ទស្សនកិច្ចដ៏កម្ររបស់គណៈប្រតិភូលីបង់ទៅកាន់ស៊ីរីដើម្បីជជែកលើសំណុំរឿងថាមពល
នៅថ្ងៃសៅរ៍ ទី៤ កញ្ញា គណៈប្រតិភូលីបង់មួយក្រុមបានទៅបំពេញទស្សនកិច្ចផ្លូវការនៅក្នុងប្រទេសស៊ីរី។ នេះជាដំណើរទស្សនកិច្ចលើកទី១ មិនធ្លាប់មានគិតតាំងពី ១០ឆ្នាំកន្លងទៅ ពោលតាំងពីស៊ីរីបានធ្លាក់ក្នុងសង្រ្គាមស៊ីវិលហែកហួរផ្ទៃក្នុង។ គណៈប្រតិភូលីបង់ដែលដឹកនាំដោយអនុប្រធានក្រុមប្រឹក្សារដ្ឋមន្រ្តី រដ្ឋមន្រ្តីការពារជាតិ និងរដ្ឋមន្រ្តីការបរទេសត្រូវបានរដ្ឋមន្រ្តីការបរទេសស៊ីរីទទួលនៅព្រំដែនជាមួយនឹងរដ្ឋមន្រ្តីហិរញ្ញវត្ថុ និងរដ្ឋមន្រ្តីថាមពល។ គោលដៅនៃទស្សនកិច្ចរបស់គណៈប្រតិភូលីបង់នៅស៊ីរីពេលនេះ គឺដើម្បីជជែកលើសំណុំរឿងថាមពលដែលលីបង់ចង់នាំចូលដោយឆ្លងកាត់តាមទឹកដីស៊ីរី។
ចុះផ្សាយនៅថ្ងៃ៖
ស្តាប់ - ០២:១៦
កម្មវត្ថុនៃវត្តមានរបស់គណៈប្រតិភូលីបង់នៅក្នុងទឹកដីស៊ីរីពេលនេះ គឺដើម្បីពិភាក្សា និងជជែកជាមួយថ្នាក់ដឹកនាំស៊ីរីពីលទ្ធភាពដឹកជញ្ជូនតាមទឹកដីស៊ីរីនូវហ្គាស និងភ្លើងអគ្គិសនីដែលលីបង់ទិញពីប្រទេសអេហ្ស៊ីបតាមរយៈប្រទេសហ្សកដានី។ គួរបញ្ជាក់ថា លីបង់ដែលកំពុងផុងខ្លួនជ្រៅទៅក្នុងវិបត្តិសេដ្ឋកិច្ចកំពុងរងគ្រោះខ្លាំងដោយកង្វះថាមពល ពិសេសហា្គស និងភ្លើងអគ្គិសនី។ វិបត្តិមួយនេះកំពុងធ្វើឲ្យប៉ះពាល់ខ្លាំងដល់ជីវិតរស់នៅប្រចាំថ្ងៃរបស់ប្រជាជនលីបង់រាប់សិបលាននាក់។ មានថ្ងៃខ្លះ និងកន្លែងខ្លះ ការផ្តាច់ភ្លើងអគ្គិសនីមានរហូតដល់ទៅ ២៣ម៉ោងក្នុងមួយថ្ងៃ។
អ្វីជាការកត់សម្គាល់ នេះជាលើកទី១ ក្នុងរយៈពេល ១០ឆ្នាំដែលមានដំណើរទស្សនកិច្ចផ្លូវការរបស់ថ្នាក់ដឹកនាំលីបង់នៅស៊ីរី ពោលតាំងពីស៊ីរីបានធ្លាក់ក្នុងសង្រ្គាមហែកហួរផ្ទៃក្នុង។ តាំងពីពេលនោះមក ប្រទេសទាំងពីរមិនបានផ្តាច់ទំនាក់ទំនងការទូតនឹងគ្នាទេ។ តែដំណើរទស្សនកិច្ចរបៀបនេះក៏គេមិនធ្លាប់ឃើញមានដែរ។ អ្វីដែលគេធ្លាប់ឃើញមានកន្លងមក គឺទស្សនកិច្ចជាលក្ខណៈឯកជនរបស់រដ្ឋមន្រ្តីលីបង់នៃចលនាហេស្បូឡាលីបង់ដែលជាសម្ព័ន្ធរបស់ស៊ីរី។ អ៊ីចឹងហើយបានជាមានការលើកឡើងនៅពេលនេះថា ទស្សនកិច្ចរបស់គណៈប្រតិភូលីបង់ចម្រុះនៅស៊ីរីពេលនេះមានបង្កប់ដោយនិមិត្តរូបខ្ពស់។
គួររម្លឹកថា តាំងពី ១ឆ្នាំមកហើយដែលលីបង់បានចរចាទិញថាមពលពីប្រទេសអេហ្ស៊ីប។ តែចំណោតនៅត្រង់រឿងការដឹកជញ្ជូនដែលលីបង់ត្រូវដឹកឆ្លងកាត់តាមទឹកដីស៊ីរី។ ឧបសគ្គនៅត្រង់ថា ស៊ីរីបានជាប់ទណ្ឌកម្មអាមេរិកដែលលីបង់មិនអាចប្រើប្រាស់ទឹកដីស៊ីរីបាន។ គឺទើបនៅខែសីហាដែលរដ្ឋបាលអាមេរិកបានបន្ទន់ជំហរ។ ប្រធានាធិបតីលីបង់បានលើកឡើងពីភ្លើងខៀវរបស់អាមេរិកដែលអនុញ្ញាតឲ្យលីបង់អាចនាំថាមពលចូលដោយដឹកឆ្លងកាត់ទឹកដីស៊ីរី។ លើសពីនេះ ឯកអគ្គរដ្ឋទូតអាមេរិកប្រចាំលីបង់ថែមទាំងប្រកាសគួរឲ្យភ្ញាក់ផ្អើលថា អាមេរិកនឹងជួយលីបង់លើការនាំហ្គាស និងភ្លើងអគ្គីសនីពីអេហ្ស៊ីបដោយឆ្លងកាត់ទឹកដីស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ