អ៊ីរ៉ង់ប្រកាសថាជាអ្នកបាញ់មីស៊ីលលើអ៊ីរ៉ាក់ដើម្បីបង្ខូចផលប្រយោជន៍អ៊ីស្រាអែល
ឆ្មាំបដិវត្ត ឈ្មោះកងកម្លាំងយោធារបស់សាធារណរដ្ឋអ៊ីស្លាមអ៊ីរ៉ង់ បានប្រកាសទទួលស្គាល់នៅថ្ងៃរសៀលថ្ងៃអាទិត្យទី ១៣មីនា២០២២នេះថា ខ្លួនជាអ្នកបាញ់មីស៊ីលលើតំបន់Erbil អែរប៊ីល ប្រទេសអ៊ីរ៉ាក់។ អ៊ីរ៉ង់អះអាងថាចង់បាញ់សំដៅលើមជ្ឈមណ្ឌលយុទ្ធសាស្ត្រអ៊ីស្រាអែល នៅអ៊ីរ៉ាក់ ហើយព្រមានធ្វើប្រតិបត្តិការបំផ្លាញបំផ្លាញអ៊ីស្រាអែលថ្មីៗទៀត។
ចុះផ្សាយនៅថ្ងៃ៖
ស្តាប់ - ០២:២៨
នៅលើគេហទំព័រ Sapah News ឆ្មាំបដិវត្តអ៊ីរ៉ង់បានអះអាងថា មជ្ឈមណ្ឌលយុទ្ធសាស្ត្រ ដែលផ្សំគំនិត និងល្បិចជាមួយអ៊ីស្រាអែល ត្រូវរងការវាយប្រហារពីសំណាក់មីស៊ីលដ៏ខ្លាំងទំនើបបំផុត។ ប៉ុន្តែជាមួយនឹងការចោទប្រកាន់អ៊ីរ៉ង់ ថាចង់បិទបាំងទង្វើឧក្រិដ្ឋ នៅក្នុងសេចក្តីថ្លែងការណ៍ អាជ្ញាធរគួឌីស្ថានបានប្រកាសថាទិសដៅវាយប្រហារជាទីតាំងស៊ីវិល សេចក្តីប្រកាសរបស់អ៊ីរ៉ង់គ្មានមូលដ្ឋានត្រឹមត្រូវទេ។ ក្នុងតំបន់នេះ គ្មានមជ្ឈមណ្ឌលជារបស់អ៊ីស្រាអែលតាំងនៅឡើយ គឺមានតែសំណង់ថ្មីជាស្ថានកុងស៊ុលអាមេរិកមួយនេះទេ។ ហើយ មីស៊ីល ប្រភេទ បាលីស្ទិកឆ្លងព្រំដែន និយាយឱ្យចំបាញ់ចេញមកទិសខាងកើត ចំនួន១២គ្រាប់ហោះ សំដៅលើស្ថានកុងស៊ុលអាមេរិកនៅក្រុងអែរប៊ីលនេះឯង។ ប៉ុន្តែជាសំណាងល្អ ការវាយប្រហារនេះមិនបង្កឱ្យមានជនរងគ្រោះដល់ជីវិត។ នេះបើតាមអាជ្ញាធរគួឌីស្ថានដដែល ដែលបានថ្ងូរថ្ងូរថា តំបន់គួឌីស្ថានបានក្លាយជាចំណុចវាយប្រហាររបស់អ៊ីរ៉ង់កាន់តែខ្លាំង តែពុំសូវឃើញមានប្រតិកម្មអន្តរជាតិទេ។
ជាការពិត អ៊ីស្រាអែលពុំទាន់បញ្ចេញប្រតិកម្មអ្វីទាំងអស់។ ប្រតិកម្មចម្បងនិងដំបូងគេមានមកពីខាងបារាំង។ ក្រសួងការបរទេសបារាំងបានប្រកាសថ្កោលទោសអ៊ីរ៉ង់ចំៗ ដោយបញ្ជាក់ថា ការបាញ់មីស៊ីលលើតំបន់អែរប៊ីល ជាការគំរាមកំហែងសន្តិសុខអ៊ីរ៉ាក់និងតំបន់ទាំងមូល ព្រមទាំងអាចបំផ្លាញកិច្ចខិតខំប្រឹងស្តារកិច្ចព្រមព្រៀងនុយក្លេអ៊ែរអ៊ីរ៉ង់ទៀត។
សូមបញ្ជាក់ថាការបាញ់មីស៊ីលលើអ៊ីរ៉ាក់ថ្ងៃអាទិត្យនេះ ប្រព្រឹត្តទៅតែមួយសប្តាហ៍ក្រោយពីមេដឹកនាំជាន់ខ្ពស់នៃឆ្មាំបដិវត្តអ៊ីរ៉ង់ពីរបានស្លាប់នៅប្រទេសស៊ីរី ទំនងក្នុងប្រតិបត្តិការរបស់អ៊ីស្រាអែល និងចំថ្ងៃដែលកិច្ចចរចានុយក្លេអ៊ែរអ៊ីរ៉ង់កំពុងចាប់ផ្តើមតែត្រូវអាក់ខានទៅវិញ ដោយហេតុសំណើថ្មីរបស់រុស្ស៊ី។
អ៊ីរ៉ាក់ដែលមានព្រំដែនខាងកើតប្រវែងជិត១៥០០គីឡូម៉ែត្រ ជាប់អ៊ីរ៉ង់ មានតួនាទីស្ទើរមិនអាចខ្វះបានខាងផ្នែកនយោបាយនិងសេដ្ឋកិច្ចសម្រាប់ប្រទេសជិតខាង។ ប៉ុន្តែអ៊ីរ៉ាក់បានក្លាយជាផ្ទាំងស៊ីបនៃការវាយប្រហាររបស់អ៊ីរ៉ង់ជាញឹកញយ។ កាលពីឆ្នាំ២០២០ អ៊ីរ៉ង់បានបាញ់មីស៊ីល២២គ្រាប់លើមូលដ្ឋានទ័ពអាមេរិកពីរ ដើម្បីសងសឹកអាមេរិកដែលបានសម្លាប់ឧត្តមសេនីយ៍របស់ខ្លួន។ នៅចុងខែមករាឆ្នាំ២០២១ រ៉ុកកែតឬដ្រូនយោធាចំនួន៦បានបាញ់មកលើអាកាសយានដ្ឋានអន្តរជាតិក្រុងបាកដាដ ។ តែជារៀងរាល់ការវាយប្រហារដោយដ្រូនឬរ៉ុកកែត អ៊ីរ៉ង់ពុំដែលទទួលស្គាលថាជាទង្វើរបស់ពួកគេទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ