ប្រមុខការទូតបារាំងបំពេញទស្សនកិច្ចនៅអេហ្ស៊ីបដើម្បីកាត់បន្ថយភាពតានតឹងជាមួយពិភពអ៊ីស្លាម
នៅថ្ងៃអាទិត្យ ទី៨ វិច្ឆិកា ប្រមុខការទូតបារាំងលោកហ្សង់អ៊ីវ ឡឺឌ្រីយ៉ង់បានបំពេញទស្សនកិច្ចនៅក្នុងប្រទេសអេហ្ស៊ីប។ កម្មវត្ថុនៃដំណើរទស្សនកិច្ច គឺដើម្បីកាត់បន្ថយភាពតានតឹងរវាងបារាំង និងពិភពអ៊ីស្លាម ក្រោយពីប្រធានាធិបតីបារាំងលោកម៉ាក្រុងបានចាត់ទុកការបង្ហាញរូបត្លុកព្យាការីអ៊ីស្លាមមហាម៉េដជាសេរីភាពនៃការបញ្ចេញមតិ។ នៅក្នុងទីក្រុងគែរ លោកឡឺឌ្រីយ៉ង់បានជួបសន្ទនាជាមួយប្រធានាធិបតីអេហ្ស៊ីបលោកអាល់ស៊ីស៊ី និងប្រមុខការទូតអេហ្ស៊ីបលោកឈូគ្រី។ លោកឡឺឌ្រីយ៉ង់បានធានាថា បារាំងមានការគោរពយ៉ាងជ្រាលជ្រៅចំពោះអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:១៤
« ខ្ញុំបានបញ្ជាក់ ហើយខ្ញុំបញ្ជាក់ជាថ្មីនៅទីនេះពីការគោរពយ៉ាងជ្រាលជ្រៅចំពោះអ៊ីស្លាម។ អ្វីដែលយើងប្រយុទ្ធប្រឆាំង គឺភេរវនិយម និងភាពជ្រុលនិយម » នេះជាការថ្លែងរបស់លោកឡឺឌ្រីយ៉ង់នៅក្នុងសន្និសីទកាសែតមួយ បន្ទាប់ពីលោកបានជួបសន្ទនាជាមួយប្រធានាធិបតីអេហ្ស៊ីបលោកអាល់ស៊ីស៊ីរយៈពេល ២ម៉ោង និងមានកិច្ចប្រជុំការងារជាមួយសមភាគីអេហ្ស៊ីបលោកឈូគ្រី។ ការថ្លែងរបស់លោកឡឺឌ្រីយ៉ង់យ៉ាងដូចនេះមានគោលដៅកាត់បន្ថយភាពតានតឹងរវាងបារាំង និងពិភពអ៊ីស្លាម។ ភាពតានតឹងរវាងបារាំង និងពិភពអ៊ីស្លាមបានផ្ទុះឡើង បន្ទាប់ពីប្រធានាធិបតីបារាំងលោកម៉ាក្រុងបានថ្លែងក្នុងថ្ងៃទី២៥ តុលានាឱកាសពិធីគោរពវិញ្ញាណក្ខន្ធគ្រូបង្រៀនដែលត្រូវភេរវជនសម្លាប់ដោយកាត់ក្បាលក្នុងថ្ងៃទី១៦ តុលាថា បារាំងនឹងមិនបោះបង់គំនូរត្លុកដែលជាផ្នែកមួយនៃសេរីភាពក្នុងការបញ្ចេញមតិទេ។
គួររម្លឹកថា គ្រូបង្រៀនដែលភេរវជនបានសម្លាប់ដោយកាត់ក្បាលក្នុងថ្ងៃទី១៦ តុលាបានបង្ហាញរូបត្លុកព្យាការីមហាម៉េដដល់កូនសិស្ស។ អ្នកកាន់សាសនាអ៊ីស្លាមក្នុងប្រទេសមួយចំនួនបានចាត់ទុកការថ្លែងរបស់លោកម៉ាក្រុងជាការជេរប្រមាថសាសនាអ៊ីស្លាម។ ពួកគេបានចុះធ្វើបាតុកម្មតវ៉ាដោយដុតរូបថតលោកម៉ាក្រុង និងអំពាវនាវឲ្យធ្វើពហិការលើផលិតផលបារាំង។ នៅអេហ្ស៊ីប ប្រមុខសាសនាអ៊ីស្លាមបានរិះគន់បារាំងដោយយល់ឃើញថា ការជេរប្រមាថសាសនា និងការវាយប្រហារលើនិមិត្តរូបជាទីសក្ការៈក្រោមហេតុផលសេរីភាពនៃការបញ្ចេញមតិ គឺជាការអំពាវនាវឲ្យមានការស្អប់ខ្ពើម។ ចំណែកលោកអាល់ស៊ីស៊ីក៏បានថ្លែងការពារតម្លៃសាសនាដោយទាត់ចោលការជេរប្រមាថព្យាការីមហាម៉េដ។
ក្រៅពីព្យាយាមកាត់បន្ថយភាពតានតឹងរវាងបារាំង និងពិភពអ៊ីស្លាម លោកឡឺឌ្រីយ៉ង់ក៏បាននិយាយពីអ្នកទោសនយោបាយអេហ្ស៊ីប។ តែប្រមុខការទូតអេហ្ស៊ីបបានបញ្ជាក់ថា គ្មានការឃុំខ្លួនក្រៅប្រព័ន្ធតុលាការ និងថា អេហ្ស៊ីបជាប្រទេសនីតិរដ្ឋ។ តាមក្រុមអង្គការសិទ្ធិមនុស្ស អេហ្ស៊ីបមានអ្នកទោសនយោបាយប្រមាណ ៦០ ០០០នាក់។ ចេញពីអេហ្ស៊ីប ប្រមុខការទូតបារាំងនឹងបន្តទស្សនកិច្ចនៅប្រទេសម៉ារ៉ុកក្នុងថ្ងៃចន្ទ ទី៨ វិច្ឆិកានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ