ប្រមុខរដ្ឋអំណាចប៉ាឡេស្ទីន និងរដ្ឋមន្រ្តីការពារជាតិអ៊ីស្រាអែលជួបគ្នាលើកដំបូងនៅក្នុងដែនដីប៉ាឡេស្ទីន
រដ្ឋមន្រ្តីការពារជាតិអ៊ីស្រាអែលលោកបេននី ហ្គង់ និងប្រមុខរដ្ឋអំណាចប៉ាឡេស្ទីនលោកម៉ាម៉ូដ អាបាស់បានជួបគ្នានៅក្នុងតំបន់ស៊ីហ្សកដានីដែនដីប៉ាឡេស្ទីន។ ជំនួបក្នុងកម្រិតនេះរវាងភាគីប៉ាឡស្ទីន និងអ៊ីស្រាអែលជាជំនួបលើកទី១ តាំងពីលោកណាវតាលី បេននែតឡើងកាន់អំណាចជានាយករដ្ឋមន្រ្តីអ៊ីស្រាអែលក្នុងខែមិថុនា។ អ្វីជាការកត់សម្គាល់ លោកបេននី ហ្គង់បានធ្វើដំណើរទៅជួបលោកម៉ាម៉ូដ អាបាស់ដោយផ្ទាល់នៅទីក្រុងរ៉ាម៉ាឡានៃតំបន់ស៊ីហ្សកដានីដែលជាទីស្នាក់ការរបស់រដ្ឋអំណាចប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០២:០៧
បើតាមប្រភពផ្លូវការ សន្តិសុខ និងសេដ្ឋកិច្ចជាប្រធានបទនៃជំនួបលើកទី១ រវាងរដ្ឋមន្រ្តីការពារជាតិអ៊ីស្រាអែលលោកបេននី ហ្គង់ និងប្រមុខរដ្ឋអំណាចប៉ាឡេស្ទីនលោកម៉ាម៉ូដ អាបាស់។ ប្រធានបទទាំងនេះត្រូវបានក្រសួងការពារជាតិអ៊ីស្រាអែលបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា លោកហ្គង់បាននិយាយប្រាប់លោកអាបាស់ពីការដែលអ៊ីស្រាអែលព្យាយាមរកវិធានការដើម្បីជួយពង្រឹងសេដ្ឋកិច្ចរបស់រដ្ឋអំណាចប៉ាឡេស្ទីន រួមទាំងរកមធ្យោបាយធ្វើឲ្យប្រសើរឡើងលើវិស័យសន្តិសុខ និងសេដ្ឋកិច្ចនៅក្នុងតំបន់ស៊ីហ្សកដានី និងតំបន់ហ្កាហ្សា។ តំបន់ហ្កាហ្សាដែលកំពុងគ្រប់គ្រងដោយចលនាប៉ាឡេស្ទីនហាម៉ាស់។
មានការកត់សម្គាល់ចំនួនពីរនៅក្នុងជំនួបរវាងរដ្ឋមន្រ្តីការពារជាតិអ៊ីស្រាអែល និងប្រមុខរដ្ឋអំណាចប៉ាឡេស្ទីនពេលនេះ ទី១ ជំនួបកម្រិតនេះជាជំនួបលើកទី១ តាំងពីនាយករដ្ឋមន្រ្តីអ៊ីស្រាអែលលោកណាវតាលី បេននែតឡើងកាន់អំណាចក្នុងខែមិថុនា និងទី២ ជំនួបនេះបានធ្វើឡើង ប៉ុន្មានថ្ងៃក្រោយការវិលត្រឡប់ពីដំណើរទស្សនកិច្ចរបស់លោកណាវតាលី បេននែតនៅអាមេរិកដែលលោកបានចូលជួបលោកចូ បៃដិននៅសេតវិមាន។ គេនៅមិនទាន់ដឹងពីទំនាក់ទំនងរវាងប៉ាឡេស្ទីនជាមួយអ៊ីស្រាអែលក្នុងសម័យលោកណាវតាលី បេននែតទេ។ អ្វីដែលគេដឹងនៅក្នុងជំនាន់អតីតនាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូ ទំនាក់ទំនងរវាងភាគីទាំងពីរបានស្គាល់ភាពរកាំរកូសខ្លាំងណាស់។
តែគេមិនត្រូវភ្លេចនិយាយទេថា លោកបេននែតជាអ្នកជាតិនិយមដាច់ខាតដែលប្រឆាំងនឹងការបង្កើតរដ្ឋប៉ាឡេស្ទីន។ ចំណែកខុទ្ទកាល័យរបស់លោកបេននែតបានបញ្ជាក់ច្បាស់ៗថា រដ្ឋាភិបាលចម្រុះរបស់លោកបេននែតដែលមានការចូលរួមពីគណបក្សឆ្វេងនិយមជ្រុល និងស្តាំជាតិនិយមគ្មានបំណងណាមួយដើម្បីផ្តើមនិយាយពីសន្តិភាពជាមួយភាគីប៉ាឡេស្ទីនឡើយ។ នេះស បញ្ជាក់ឲ្យឃើញថា ជម្រៅនៃបញ្ហារវាងភាគីទាំងពីរបន្តចោទជាបញ្ហាដដែល ព្រោះចូរកុំភ្លេចថាសម្រាប់ប៉ាឡេស្ទីន ការចង់បានរដ្ឋស្របច្បាប់មួយរស់ក្បែរអ៊ីស្រាអែលនៅជាបុព្វហេតុចម្បងរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ