ស៊ីរី៖ស្លាប់យ៉ាងតិច ៩០នាក់នៅក្នុងការប្រយុទ្ធគ្នា ៣ថ្ងៃរវាងកម្លាំងគួដឌីស្ថាន និងពួកជីហាត
នៅក្នុងប្រទេសស៊ីរី ការប្រយុទ្ធគ្នារវាងកម្លាំងគួដឌីស្ថាននៅប៉ែកឦសាន និងពួកជីហាតអង្គការរដ្ឋអ៊ីស្លាមបានឈានចូលដល់ថ្ងៃទី៣ នាថ្ងៃសៅរ៍ ទី២២ មករា។ ការប្រយុទ្ធគ្នានេះបានកើតមានឡើង ក្រោយពីពួកជីហាតអង្គការរដ្ឋអ៊ីស្លាមបានវាយប្រហារក្រោមទ្រង់ទ្រាយធំលើពន្ធនាគារមួយស្ថិតក្នុងស្រុកហាសាកេ។ តាមអង្គការអ្នកសង្កេតការណ៍សិទ្ធិមនុស្សស៊ីរី ការវាយប្រហាររយៈពេល ៣ថ្ងៃរវាងកម្លាំងគួដឌីស្ថាន និងពួកជីហាតអង្គការរដ្ឋអ៊ីស្លាមបានបណ្តាលឲ្យមានមនុស្សស្លាប់យ៉ាងតិច ៩០នាក់។
ចុះផ្សាយនៅថ្ងៃ៖
ស្តាប់ - ០២:០៥
បើតាមអង្គការសង្កេតការណ៍សិទ្ធិមនុស្សស៊ីរី ក្នុងចំណោមមនុស្សស្លាប់ទាំង ៩០នាក់ មានយ៉ាងតិច ២៨នាក់ជាសមាជិករបស់កម្លាំងគួដឌីស្ថាន មាន ៥នាក់ជាជនស៊ីវិល និងមាន ៥៦នាក់ជាយុទ្ធជនរបស់អង្គការរដ្ឋអ៊ីស្លាម។ តាមពិត ការប្រយុទ្ធគ្នារវាងកម្លាំងគួដឌីស្ថាន និងពួកជីហាតអង្គការរដ្ឋអ៊ីស្លាមបានចាប់ផ្តើមពីការវាយប្រហាររបស់ពួកជីហាតអង្គការរដ្ឋអ៊ីស្លាមក្នុងយប់ថ្ងៃព្រហស្បតិ៍ ទី២០ឆ្លងចូលថ្ងៃសុក្រ ទី២១ មករាទៅលើពន្ធនាគារ Ghwayran ស្ថិតក្នុងស្រុកហាសាកេ។ អង្គការសង្កេតការណ៍សិទ្ធិមនុស្សស៊ីរីបានបន្ថែមថា កម្លាំងគួដឌីស្ថានក៏ទទួលបានជំនួយពីកម្លាំងប្រជាធិបតេយ្យស៊ីរី និងការគាំទ្រពីកម្លាំងសម្ព័ន្ធមិត្តអន្តរជាតិ។
គួរបញ្ជាក់ថា ជម្រើសវាយប្រហារលើពន្ធនាគាររបស់ពួកជីហាតក៏ដោយសារតែពន្ធនាគារនោះមានដាក់អ្នកទោសគ្នីគ្នាគេប្រមាណជា ៣ ៥០០នាក់ ក្នុងនោះក៏មានថ្នាក់ដឹកនាំរបស់ពួកគេជាច្រើននាក់ដែរ។ នៅក្នុងការវាយប្រហារចូលក្នុងពន្ធនាគារ ពួកជីហាតយកបានអាវុធជាច្រើន និងមានអ្នកទោសមួយចំនួនបានឆ្លៀតរត់ចេញពីពន្ធនាគារ។ តែក្នុងពេលជាមួយគ្នា មានអ្នកទោសជាច្រើននាក់ក៏ត្រូវបានកម្លាំងគួដឌីស្ថានចាប់ខ្លួនបានវិញដែរ។ ដោយឡែក ជនស៊ីវិលដែលរស់នៅក្នុងតំបន់ជុំវិញពន្ធនាគារបានភៀសខ្លួនទៅកាន់តំបន់ជិតខាងដើម្បីជ្រកកោនជាមួយបងប្អូនមួយរយៈ។
អង្គការរដ្ឋអ៊ីស្លាមបានបញ្ជាក់នៅក្នុងសេចក្តីប្រកាសព័ត៌មានកាលពីថ្ងៃសុក្រ ទី២១ មករាថា គោលដៅនៃការវាយប្រហារលើពន្ធនាគារ Ghwayran គឺដើម្បីរំដោះអ្នកទោសរបស់ពួកគេ។ គួរបញ្ជាក់ថា នៅតំបន់ខាងជើងស៊ីរីដែលកំពុងកាន់កាប់ដោយពួកគួដឌីស្ថាន ពន្ធនាគារភាគច្រើនជាសាលារៀនដែលគ្មានស្តង់ដារសន្តិសុខសម្រាប់ដាក់អ្នកទោសយូរអង្វែងទេ។ តាមរដ្ឋអំណាចគួដឌីស្ថាន មានអ្នកទោសជីហាតប្រមាណជា ១២ ០០០នាក់មកពី ៥០ជនជាតិផ្សេងគ្នាកំពុងជាប់ឃុំនៅក្នុងពន្ធនាគារដែលខ្លួនកំពុងគ្រប់គ្រង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ