មនុស្សម្នាក់ស្លាប់និងច្រើននាក់រងរបួសក្នុងការវាយប្រហារដោយរ៉ុកកែតនៅអ៊ីរ៉ាក់
ការវាយប្រហារដោយរ៉ុកកែតសំដៅលើមូលដ្ឋានទ័ពអាមេរិកមួយកន្លែងនៅភាគខាងជើងប្រទេសអ៊ីរ៉ាក់ បានបណ្តាលឲ្យបុគ្គលិកស៊ីវិលម្នាក់ស្លាប់ និងមនុស្សប្រមាណ ៥នាក់ផ្សេងទៀតរងរបួស។ នេះបើតាមការប្រកាសឲ្យដឹងពីខាងមន្ត្រីសន្តិសុខអ៊ីរ៉ាក់ និងសម្ព័ន្ធចម្រុះដឹកនាំដោយសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៣១
ការបាញ់រ៉ុកកែតសំដៅលើមូលដ្ឋានទ័ពអាមេរិកកើតឡើងនៅក្បែរអាកាសយានដ្ឋានអន្តរជាតិ Erbil កាលពីល្ងាចថ្ងៃចន្ទ ទី១៥ កុម្ភៈម្សិលមិញ ។ នេះគឺជាលើកទីមួយហើយក្នុងរយៈពេលជិត ២ ខែ ដែលមូលដ្ឋានទ័ពឬក៏ទីស្នាក់ការយោធារបស់ប្រទេសលោកខាងលិចទទួលរងនូវការវាយប្រហារដូច្នោះនៅក្នុងប្រទេសអ៊ីរ៉ាក់។
រំពេចក្រោយនោះ ប្រមុខការបរទេសអាមេរិកលោក អង់តូនី ប្ល៊ីងកិន បានអំពាវនាវឲ្យមានការស៊ើបអង្កេតមួយភ្លាម ហើយបានសន្យាផងដែរថានឹងនាំយកអ្នកដែលបានប្រព្រឹត្តរឿងនេះឲ្យមកទទួលខុសត្រូវចំពោះទង្វើរបស់ពួកគេ។
លោករដ្ឋមន្ត្រីការបរទេសអាមេរិករូបនេះបានបន្ថែមទៀតថា មានបុគ្គលិកស៊ីវិលរបស់អាមេរិកច្រើននាក់បានរងរបួសនៅក្នុងការវាយប្រហារខាងលើ ប៉ុន្តែលោកមិនបានបញ្ជាក់ឬក៏ផ្តល់ព័ត៌មានលម្អិតបន្ថែមលើសនេះឡើយ។
ជុំវិញរឿងនេះ គេនៅមិនទាន់ឃើញលោក ចូ បៃដិន ដែលម្ចាស់សេតវិមានអាមេរិកបច្ចុប្បន្ន បញ្ចេញជាប្រតិកម្មតបតអ្វីនោះទេ។ ដោយឡែក អតីតប្រធានាធិបតីលោកដូណាល់ ត្រាំ បាន ធ្លាប់បានគំរាមថា ការសម្លាប់ជនជាតិអាមេរិកណាម្នាក់ ដូចជានៅក្នុងការវាយប្រហារដោយរ៉ុកកែតបែបនេះ នឹងជំរុញឲ្យមានយុទ្ធនាការទម្លាក់គ្រាប់បែកទ្រង់ទ្រាយធំនៅក្នុងប្រទេសអ៊ីរ៉ាក់ជាមិនខាន។
យោងទៅតាមប្រភពពីខាងមន្ត្រីសន្តិសុខចម្រុះអ៊ីរ៉ាក់ និងអាមេរិក និយាយប្រាប់សារព័ត៌មានបារាំង AFP យ៉ាងហោចណាស់ មានរ៉ុកកែតចំនួនបីគ្រាប់ ត្រូវបានគេបាញ់សំដៅទៅលើអាកាសយានដ្ឋាន Erbil នៅភាគខាងជើងអ៊ីរ៉ាក់ ក្បែរទីតាំងរបស់កងកម្លាំងទ័ពអន្តរជាតិ ដឹកនាំដោយអាមេរិក ដើម្បីប្រយុទ្ធប្រឆាំងបោសសំអាតក្រុមអង្គការរដ្ឋអ៊ីស្លាម។
ដោយឡែក អង្គការសហប្រជាជាតិវិញបានចេញមុខព្រមាននៅថ្ងៃអង្គារនេះថា អ៊ីរ៉ាក់អាចនឹងបាត់បង់ម្ចាស់ការលែងអាចគ្រប់គ្រងស្ថានការណ៍នៅក្នុងស្រុកទេសបានដូចមុន បន្ទាប់ពីហេតុការណ៍វាយប្រហារដោយរ៉ុកកែតលើមូលដ្ឋានទ័ពអាមេរិកនេះ។
គួរគូសបញ្ជាក់ជូនថា ចាប់តាំងពីអ៊ីរ៉ាក់បានប្រកាសជ័យជម្នះលើពួកសកម្មប្រយុទ្ធអង្គការរដ្ឋអ៊ីស្លាម នៅចុងឆ្នាំ ២០១៧ មក សម្ព័ន្ធទ័ពអន្តរជាតិដឹកមុខដោយសហរដ្ឋអាមេរិក ត្រូវបានកាត់បន្ថយមកនៅត្រឹមចំនួនក្រោម ៣ ៥០០ នាក់ ដែលក្នុងនោះមានកងទ័ពអាមេរិកចំនួន ២៥០០ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ