ប្រទេសកាតាអំពាវនាវឲ្យក្រុមប្រទេសអារ៉ាប់នៅឈូងសមុទ្រពែក្សមានកិច្ចសន្ទនាជាមួយប្រទេសអ៊ីរ៉ង់
នៅថ្ងៃអង្គារ ទី១៩ មករា ប្រមុខការទូតនៃប្រទេសកាតាលោកអាល់ ថានីបានអំពាវនាវឲ្យក្រុមប្រទេសអារ៉ាប់ក្នុងតំបន់ឈូងសមុទ្រពែក្សផ្តើមកិច្ចសន្ទនាជាមួយប្រទេសអ៊ីរ៉ង់។ ការអំពាវនាវរបស់លោកថានីបានឡើង បន្ទាប់ពីកាតា និងក្រុមប្រទេសជិតខាងរបស់កាតាចំនួន ៤ ទើបបានផ្សះផ្សាគ្នាឡើងវិញនៅដើមខែមករា ឆ្នាំ ២០២១ នេះ។ គួររម្លឹកថាអស់រយៈពេលជាង ៣ឆ្នាំ ពោលតាំងពីខែមិថុនា ឆ្នាំ ២០១៧ ដែលប្រទេសកាតាត្រូវបានប្រទេសអារ៉ាប់ចំនួន ៤ ព្យួរទំនាក់ទំនងដោយសារកាតាមានទំនោរខ្លាំងរកអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ការអំពាវនាវយ៉ាងដូចនេះរបស់ប្រមុខការទូតកាតាលោកអាល់ ថានីបានធ្វើឡើងនៅក្នុងបទសម្ភាសន៍មួយជាមួយទូរទស្សន៍ Bloomberg។ នៅក្នុងបទសម្ភាសន៍នោះ លោកថានីចង់ឃើញប្រទេសអារ៉ាប់ផ្សេងដែលជាសមាជិកនៃក្រុមប្រឹក្សាសហប្រតិបត្តិការឈូងសមុទ្រពែក្សមានកិច្ចសន្ទនាជាមួយប្រទេសអ៊ីរ៉ង់។ ទោះបីជាលោកថានីមិនបាននិយាយចំឈ្មោះប្រទេសណាមួយក៏ដោយក៏គេដឹងថាក្រៅពីកាតាខ្លួនឯង អារ៉ាប៊ីសាអូឌីត បារ៉ែន អេមីរ៉ាតអារ៉ាប់រួម អូម៉ង់ និងកូវ៉ែតក៏ជាប្រទេសសមាជិកស្ថិតក្នុងក្រុមប្រឹក្សាសហប្រតិបត្តិការឈូងសមុទ្រពែក្សដែរ។
តែអ្វីជាការកត់សម្គាល់ មានប្រទេសអារ៉ាប់ចំនួន ៤ប្រទេស ក្នុងនោះមាន ៣ប្រទេសជាសមាជិកក្នុងក្រុមប្រឹក្សាសហប្រតិបត្តិការឈូងសមុទ្រពែក្ស គឺអារ៉ាប៊ីសាអូឌីត បារ៉ែន និងអេមីរ៉ាតអារ៉ាប់រួមបូកនឹងប្រទេសអេហ្ស៊ីបមួយទៀតធ្លាប់បានព្យួរទំនាក់ទំនងជាមួយកាតាអស់រយៈពេលជាង ៣ឆ្នាំ ពោលចាប់តាំងពីខែមិថុនា ឆ្នាំ ២០១៧។ អារ៉ាប៊ីសាអូឌីតដែលជាមេក្លោងបានចោទកាតាពីបទគាំទ្រនយោបាយអ៊ីរ៉ង់ ក្រុមភាតរអ៊ីស្លាម ឬគាំទ្រភេរវនិយម។ គឺទើបនៅក្នុងកិច្ចប្រជុំប្រចាំឆ្នាំរបស់ក្រុមប្រឹក្សាសហប្រតិបត្តិការឈូងសមុទ្រពែក្សក្នុងថ្ងៃទី៥ មករា ឆ្នាំ ២០២១ ថ្មីៗនេះទេដែលកាតា និងប្រទេសអារ៉ាប់ទាំង ៤ បានផ្សះផ្សាគ្នាឡើងវិញ។
រាជទាយាទអារ៉ាប៊ីសាអូឌីតបេន សាលម៉ាលបានសម្លឹងឃើញការរួបរួមរបស់រាជានិយមក្នុងតំបន់ឈូងសមុទ្រពែក្សជាយុទ្ធសាស្រ្តមួយដើម្បីប្រឈមទប់នឹងការគំរាមកំហែងពីកម្មវិធីនុយក្លេអ៊ែរ និងគ្រាប់មីស៊ីលបាលីស្ទិករបស់អ៊ីរ៉ង់។ ដូច្នេះការឲ្យអារ៉ាប៊ីសាអូឌីតដែលជាគូប្រជែងរបស់អ៊ីរ៉ង់នៅក្នុងតំបន់ទៅល្អូកល្អឺនជាមួយអ៊ីរ៉ង់ប្រហែលជាពិបាកបន្តិច។ ទោះជាយ៉ាងនេះក្តី ប្រមុខការទូតកាតាលោកអាល់ ថានីបានគូសបញ្ជាក់ថា កាតាត្រៀមខ្លួនរួចជាស្រេចដើម្បីជួយសម្រួលឲ្យមានកិច្ចសន្ទនាជាមួយអ៊ីរ៉ង់ បើមានប្រទេសណាមួយសុំឲ្យជួយ និងគាំទ្រចំពោះប្រទេសដែលចង់មានកិច្ចសន្ទនាជាមួយអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ