អ៊ីស្រាអែល៖លុយបានពីការលក់អាវុធក្នុងឆ្នាំ ២០២០ មានជាង ៨ ៣០០លានដុល្លារ
នៅក្នុងប្រទេសអ៊ីស្រាអែល ក្រសួងការពារជាតិបានប្រកាសក្នុងថ្ងៃអង្គារ ទី១ មិថុនាថា ការនាំអាវុធចេញក្នុងឆ្នាំ ២០២០ គិតជាទឹកប្រាក់មានជាង ៨ ៣០០លានដុល្លារ។ អាស៊ី និងប៉ាស៊ីហ្វិកជាតំបន់ដែលអ៊ីស្រាអែលបានលក់អាវុធឲ្យច្រើនជាងគេ។ តាមវិទ្យាសា្ថនស្រាវជ្រាវអន្តរជាតិស្តីពីសន្តិភាពនៅក្នុងទីក្រុងស្តុកខុល ប្រទេសស៊ុយអែត អ៊ីស្រាអែលស្ថិតលំដាប់ទី៨ ជាប្រទេសដែលបាននាំអាវុធចេញច្រើនជាងគេលើលោកក្នុងឆ្នាំ ២០២០។
ចុះផ្សាយនៅថ្ងៃ៖
ស្តាប់ - ០២:១១
ឆ្នាំ ២០២០ ជាឆ្នាំទី២ ដែលអ៊ីស្រាអែលបំបែកកំណត់ត្រាជាប្រវត្តិសាស្រ្តក្នុងការនាំអាវុធចេញដោយទទួលបានប្រាក់ជាង ៨ ៣០០លានដុល្លារ។ បើធៀបនឹងឆ្នាំ ២០១៩ គឺមានការកើនឡើងចំនួន ១៥% ឬស្មើនឹង ១ ០០០លានដុល្លារ។ តែនៅចាញ់ឆ្នាំ ២០១៧ ដែលមានដល់ទៅ ៩ ៣០០លានដុល្លារ។ ជាមួយនឹងការបំបែកកំណត់ត្រាថ្មីពេលនេះ អ៊ីស្រាអែលត្រូវបានវិទ្យាសា្ថនស្រាវជ្រាវអន្តរជាតិស្តីពីសន្តិភាពក្រុងស្តុកខុលហៅកាត់ស៊ីព្រីចាត់ចំណាត់ទី៨ ជាប្រទេសដែលបាននាំអាវុធចេញច្រើនជាងគេក្នុងលោកនៅឆ្នាំ ២០២០។ តាមស៊ីព្រី អតិថិជនសំខាន់ៗដែលបានទិញអាវុធអ៊ីស្រាអែលច្រើនជាងគេ គឺឥណ្ឌា កាណាដា វៀតណាម និងអាស៊ែបៃហ្សង់នៅក្នុងជម្លោះជាមួយអាមេនីកាលពីឆ្នាំ ២០២០។
ក្រសួងការពារជាតិអ៊ីស្រាអែលបានបញ្ជាក់ថា គ្រឿងសព្វាវុធពេញនិយមដែលលក់បានច្រើនជាងគេក្នុងឆ្នាំ ២០២០ មានប្រព័ន្ធរ៉ាដា និងរ៉ាដាសម្រាប់ចាប់សញ្ញានៅពេលបាញ់គ្រាប់មីស៊ីល អាវុធ និងគ្រាប់ផ្ទុះ ឬមួយក៏ដ្រូន។ « កំណើននៃការនាំអាវុធចេញក្នុងសម័យកូវីដ១៩ ជាជោគជ័យមួយដ៏ធំ » នេះជាការយល់ឃើញរបស់ឧត្តមសេនីយយ៉ាអៀរ គូឡាស។ មជ្ឈិមបូព៌ា អាស៊ី និងប៉ាស៊ីហ្វិកតំណាងឲ្យ ៤៤% នៃការនាំអាវុធអ៊ីស្រាអែលសរុបក្នុងឆ្នាំ ២០២០។ បន្ទាប់មក ៣០% នាំទៅកាន់អឺរ៉ុប ២០% នាំទៅកាន់អាមេរិកខាងជើង ៤% នាំទៅកាន់អាហ្រ្វិក និង ២% នាំទៅកាន់អាមេរិកខាងត្បូង។
ក្នុងនាមជាប្រទេសដែលបានលក់អាវុធឲ្យអាស៊ែបៃហ្សង់ច្រើនជាងគេ អ៊ីស្រាអែលមានជាប់ពាក់ព័ន្ធដោយប្រយោលនៅក្នុងជម្លោះប្រដាប់អាវុធរវាងអាស៊ែបៃហ្សង់ និងអាមេនីក្នុងឆ្នាំ ២០២០ កន្លងទៅ។ ក្នុងរយៈពេល ៥ឆ្នាំចុងក្រោយនេះ អ៊ីស្រាអែលបានក្លាយអ្នកផ្គត់ផ្គង់អាវុធទី១ ឲ្យអាស៊ែបៃហ្សង់ដោយលក់បានលុយជាង ៧៤០លានដុល្លារ នេះបើតាមវិទ្យាសា្ថនស្រាវជ្រាវអន្តរជាតិស្តីពីសន្តិភាពក្រុងស្តុកខុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ