក”នេះហើយ ដែលធ្វើឲ្យប្រជាជនកាន់សាសនាអ៊ីស្លាម នៅក្នុងបណ្តាប្រទេសអារ៉ាប់ ខឹងមិនសប្បាយចិត្ត និងបានប្រកាសធ្វើពហិការ មិនទិញ ទំនិញបារាំង។ តួកគី អ៊ីរ៉ង់ ហ្សកដានី កាតា និងកូវ៉ែតធ្លាប់បានចេញមុខបរិហាររិះគន់ការចុះផ្សាយ រូបត្លុក ព្យាការី មហាម៉េដ ដែលមានប្រភពដើមចេញពីកាសែតបារាំង Charlie Hebdo។ អង្គការដើម្បីសហប្រតិបត្តិការអ៊ីស្លាម ដែលប្រមូលផ្តុំប្រទេសកាន់សាសនាអ៊ីស្លាម បានសំដែងការសោកស្តាយ ដោយសារតែសំដីរបស់អ្នកទទួលខុសត្រូវបារាំង មួយចំនួន នឹងអាចប៉ះពាល់ដល់ទំនាក់ទំនង បារាំង អ៊ីស្លាម។
នៅប្រទេសកាតារ ក្រុមហ៊ុនទទួលលក់ផលិតផលបារាំង បានប្រកាសថា ខ្លួននឹងដកផលិតផលបារាំង ចេញពីកន្លែងតាំងលក់ រហូតដល់មានការសម្រេចថ្មី។ សកលវិទ្យាល័យ នៅកាតារបានបញ្ជាក់ដែរថា ខ្លួនត្រូវផ្អាកព្យួរ ព្រឹត្តិការណ៍វិប្បធម៌បារាំង ដោយសារសំដីរបស់បារាំង បានទៅប៉ះពាល់អ៊ីស្លាម និងនិមិត្តរូបរបស់អ៊ីស្លាម។
រូបថតនៅលើបណ្តាញសង្គម បង្ហាញ សកម្មជនអ៊ីស្លាម លើកបដាវាយប្រហារលោកម៉ាក្រុង និងហាងទំនិញជាច្រើន ដែលគេបានដកផលិតផលបារាំង ដូចជា ហ្រ្វូម៉ាស ស្រា និងផលិតចេញពី Rayon។ នៅកូវ៉ែតដដែល ទីភ្នាក់ងារទេសចរណ៍ ជាង៣០០បានប្រកាសឈប់កក់ជើងហោះហើរទៅប្រទេសបារាំង។ នៅប្រទេសហ្សកដានី គណបក្សប្រឆាំងបានអំពាវនាវឲ្យគេធ្វើពហិការមិនទិញ ទំនិញបារាំង។ ពហិការ មិនឲ្យទិញទំនិញបារាំងនឹងអាចប៉ះពាល់ខ្លាំងដល់វិស័យនាំចេញផលិតផលកសិចំណីអាហាររបស់បារាំង បើសិន វា រីករាលដាលកាន់តែខ្លាំង នៅក្នុងបណ្តាប្រទេស ផ្សេងទៀត ដូចជាអារ៉ាប៊ី សាអូឌីត និងអេមីរ៉ា អារ៉ាប់រួម ដែលបានក្លាយជាទិសដៅនាំចេញសំខាន់នៃផលិតផលបារាំង។
ប្រធានាធិបតី អ៊ែដូហ្កាន ថា លោកប្រធានាធិបតីបារាំង ម៉ាក្រុង ត្រូវទៅឆែក ពិនិត្យមើលសុខភាពខួរក្បាល
សង្រ្គាមពាក្យសំដី ពាក្យទ្រគោះបោះបោករវាងប្រមុខរដ្ឋបារាំង និងប្រធានាធិបតីតួកគី មិនមែនទើបកើតមាន ជាលើកទី១នោះទេ។ លោកប្រធានាធិបតីតួកគី អ៊ែរដូហ្កាន ធ្លាប់បានដៀលលោកម៉ាក្រុងម្តងហើយថា ដូចជាមនុស្សស្លាប់ នៅក្រោយ លោកម៉ាក្រុង បានចាត់ទុក អង្គការអូតង់ ថា ជាស្ថាប័នដូចស្លាប់។
នៅមុននិយាយប្រមាថ ដេញលោកម៉ាក្រុង ឲ្យទៅពិនិត្យ ឆែកមើលសុខភាពខួរក្បាល កាលពីថ្ងៃសៅរ៍ លោក ប្រធានាធិបតីតួកគី ដែលកំពុងចង់ ពង្រឹង នយោបាយអ៊ីស្លាមនិយម ក្នុងប្រទេស បានបរិហាររិះគន់ វិធានការរបស់រដ្ឋាភិបាលបារាំង កាលពី ២សប្តាហ៍មុន នៅពេល លោកប្រធានាធិបតីបារាំង ឡើងថ្លែងពីភាពចាំបាច់ក្នុងការរៀបចំឡើងវិញ អ៊ីស្លាមនិយម នៅក្នុងទឹកដីបារាំង នៅក្នុងកាលៈទេសៈ ដែលបារាំងកំពុងបង្កើតច្បាប់ សម្រាប់ ប្រយុទ្ធប្រឆាំងនឹងក្រុមបំបែកខ្លួនអ៊ីស្លាម។
នៅថ្ងៃសៅរ៍ វិមានប្រធានាធិបតីបារាំង បានប្រតិកម្មប្រឆាំងតបនឹងការលើកឡើងរបស់ប្រធានាធិបតីតួកគី ដោយបានកោះហៅ ឯកអគ្គរដ្ឋទូតបារាំងចូលស្រុកវិញ ដើម្បីពិគ្រោះយោបល់។ នៅក្នុងប្រវត្តិទំនាក់ទំនងការទូតបារាំងនិង តួកគី នេះជាលើកទី ១ ដែលបារាំងកោះហៅ អង្គទូតរបស់ខ្លួនចូលប្រទេសវិញ ដើម្បី សំដែងការប្រឆាំងនឹងសំដីប្រមាថរបស់ប្រធានាធិបតីតួកគី។
សម្រាប់ វិមានអេលីហ្សេ សំដីជេរប្រមាថ បែបញុះញង់របស់ប្រធានាធិបតីតួកគី គឺជារឿងដែលមិនអាចទទួលយកបាន។ តាមវិមានប្រធានាធិបតីបារាំង តួកគីមិនបានសំដែង ការសោកស្តាយអ្វីនោះទេ នៅក្រោយ គ្រូបង្រៀនបារាំង ត្រូវភេរវក អ៊ីស្លាម សម្លាប់កាត់ក ប៉ុន្តែ តួកគីបែរជាចេញមុខ អុជអាល ឲ្យគេស្អប់ ពហិកាមិនទិញទំនិញបារាំង ដោយសារតែនយោបាយ ប្រយុទ្ធប្រឆាំង នឹងក្រុមអ៊ីស្លាមជ្រុលនិយមនៅទឹកដីបារាំង ទៅវិញ។
សម្រាប់ អ្នកជំនាញ តួកគី បានដំឡើងសំឡេង រិះគន់ប្រធានាធិបតីបារាំង កាន់តែខ្លាំង ចាប់តាំងពីប៉ុន្មានខែចុងក្រោយនេះ ដោយសារតែបារាំង បានចេញមុខ តតាំងប្រឆាំងរិះគន់ តួកគី ក្នុងសំណុំរឿងជាច្រើន ដែលមានតាំង ពី មហិច្ឆតារុករកប្រេងរបស់តួកគី នៅសមុទ្រមេឌីទែរ៉ាណេ ការលូកដៃរបស់តួកគី នៅក្នុងសង្រ្គាមលីប៊ី និងចុងក្រោយ នៅក្នុងសង្រ្គាមប្រយុទ្ធគ្នានៅការ៉ាបាក់ រវាងទ័ពអាស៊ែរបៃហ្សង់ និងទ័ពអាមេនី។ បារាំង ដែលជាសមាជិកសំខាន់មួយរបស់សហភាពអឺរ៉ុប បានព្រមាន សាជាថ្មី កាលពីថ្ងៃសៅរ៍ម្សិលមិញថា បើសិន តួកគី មិនព្រមឈប់មហច្ឆិតាយោធា និងការរុករកប្រេងនៅមេឌីទែរ៉ាណេ ទេ នោះតួកគីគឺមានពេលតែ២ខែទៀត ប៉ុណ្ណោះ មុននឹងត្រូវរងទណ្ឌកម្មសេដ្ឋកិច្ចពីសហភាពអឺរ៉ុប។
រូបត្លុក ព្យាការីមហាម៉េដ ជាប្រភពនៃការថ្នាំងថ្នាក់ចិត្តរបស់ប្រជាជនកាន់សាសនាអ៊ីស្លាម
សម្រាប់ប្រជាជនកាន់សាសនាអ៊ីស្លាម ការយកព្យាការីមហាម៉េដ មកគូរជារូបត្លុក កំប្លែង យ៉ាងដូច្នេះ គឺជារឿងមិនអាចទទួលយកបាននោះទេ។ នៅក្នុងសាសនាអ៊ីស្លាម គេហាមដាច់ខាតមិនឲ្យគូរ បញ្ចេញ រូបព្យាការី មហាម៉េដនោះទេ។ នៅតាមប្រទេសកាន់សាសនាអ៊ីស្លាមតឹងរ៉ឹងមួយចំនួន ការល្មើស គូរបង្ហាញរូបមហាម៉េដ របៀបមាក់វាយ នឹងត្រូវគេកាត់ទោសប្រហារជីវិត។
ប៉ុន្តែ សម្រាប់ រដ្ឋាភិបាលបារាំង ដែលប្រកាន់គោរពច្បាប់ សាធារណរដ្ឋ សិទ្ធិសេរីភាពក្នុងការបញ្ចេញមតិគឺជារឿងសំខាន់។ គួរបញ្ជាក់ថា បារាំងជាសាធារណរដ្ឋដែលមិនបានយកសាសនាណាមួយជាសាសនារបស់រដ្ឋទេ មានន័យថា ពលរដ្ឋមានសិទ្ធិជឿ គោរព និងប្រណិបត្តិសាសនារៀងៗខ្លួន។ នៅក្នុង ពិធីគោរពវិញ្ញាណក្ខន្ធ គ្រូបង្រៀន ដែលត្រូវ ឃាតករអ៊ីស្លាមជ្រុលនិយម សម្លាប់កាត់ក្បាល កាលពីសប្តាហ៍មុន លោកម៉ាក្រុង បានបញ្ជាក់ថា បារាំងនឹងមិនលះបង់ចោល សេរីភាព ទម្លាប់គូររូបត្លុក ដែលជាផ្នែកមួយ នៃ ការបញ្ចេញសិទ្ធិសេរីភាព បញ្ចេញមតិនៅសាធារណរដ្ឋបារាំងនោះទេ។ តាមរដ្ឋបារាំង ការបិទខ្ទប់ សេរីភាពបញ្ចេញមតិ ដើម្បីគ្រាន់តែ ការពារអារម្មណ៍របស់សហគមន៍សាសនាណាមួយ នឹងអាចទៅ ប៉ះពាល់ ដល់ការរួបរួមជាតិ របស់បារាំង។
សម្រាប់ ក្រុមសាសនាអ៊ីស្លាម ដែលដឹកនាំនៅតំបន់ហ្កាហ្សា ប៉ាឡេស្ទីន ការជេរប្រមាថសាសនា និង ព្យាការី មហាម៉េដ មិនមែនជាសេរីភាព បញ្ចេញមតិនោះទេ។ ប៉ុន្តែ ជាវាការជំរុញ ឲ្យមានវប្បធម៌ ស្អប់ទៅវិញទេ។ អ្នកកាន់សាសនាអ៊ីស្លាមជឿថា ច្បាប់ប្រឆាំង ក្រុមបំបែកខ្លួនអ៊ីស្លាមនិយម នៅបារាំង នឹងរឹតតែធ្វើឲ្យក្រុមស្តាំនិយមជ្រុល បានដៃ មានកម្លាំង ខ្លាំង ដើម្បី រើសអើង វាយប្រហារ អ្នកកាន់សាសនាអ៊ីស្លាម នៅប្រទេសបារាំង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ