អ៊ីរ៉ង់ចេញមុខព្រមានអ៊ីស្រាអែល បើអ៊ីស្រាអែលហ៊ានធ្វើសកម្មភាពប្រឆាំងអ៊ីរ៉ង់
ប្រទេសអ៊ីរ៉ង់បានប្រារព្ធទិវាកងទ័ពនៅថ្ងៃចន្ទ ទី១៨ មេសា។ ថ្លែងនៅចំពោះមុខកងទ័ពនាឱកាសនេះ ប្រធានាធិបតីលោកអេប្រាហ៊ីម រ៉ៃស៊ីបានព្រមានអ៊ីស្រាអែលប្រឆាំងនឹងរាល់សកម្មភាពទាំងឡាយដែលមានគោលដៅវាយប្រហារអ៊ីរ៉ង់។ លោកអេប្រាហ៊ីម រ៉ៃស៊ីបានបន្ថែមថា អ៊ីរ៉ង់នឹងមិនអនុញ្ញាតឲ្យអ៊ីស្រាអែលបង្កអសន្តិសុខនៅក្នុងតំបន់ឡើយ ទោះតាមរយៈប្រទេសណាមួយក្តី។
ចុះផ្សាយនៅថ្ងៃ៖
ស្តាប់ - ០២:១៦
« អស់លោកត្រូវដឹង បើអស់លោកហ៊ានធ្វើសកម្មភាពប្រឆាំងជាតិអ៊ីរ៉ង់ ទោះជាក្នុងរូបភាពអ្វី ធំ ឬតូចក្តី កម្មវត្ថុនៃកម្លាំងប្រដាប់អាវុធរបស់យើងនឹងវាយប្រហារចំកណ្តាលបេះដូងរបស់របបអស់លោក។ កម្លាំងប្រដាប់អាវុធរបស់យើងនឹងមិនទុកឲ្យអស់លោកនៅសុខឡើយ » នេះជាការថ្លែងរបស់ប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីនៅចំពោះមុខកងទ័ពនាឱកាសទិវាកងទ័ព។ ការព្រមានស្រដៀងគ្នានេះក៏ត្រូវបានលោកអេប្រាហ៊ីម រ៉ៃស៊ីធ្វើឡើងកាលពីថ្ងៃព្រហស្បតិ៍ ទី១៤ មេសាថា អ៊ីរ៉ង់នឹងមិនអនុញ្ញាតឲ្យសត្រូវស៊ូពូជអ៊ីស្រាអែលបង្កគ្រោះថ្នាក់ដល់សន្តិសុខនៅក្នុងតំបន់ទោះតាមរយៈប្រទេសណាមួយក៏ដោយ សូម្បីតែអ៊ីរ៉ាក់។
ការលើកឈ្មោះប្រទេសអ៊ីរាក់ព្រោះកាលពីខែមីនា កងឆ្មាំបដិវត្តន៍អ៊ីរ៉ង់បានបាញ់គ្រាប់មីស៊ីលបាលីស្ទិកប្រមាណ ១២គ្រាប់សំដៅលើក្រុងអ៊ែរប៊ីលដែលជាក្រុងរបស់តំបន់ស្វយ័តគួដឌីស្ថានអ៊ីរ៉ាក់។ តាមកងឆ្មាំបដិវត្តន៍អ៊ីរ៉ង់ ផ្ទាំងស៊ីបនៃការវាយប្រហាររបស់ខ្លួនគឺមជ្ឈមណ្ឌលយុទ្ធសាស្រ្តដែលប្រើប្រាស់ដោយអ៊ីស្រាអែល។ តែរដ្ឋអំណាចក្រុងអ៊ែរប៊ីលបានបញ្ជាក់ពីការគ្មានមជ្ឈមណ្ឌលយុទ្ធសាស្រ្តរបស់អ៊ីស្រាអែលនៅក្នុងទីក្រុង នៅជុំវិញទីក្រុង និងនៅក្នុងតំបន់។ គួរបញ្ជាក់ថារវាងអ៊ីរ៉ង់ និងអ៊ីស្រាអែល គឺជាសត្រូវស៊ូពូជដែលប្រហែលគ្មានថ្ងៃអាចផ្សះផ្សាគ្នាបានឡើយ។
អ៊ីស្រាអែលដែលជាសម្ព័ន្ធមិត្តចាក់ទឹកមិនលិចរបស់អាមេរិកក៏កំពុងបន្តលូកដៃនៅក្នុងកិច្ចចរចារវាងអ៊ីរ៉ង់ និងសហគមន៍អន្តរជាតិដើម្បីស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ មកដល់ពេលនេះ ភាគីពាក់ព័ន្ធនៃកិច្ចចរចានៅក្នុងទីក្រុងវីយែន ប្រទេសអូទ្រីសបន្តនិយាយមិនចុះសម្រុងគ្នា។ អ៊ីរ៉ង់ទាមទារឲ្យអាមេរិកដកកងឆ្មាំបដិវត្តន៍អ៊ីរ៉ង់ចេញពីបញ្ជីអង្គការភេរវនិយមអន្តរជាតិ។ តែក្រុមស្តាំនិយមនៅអាមេរិក និងអ៊ីស្រាអែលបានព្រមានប្រឆាំងក្រុងវ៉ាស៊ីនតោនជាមុន។ មួយវិញទៀត អ៊ីស្រាអែលក៏បានប្រឆាំងដាច់ខាតពីការវិលត្រឡប់ជាថ្មីនូវកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដែលអាមេរិកក្នុងជំនាន់ដូណាល់ ត្រាំបានដកខ្លួនក្នុងឆ្នាំ ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ