អ៊ីរ៉ង់បាញ់ផ្លោងមីស៊ីលជាច្រើនគ្រាប់ដើម្បីជាសារព្រមានអ៊ីស្រាអែល
នៅថ្ងៃសុក្រ ទី២៤ ធ្នូ កងឆ្មាំបដិវត្តន៍អ៊ីរ៉ង់បានបាញ់មីស៊ីលបាលីស្ទិកដំណាលគ្នាចំនួន ១៦ គ្រាប់ ក្នុងពេលបិទបញ្ចប់សមយុទ្ធយោធារយៈពេលប្រាំថ្ងៃនៅឯតំបន់ភាគខាងត្បូងប្រទេស។ មេទ័ពអ៊ីរ៉ង់និយាយថាការបាញ់មីស៊ីលនេះធ្វើឡើងដើម្បីជាសារព្រមានក្តៅចំពោះអ៊ីស្រាអែលដែលជាសត្រូវ។
ចុះផ្សាយនៅថ្ងៃ៖
ស្តាប់ - ០១:៥១
កងទ័ពអ៊ីរ៉ង់បានបាញ់មីស៊ីលរយៈចម្ងាយឆ្ងាយ ចម្ងាយមធ្យម និងរយៈចម្ងាយខ្លីកាលពីថ្ងៃសុក្រម្សិលម្សិញដែលជាថ្ងៃចុងក្រោយនៃសមយុទ្ធទ្រង់ទ្រាយធំមានឈ្មោះថា Great Prophet 17 ឬប្រែជាភាសាខ្មែរថាព្យាការីដ៏អស្ចារ្យ។
មីស៊ីលបាលីស្ទិកដែលអ៊ីរ៉ង់ប្រើក្នុងសមយុទ្ធ (Emad, Ghadr, Sejjil, Zelzal, Dezful និង Zolfaqar) អាចបាញ់ចម្ងាយចាប់ពី ៣៥០ ទៅ ២០០០ គីឡូម៉ែត្រ និងបានហោះទៅវាយកម្ទេចត្រូវគោលដៅដូចដែលបានគ្រោងទុកចំល្អ១០០%។ ចំណែកមីស៊ីលចម្ងាយខ្លី និងមធ្យមរបស់ខ្លួនវិញ អ៊ីរ៉ង់ថាអាចហោះឆ្លងទៅដល់មូលដ្ឋានទ័ពអាមេរិកក្នុងតំបន់ ក៏ដូចជាមូលដ្ឋានទ័ពរបស់អ៊ីស្រាអែលដែរ។
ឧត្តមសេនីយ៍អ៊ីរ៉ង់លោក Mohammad Bagheri បាននិយាយប្រាប់ទូរទស្សន៍រដ្ឋអ៊ីរ៉ង់ថា សមយុទ្ធយោធានេះត្រូវបានរៀបចំឡើងជាពិសេសដើម្បីឆ្លើយតបទៅនឹងការគំរាមកំហែងធ្វើឡើងដោយអ៊ីស្រាអែលនាប៉ុន្មានថ្ងៃថ្មីៗនេះ។ ហើយក្នុងសមយុទ្ធលើកនេះដែរ អ៊ីរ៉ង់បានដាក់ពង្រាយគ្រាប់មីស៊ីលចំនួនរាប់រយដែលមានសមត្ថភាពអាចកម្ទេចប្រទេសណាដែលព្រហើនហ៊ានវាយប្រហារអ៊ីរ៉ង់។
ដោយឡែក ប្រធានកងឆ្មាំបដិវត្តន៍អ៊ីរ៉ង់លោក Hossein Salami បានអះអាងថា សមយុទ្ធយោធា... គឺជាការព្រមានក្តៅសំដៅទៅកាន់ប្រទេសអ៊ីស្រាអែលដែលជាសត្រូវ និងថាប្រសិនណាបើអ្នកណាហ៊ានវាយប្រហារអ៊ីរ៉ង់ នោះអ៊ីរ៉ង់ប្រាកដជានឹងកាត់ដៃរបស់ពួកគេចោលជាមិនខាន។
គួរបញ្ជាក់ថា សមយុទ្ធបញ្ចេញសាច់ដុំយោធារបស់អ៊ីរ៉ង់ខាងលើបានធ្វើឡើងប៉ុន្មានថ្ងៃបន្ទាប់ពីទីប្រឹក្សាសន្តិសុខជាតិអាមេរិកលោក ជេក ស៊ូលីវ៉ាន់ ជួបជាមួយលោកនាយករដ្ឋមន្ត្រីអ៊ីស្រាល អែលណាវតាលី ប៊ែននែត ដែលជាអ្នកប្រឆាំងទៅនឹងការស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ