មេដឹកនាំប៉ាឡេស្ទីនបើកជំនួបដ៏កម្រជាមួយរដ្ឋមន្ត្រីការពារជាតិអ៊ីស្រាអែល
ប្រធានាធិបតីប៉ាឡេស្ទីនលោក ម៉ះមូដ អាបាស់ បានជួបជាមួយរដ្ឋមន្រ្តីការពារជាតិអ៊ីស្រាអែលលោក បេននី ហ្កង់ កាលពីថ្ងៃអង្គារ ២៨ធ្នូ ម្សិលមិញ ក្នុងអំឡុងដំណើរទស្សនកិច្ចដ៏កម្ររបស់លោកទៅកាន់ប្រទេសអ៊ីស្រាអែល។ ជំនួបរវាងភាគីទាំងពីរផ្តោតជាចំបងលើបញ្ហាសន្តិសុខនិងសេដ្ឋកិច្ច។ នេះបើតាមក្រសួងការពារជាតិអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:១១
កាលពីល្ងាចថ្ងៃអង្គារម្សិលមិញ រដ្ឋមន្ត្រីការពារជាតិអ៊ីស្រាអែលលោក បេននី ហ្កង់ បានទទួលជួបស្វាគមន៍លោក ម៉ះមូដ អាបាស់ នៅឯគេហដ្ឋាននាកណ្តាលទីក្រុងរ៉ូសហាយីន (Rosh Haayin)។ យោងតាមមន្ត្រីជាន់ខ្ពស់ប៉ាឡេស្ទីន កិច្ចប្រជុំនេះគឺជាលើកទីមួយហើយដែលលោកប្រធានាធិបតីអាបាស់បានជួបជាមួយមន្ត្រីអ៊ីស្រាអែលនៅក្នុងប្រទេសអ៊ីស្រាអែលផ្ទាល់រាប់ចាប់តាំងពីឆ្នាំ ២០១០មក។
នៅក្នុងសេចក្តីថ្លែងការណ៍មួយ ក្រសួងការពារជាតិអ៊ីស្រាអែលបានប្រកាសថាជំនួបពិភាក្សារវាង រដ្ឋមន្ត្រីជាន់ខ្ពស់អ៊ីស្រាអែលជាមួយប្រមុខដឹកនាំប៉ាឡេស្ទីនមានគោលដៅកសាងទំនុកចិត្តរវាងគ្នា។ រដ្ឋមន្ត្រីការពារជាតិអ៊ីស្រាអែលបានប្រាប់សមភាគីប៉ាឡេស្ទីនពីបំណងរបស់ខ្លួនក្នុងការពង្រឹងទំនុកចិត្តរវាងប្រទេសទាំងពីរទាំងនៅក្នុងវិស័យសេដ្ឋកិច្ច និងស៊ីវិលដែលនឹងសម្រួលដល់ការបើកផ្លូវឲ្យអ្នកជំនួញប៉ាឡេស្ទីនរាប់រយនាក់ចូលទៅរកស៊ីនៅអ៊ីស្រាអែល។
ពីខាងប៉ាឡេស្ទីនវិញ រដ្ឋមន្ត្រីកិច្ចការស៊ីវិលប៉ាឡេស្ទីននិងជាជំនួយការជំនិតរបស់លោកអាបាស់ និយាយថាកិច្ចប្រជុំខាងលើផ្តោតផងដែរពីដំណោះស្រាយទាក់ទិននឹងជម្លោះនយោបាយរវាងភាគីទាំងពីរដោយដើរស្របតាមស្របច្បាប់អន្តរជាតិ។
ក្រៅពីនេះ ភាគីទាំងពីរក៏បានពិភាក្សាផងដែរអំពីការសាងសង់លំនៅឋានក្នុងតំបន់ស៊ីហ្សកដានីដែលជាដែនដីប៉ាឡេស្ទីនក្រោមអាណានិគមអ៊ីស្រាអែល បញ្ហាសន្តិសុខ សេដ្ឋកិច្ច និងមនុស្សធម៌ជាច្រើន។ នេះបើតាមមន្ត្រីប៉ាឡេស្ទីនដដែល។
គួររំឭកថាកាលពីចុងខែសីហាកន្លងទៅ រដ្ឋមន្ត្រីការពារជាតិអ៊ីស្រាអែលបានធ្វើទស្សនកិច្ចដ៏កម្រមួយដែរទៅកាន់ទីស្នាក់ការកណ្តាលរបស់អាជ្ញាធរប៉ាឡេស្ទីននៅទីក្រុងរ៉ាម៉ា់ឡា (Ramallah) ស្ថិតនៅចម្ងាយប្រមាណ ១០គីឡូម៉ែត្រពីភាគខាងជើងក្រុងហ្ស៊េរុយសាឡិម។
ក៏ប៉ុន្តែក្រោយការចរចាកាលណោះ នាយករដ្ឋមន្ត្រីអ៊ីស្រាអែលដែលមានចរិតឆេវឆាវលោក ណាវតាលី ប៊ែននែត បានគូសបញ្ជាក់ថាគ្មានដំណើរការសន្តិភាពណាមួយកំពុងប្រព្រឹត្តធ្វើទៅជាមួយប៉ាឡេស្ទីនឡើយ។ ដូច្នោះហើយគេកំពុងរងចាំមើលថាតើជំនួបរវាងរដ្ឋមន្ត្រីការពារជាតិអ៊ីស្រាអែលជាមួយប្រមុខដឹកនាំប៉ាឡេស្ទីនលើកនេះនឹងសម្រេចបានលទ្ធផលជាដុំកុំភួនអ្វីខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ