កងកម្មង់ដូអាមេរិកបើកប្រតិបត្តិការនៅស៊ីរី តាមចាប់ពួកជីហាត
នៅព្រឹកព្រហាមថ្ងៃព្រហស្បតិ៍ទី ០៣កុម្ភៈ ២០២២ កងកម្មង់ដូពិសេសអាមេរិក បានបើកប្រតិបត្តិការនៅភាគពាយ័ព្យប្រទេសស៊ីរី ដើម្បីតាមចាប់ពួកជីហាត។ ប្រតិបត្តិការដ៏កម្រនេះ បានបង្កឱ្យមានស្លាប់យ៉ាងហោចណាស់ ៩នាក់ ក្នុងនោះបីនាក់ជាជនស៊ីវិល។ នេះបើតាមប្រភពអង្គការក្រៅរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០១:៥១
នៅក្នុងសេចក្តីថ្លែងការណ៍ មន្ទីរបញ្ចកោណបានអះអាង យ៉ាងខ្លី ថា “កងកម្លាំងពិសេសអាមេរិក បានចេញធ្វើបេសកកម្មប្រយុទ្ធប្រឆាំងនឹងពួកភេរវនិយម នៅក្នុងប្រទេសស៊ីរី ភាគពាយ័ព្យ ដោយជោគជ័យ និងដោយគ្មានជនរងគ្រោះ ក្នុងជួរទ័ពអាមេរិកទេ។ ព័ត៌មានបន្ថែម នឹងផ្តល់ជូនទៅតាមក្រោយ”។
បើតាមអង្គការសង្កេតការណ៍សិទ្ធិមនុស្សស៊ីរី OSDH ដែលមានបណ្តាញច្រើនក្នុងប្រទេសស៊ីរីវិញ កងកម្មង់ដូរអាមេរិក បានជិះឧទ្ធម្ភាចក្រទៅចុះនៅក្បែរជំរំ Atmé ក្នុងតំបន់ Idleb ដែលមួយភាគធំកាន់កាប់ដោយពួកឧទ្ទាមនិងពួកអ៊ីស្លាមជីហាត។ បើតាមអ្នកជំនាញ ជំរំជនភៀសខ្លួន អាតមេ ដ៏ចង្អៀតនេះ តែងត្រូវបានពួកជីហាតប្រើជាមូលដ្ឋាន និងជាកន្លែងលាក់ខ្លួន។ ប្រតិបត្តិការតាមចាប់ខ្លួនជនជីហាតដែលអាមេរិកស្វែងរក ដៅលើអាគារមួយមានពីរជាន់ និងបានបន្តដោយការប្រយុទ្ធគ្នា រយៈពេល២ម៉ោង។ មានស្លាប់មនុស្សជាច្រើន ក្នុងនោះខ្លះជាកុមារ និងជាស្ត្រីផង។ នេះបើតាមការលម្អិតបន្ថែមរបស់អង្គការក្រៅរដ្ឋាភិបាល ដដែល។
នេះជាប្រតិបត្តិការដ៏កម្រ និងជាប្រតិបត្តិការអាមេរិកទ្រង់ទ្រាយធំទីមួយគិតចាប់តាំងពីប្រតិបត្តិការយោធាកាលពីខែតុលា២០១៩ សម្លាប់មេកើយអង្គការរដ្ឋអ៊ីស្លាមជីហាត Abou Bakr al-Baghdadi មក និងប្រព្រឹត្តទៅតែប៉ុន្មានថ្ងៃក្រោយពីពួកអង្គការរដ្ឋអ៊ីស្លាមបានបើកការវាយប្រហារមួយលើពន្ធនាគារ កាន់កាប់ដោយកងកម្លាំងប្រជាធិបតេយ្យស៊ីរី ថ្ងៃទី ២០មករា២០២២។
សូមរំលឹកថា ស៊ីរីបានធ្លាក់ក្នុងសង្គ្រាមតាំងពីឆ្នាំ២០១១មក។ ក្រៅអំពីអង្គការរដ្ឋអ៊ីស្លាម តំបន់ Idleb របស់ស៊ីរី និងខេត្តជុំវិញ បានក្លាយជាមូលដ្ឋានសំងំកម្លាំងរបស់ពួកអង្គការភេរវនិយមផ្សេងៗ មានជាអាទិ៍ពួកអាល់កៃដា និងកម្លាំងឧទ្ទាមផ្សេងៗ ដែលជាទិសដៅវាយប្រហារតាមផ្លូវអាកាសដ៏ចំបងរបស់កងកម្លាំងរដ្ឋាភិបាលស៊ីរី កងកម្លាំងសម្ព័ន្ធអន្តរជាតិប្រយុទ្ធប្រឆាំងនឹងពួកជីហាតដឹកនាំដោយសហរដ្ឋអាមេរិក និងកងកម្លាំងពិសេសអាមេរិក (កងកម្មង់ដូ)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ