អេមីរ៉ាតអារ៉ាប់រួមស្ទាក់ចាប់មីស៊ីលបាលីស្ទិកពីរដើមបាញ់ដោយក្រុមឧទ្ទាមយេម៉ែន
ពួកឧទ្ទាមយេម៉ែន បានអះអាងនៅថ្ងៃ ចន្ទទី ២៤ មករា ២០២២នេះថានឹងបង្កើនការបាញ់ប្រហារលើអេមីរ៉ាតអារ៉ាប់រួម បន្ថែមទៀត។ ពាក្យព្រមាននេះធ្វើឡើងក្រោយពីអាប៊ូដាប៊ី ស្ទាក់ចាប់ និងបំផ្លាញ មីស៊ីលបាលីស្ទិកពីរដើមបាញ់ដោយក្រុមឧទ្ទាមហ៊ូទី។ អំពើហិង្សាថ្មីនេះ អាចនឹងបង្កឱ្យមានភាពតានតឹងកើនឡើងជាថ្មីនៅក្នុងតំបន់។
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងសេចក្តីថ្លែងការណ៍ ក្រសួងការពារជាតិអេមីរ៉ាតអារ៉ាប់រួម បានគូសបញ្ជាក់ថា ប្រព័ន្ធការពារអាកាសអេមីរ៉ាត ស្ទាក់ចាប់ និងបំផ្លាញបាននូវមីស៊ីលបាលីស្ទីកពីរដើមដែលពួកឧទ្ទាមភេវនិយមហ៊ូទីបាញ់មកលើអេមីរ៉ាត់អារ៉ាប់រួម។ ការវាយប្រហារនេះ មិនបង្កឱ្យមានជនរងគ្រោះទេ។ ចំណែកបំណែកនិងកម្ទេចគ្រាប់ ត្រូវបានធ្លាក់ នៅតាមកន្លែងជាច្រើន ជុំវិញក្រុងអាប៊ូដាប៊ី។ នេះបើតាមសេចក្តីថ្លែងការណ៍ដដែល ដែលមានបន្ថែមថា អេមីរ៉ាតអារ៉ាប់រួម នឹងប្រើគ្រប់វិធានការការពារប្រទេសពីការវាយប្រហារផ្សេងៗ។
នេះ គឺជាការវាយប្រហារថ្មីមួយទៀត ពីសំណាក់ពួកឧទ្ទាមហ៊ូទី នៅយេម៉ែន មកលើអេមីរ៉ាតអារ៉ាប់រួម ក្រោយពីការវាយប្រហារតាមផ្លូវអាកាសលើពន្ធនាគារកាន់កាប់ដោយក្រុមឧទ្ទាមហ៊ូទី នៅភាគខាងជើងប្រទេសយេម៉ែន ដែលបង្កឱ្យស្លាប់មនុស្សអស់យ៉ាងហោច៧០នាក់ កាលពីថ្ងៃទី ២១មករា២០២២។ កាលពីថ្ងៃទី ១៧មករា ជាលើកទីមួយ ក្រុមឧទ្ទាមយេម៉ែន បានវាយប្រហារដោយដ្រូននិងមីស៊ីលលើទីតាំងប្រេងកាត និងអាកាសយានដ្ឋានអាប៊ូដាប៊ី រហូតបង្កឱ្យស្លាប់មនុស្សបីនាក់។
ជាប់ឈ្មោះជាប្រទេសមានសន្តិភាពបំផុតក្នុងតំបន់ និងជាសមាជិកម្នាក់នៃសម្ព័ន្ធអន្តរជាតិ ដឹកនាំដោយអារ៉ាប៊ីសាអូឌីត ដើម្បីគាំទ្ររដ្ឋាភិបាលយេម៉ែនក្នុងការធ្វើសង្គ្រាមទល់នឹងពួកឧទ្ទាមហ៊ូទី តាំងពីឆ្នាំ២០១៥មក អេមីរ៉ាតអារ៉ាប់រួម បានទទួលស្គាល់ជាលើកទីមួយ ថាប្រទេសក្លាយជាចំណុចដៅវាយប្រហារដ្រូននិងមីស៊ីលរបស់ពួកឧទ្ទាមហ៊ូទី ក្នុងដែនដីខ្លួន កាលពីថ្ងៃទី ១៧មករាដែរ។
ចំណែកខាង ក្រុមឧទ្ទាមវិញ ជាមួយនឹងការគំរាមបង្កើនការវាយប្រហារលើអេមីរ៉ាតអារ៉ាប់រួម អ្នកនាំពាក្យហ៊ូទី បានអះអាងថាពួកគេនឹងលាតត្រដាងលម្អិតអំពីប្រតិបត្តិការយោធាដែលដៅលើអេមីរ៉ាតអារ៉ាប់រួម និងអារ៉ាប៊ីសាអូឌីត។
សូមបញ្ជាក់ថា សង្គ្រាមនៅយេម៉ែនបានអូសបន្លាយពេលជាង៧ឆ្នាំហើយ។ បើតាម អង្គការសហប្រជាជាតិ ដែលមិនអាចរកដំណោះស្រាយបិទបញ្ចប់សង្គ្រាមបាន គ្រប់ភាគីជម្លោះសុទ្ធតែជាប់ចោទពីបទប្រព្រឹត្តឧក្រិដ្ឋកម្មសង្គ្រាម។ ក្រុមសម្ព័ន្ធមិត្តអន្តរជាតិបានទទួលស្គាល់ថាមានការជ្រុលជ្រួសក្នុងការវាយប្រហារផ្លូវអាកាស តែបន្ទោសក្រុមឧទ្ទាមថាយកជនស៊ីវិលធ្វើខែលការពារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ