បារាំង អាល្លឺម៉ង់ និងអង់គ្លេសព្រមានកុំឲ្យគេយកកិច្ចព្រមព្រៀងនុយក្លេអ៊ែរអ៊ីរ៉ង់ ជាចំណាប់ខ្មាំង
បារាំង អង់គ្លេស និងអាល្លឺម៉ង់បានចេញសេចក្តីថ្លែងការណ៍រួម នៅថ្ងៃសៅរ៍ ដើម្បីរំលឹកប្រាប់ភាគីរុស្ស៊ីពីគ្រោះថ្នាក់ដួលរលំសាជាថ្មី កិច្ចព្រមព្រៀងអន្តរជាតិស្តីពីនុយក្លេអ៊ែរអ៊ីរ៉ង់ បើសិនរុស្ស៊ីនៅតែដាក់លក្ខខណ្ឌ នៅក្នុងការចរចា។ ការចរចាស្តីពីកិច្ចព្រមព្រៀងនុយក្លេអ៊ែរអ៊ីរ៉ង់ ដែលមានគោលដៅរារាំងមិនឲ្យអ៊ីរ៉ង់ផលិតអាវុធនុយក្លេអ៊ែរ ជាថ្នូរនឹងការដកទណ្ឌកម្មសេដ្ឋកិច្ច ទើបផ្តល់ពន្លឺវិជ្ជមាន នៅមួយរយៈចុងក្រោយនេះ ប៉ុន្តែ ក៏ត្រូវផ្អាក នៅនាទីចុងក្រោយ ដោយរុស្ស៊ី ដែលជាហត្ថលេខីសំខាន់មួយ នៃកិច្ចព្រមព្រៀងនុយក្លេអ៊ែរអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០៣:០៩
មួយថ្ងៃក្រោយ ការចរចាស្តីពីកិច្ចព្រមព្រៀងនុយក្លេអ៊ែរអ៊ីរ៉ង់ ត្រូវផ្អាកដោយប្រថុចញ៉ុច បំផុត នៅទីក្រុងវីយ៉ែន ប្រទេសអូទ្រីស បារាំង អាល្លឺម៉ង់ និងអង់គ្លេស ប្រទេសហត្ថលេខី នៃកិច្ចព្រមព្រៀងបានចេញមុខ ព្រមានកុំឲ្យគេយកកិច្ចព្រមព្រៀងនុយក្លេអ៊ែរអ៊ីរ៉ង់ធ្វើជាអាជីវកម្ម ដើម្បីប្រយោជន៍ផ្ទាល់ខ្លួន។
នៅក្នុងសេចក្តីថ្លែងការណ៍រួម នៅថ្ងៃសៅរ៍ បារាំង អង់គ្លេស និងអាល្លឺម៉ង់ បានបញ្ជាក់ប្រាប់ភាគីរុស្ស៊ីថា ការទាមទារ ដាក់លក្ខខណ្ឌ របស់រុស្ស៊ីអាចធ្វើឲ្យកិច្ចព្រមព្រៀងនុយក្លេអ៊ែរអ៊ីរ៉ង់ ត្រូវដួលរលំ។ ជាលទ្ធផលប្រជាជនអ៊ីរ៉ង់ នៅតែមិនទាន់ដកខ្លួនរួចផុតពីទណ្ឌកម្មសេដ្ឋកិច្ច ចំណែក សហគមន៍អន្តរជាតិនៅតេមិនទាន់បានការធានាស្តីពីកម្មវិធីនុយក្លេអ៊ែរយោធារបស់អ៊ីរ៉ង់។
សូមបញ្ជាក់ថា ដោយមានការចូលរួមដោយប្រយោលរបស់ភាគីអាមេរិក បារាំង អង់គ្លេស ចិន រុស្ស៊ី និងអាល្លឺម៉ង់ បានបើកការចរចាជាមួយអ៊ីរ៉ង់ ដើម្បីស្តារកិច្ចព្រមព្រៀងនុយក្លេអ៊ែរអ៊ីរ៉ង់ ដែល ដួលរលំ នៅឆ្នាំ ២០១៨ ដោយសារអាមេរិក ដកខ្លួន និងត្រលប់ទៅដាក់ទណ្ឌកម្មសេដ្ឋកិច្ចលើអ៊ីរ៉ង់។ ដោយជាប់រងទណ្ឌកម្មសាជាថ្មីរបស់អាមេរិក អ៊ីរ៉ង់ បានផ្គើន រំលោភកិច្ចព្រមព្រៀងជាបន្តបន្ទាប់ ដូចជា ចម្រើនសារធាតុអ៊ុយរ៉ាញ៉ូមក្នុងកម្រិតមួយខ្ពស់ ដែលហាមដោយកិច្ចព្រមព្រៀងឆ្នាំ ២០១៥។ ជាមួយចេតនារបស់អ៊ីរ៉ង់ ដែលចង់ស្តារកិច្ចព្រមព្រៀង ដើម្បីរួចផុតពីទណ្ឌកម្មសេដ្ឋកិច្ច ការចរចាបានបោះជំហានជាវិជ្ជមានរហូតធ្វើឲ្យគេមានសង្ឃឹមថា អាមេរិកនឹងអាចត្រលប់មកចូលក្នុងកិច្ចព្រមព្រៀងនុយក្លេអ៊ែរ និងយល់ព្រមដកទណ្ឌកម្មសេដ្ឋកិច្ចពីអ៊ីរ៉ង់។
ប៉ុន្តែ ជាអកុសលការចរចា ក៏ត្រូវជាប់គាំង ផ្អាក តាំងពីថ្ងៃទី ៥មីនា បន្ទាប់ពីប្រមុខការបរទេសរុស្ស៊ីបានដាក់លក្ខខណ្ឌថា នៅពេលកិច្ចព្រមព្រៀងនុយក្លេអ៊ែរអ៊ីរ៉ង់ ត្រូវបានស្តារឡើងវិញ អាមេរិកត្រូវធានាថា ទណ្ឌកម្មសេដ្ឋកិច្ចទៅលើរុស្ស៊ី ដោយសារសង្រ្គាមនៅអ៊ុយក្រែន នឹងមិនត្រូវអនុវត្ត ធ្វើឲ្យប៉ះពាល់ដល់ទំនាក់ទំនងពាណិជ្ជកម្ម ការធ្វើជំនួញដោះដូរ វត្ថុធាតុដើមរវាងអ៊ីរ៉ង់និងរុស្ស៊ីនោះទេ។ អាមេរិកបានបដិសេធមិនទទួលស្តាប់ ការទាមទាររបស់រុស្ស៊ីក្នុងហេតុផលថា ទណ្ឌកម្ម សេដ្ឋកិច្ចទៅលើរុស្ស៊ី ដោយសារធ្វើសង្រ្គាមឈ្លានពានអ៊ុយក្រែន ជារឿងដាច់ដោយឡែក គ្មានជាប់ទាក់ទងនឹងកិច្ចព្រមព្រៀងនុយក្លេអ៊ែរនោះទេ។
ក្នុងករណី អាមេរិកអាចត្រលប់ចូលកិច្ចព្រមព្រៀង នុយក្លេអ៊ែរអ៊ីរ៉ង់ ដើម្បីបង្កាកុំឲ្យអ៊ីរ៉ង់មានលទ្ធភាពផលិតអាវុធនុយក្លេអ៊ែរ អ៊ីរ៉ង់នឹងអាចរួចផុតពីទណ្ឌកម្មសេដ្ឋកិច្ច និងអាចនាំចេញប្រេងយកទៅលក់នៅទីផ្សារអន្តរជាតិ។ នៅក្រោយលែងជាប់ទណ្ឌកម្មសេដ្ឋកិច្ច នៅឆ្នាំ ២០១៦ អ៊ីរ៉ង់អាចនាំចេញប្រេង២លានបារីល ក្នុងមួយថ្ងៃ។ ប៉ុន្តែ ដោយសារអាមេរិកត្រលប់ទៅដាក់ទណ្ឌកម្មនៅឆ្នាំ ២០១៨ អ៊ីរ៉ង់ អាចលួចលក់ ប្រេងឲ្យចិន តែប៉ុណ្ណោះ។
អ្នកជំនាញវាយតម្លៃថា ដោយទាមទារដាក់លក្ខខណ្ឌ ដើម្បីខ្ទាស់ជើង មិនឲ្យគេអាចស្តារកិច្ចព្រមព្រៀងនុយក្លេអ៊ែរ អ៊ីរ៉ង់ រុស្ស៊ី មានមហិច្ឆតា ចង់បន្ទុចបង្អាក់កុំឲ្យអ៊ីរ៉ង់រួចផុតពីទណ្ឌកម្ម ពោលគឺរុស្ស៊ីមិនចង់ឲ្យប្រេងអ៊ីរ៉ង់ ក្លាយជាគូប្រជែងរបស់ខ្លួន នៅផ្សារប្រេងអន្តរជាតិ។ គេអាចនិយាយថា នៅក្រោយការដកទណ្ឌកម្ម ប្រេងរបស់អ៊ីរ៉ង់នឹងអាចទៅបំពេញការខ្វះខាតប្រេង នៅទីផ្សារ នៅបន្ទាប់ពី អាមេរិកបន្ថែម ដាក់ទណ្ឌកម្មលើការនាំចេញប្រេងរុស្ស៊ី ក្នុងរឿងរុស្ស៊ីធ្វើសង្រ្គាមឈ្លានពានអ៊ុយក្រែន។ អ៊ីរ៉ង់ និងរុស្ស៊ីជាសម្ព័ន្ធមិត្តនឹងគ្នា ប៉ុន្តែ នៅក្នុងកាលៈទេសៈ នេះ រុស្ស៊ី នៅតែចង់ចងដៃ អ៊ីរ៉ង់ មិនឲ្យលក់ប្រេង ដោយសារតែរុស្ស៊ី ចង់ឲ្យប្រទេសលោកខាងលិច ជាពិសេស អឺរ៉ុប នៅតែពឹងផ្អែកលើប្រេង ឧស្ម័នរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ